ខេត្តរតនគិរី ៖ បុរសស្ត្រី២នាក់ប្តីប្រពន្ធដែលល្បីថា ឆ្លងទឹកអូរលង់ស្លាប់នោះ ពេលនេះព័ត៌មានច្បាស់ការណ៍បានឱ្យដឹងថា អ្នកស្លាប់គឺប្តី ឯប្រពន្ធនៅរស់ ។ តាមរបាយការណ៍របស់នគរបាលមូលដ្ឋាន និងខេត្ត…
ខេត្តរតនគិរី ៖ បុរសស្ត្រី២នាក់ប្តីប្រពន្ធដែលល្បីថា ឆ្លងទឹកអូរលង់ស្លាប់នោះ ពេលនេះព័ត៌មានច្បាស់ការណ៍បានឱ្យដឹងថា អ្នកស្លាប់គឺប្តី ឯប្រពន្ធនៅរស់ ។ តាមរបាយការណ៍របស់នគរបាលមូលដ្ឋាន និងខេត្ត បានឱ្យដឹងថា កាលពីថ្ងៃទី១៣ សីហា វេលាម៉ោង៥និង៣០នាទីល្ងាច មានការផ្អើលឆោឡោមួយពីករណីប្តីប្រពន្ធមួយគូលង់ទឹកអូរស្លាប់ នៅចំណុចអូរជីប ស្ថិតក្នុងភូមិ៣ ឃុំត្រពាំងក្រហម ស្រុកកូនមុំ ។
ជនរងគ្រោះជាប្រពន្ធឈ្មោះ វី ភី អាយុ២៧ឆ្នាំ ឯប្តីឈ្មោះ ជា សំអាត អាយុ៣០ឆ្នាំ ជាកសិករ មានកូនក្នុងបន្ទុក៤នាក់ និងមានទីលំនៅបច្ចុប្បន្នភូមិ១ ហៅភូមិត្រពាំងច្រេស ឃុំត្រពាំងច្រេស ស្រុកកូនមុំ ។
បើតាមការរៀបរាប់របស់ស្ត្រីឈ្មោះ វី ភី ជាប្រពន្ធ ដែលនៅរស់រានមានជីវិតបានរៀបរាប់ប្រាប់សមត្ថកិច្ចមូលដ្ឋានពីដំណើររឿងនេះថា នៅថ្ងៃទី១៣ សីហា ពួកគាត់ទាំង២នាក់ប្តីប្រពន្ធបានជិះម៉ូតូ១គ្រឿង ម៉ាកវ៉េវទៅចម្ការរបស់គាត់ដែលមានចម្ងាយពីផ្ទះជិត២០គីឡូម៉ែត្រ ហើយផ្លូវទៅដីចម្ការរបស់គាត់នេះ ត្រូវឆ្លងអូរ១យ៉ាងធំ ដែលមានជម្រៅទឹក៣ ទៅ៤ម៉ែត្រ ។
គាត់បន្តថា ពេលឆ្លងទឹកអូរនោះ គាត់បានធ្វើក្បូនប្ញស្សីមួយ ដែលមានបន្ទះឫស្សីចំនួន៣០ ទៅ៤០បន្ទះនិងប្រវែង២ម៉ែត្រ ។ ពេលឆ្លងអូរនៅវេលាព្រឹក មិនមានបញ្ហាអ្វីទេ លុះដល់ល្ងាចចាប់ពីម៉ោងជាង៥ គាត់បានឆ្លងត្រឡប់មកផ្ទះវិញ រួមទាំងម៉ូតូ១គ្រឿងផងដែរ ។ ខណៈឆ្លងដល់ពាក់កណ្តាលអូរ ស្រាប់តែមានទឹកហូរកួចយ៉ាងខ្លាំង បណ្តាលឱ្យក្បូនក្រឡាប់ធ្លាក់ គាត់ជាប្រពន្ធទៅក្នុងទឹកមុន ឯប្តីគាត់បានហក់ស្រវាទៅចាប់គាត់ តែនៅពេលនោះ ចាប់អត់បានទេ ហើយទឹកក៏កួចប្តីគាត់ ទៅតាមខ្សែទឹកហូរបានប្រមាណ១៥នាទី ប្តីគាត់លង់ទឹកលិចបាត់ស្រមោលទៅ ។
គាត់ មូលហេតុដែលគាត់ជាប្រពន្ធរួចផុតពីសេចក្តីស្លាប់នោះ គឺពេលគាត់ធ្លាក់ទឹកអូរ ហាក់ដូចជាមានអ្វីរុញគាត់ឱ្យហែលសំដៅ ទៅគុម្ពឫស្សីមួយនៅក្បែរច្រាំងអូរប្រហែល៤ទៅ៥ម៉ែត្រ ។ ពេលនោះ គាត់បានចាប់មែកឫស្សីដែលធ្លាក់មកក្នុងទឹកអូរ រួចឡើងទៅសម្ងំនៅក្រោមគុម្ពឫស្សីនោះអស់មួយយប់ ។ នៅថ្ងៃទី១៤ ខែសីហា វេលាម៉ោងជាង៨ព្រឹក គាត់ដើរមកកន្លែងអូរដែលគាត់ឆ្លង បានជួបអ្នកភូមិជាមួយគ្នា និងជូនដំណឹងទៅសាច់ញាតិ និងសមត្ថកិច្ចមូលដ្ឋានឱ្យជួយរកសពប្តីរបស់គាត់ ។
តាមរបាយការណ៍របស់សមត្ថកិច្ចមូលដ្ឋានបានបញ្ជាក់ថា សពបុរសជាប្តីត្រូវបានរកឃើញនៅថ្ងៃទី១៥ ខែសីហា វេលាម៉ោង៨និង២០នាទីព្រឹក ដោយសពបានអណ្តែតតាមខ្សែទឹកចេញពីកន្លែងលង់ចម្ងាយប្រមាណ៥០០ទៅ៦០០ម៉ែត្រ ដោយកៀបជាប់នឹងគល់ឈើមួយយ៉ាងធំ ។
ចែករំលែកព័តមាននេះ