រាជធានីភ្នំពេញ ៖ ដើម្បីរួមចំណែកដល់កិច្ចខិតខំប្រឹងប្រែងកម្រិតជាតិ និងអន្តរជាតិ គណៈមេធាវី នៃព្រះរាជាណាចក្រកម្ពុជា បានរៀបចំសន្នីសីទអន្តរជាតិ ស្តីពីជំនួយផ្នែកច្បាប់លើកដំបូងនៅកម្ពុជា ក្រោមមូលបទ ៖…
រាជធានីភ្នំពេញ ៖ ដើម្បីរួមចំណែកដល់កិច្ចខិតខំប្រឹងប្រែងកម្រិតជាតិ និងអន្តរជាតិ គណៈមេធាវី នៃព្រះរាជាណាចក្រកម្ពុជា បានរៀបចំសន្នីសីទអន្តរជាតិ ស្តីពីជំនួយផ្នែកច្បាប់លើកដំបូងនៅកម្ពុជា ក្រោមមូលបទ ៖ «ការចែករំលែកឧត្តមានុវត្តន៍ ដើម្បីជំនួយផ្នែកច្បាប់កាន់តែមានប្រសិទ្ធភាពនៅអាស៊ី» ដោយមានអ្នកច្បាប់ចំនួន ១៣ប្រទេស ចូលរួម ។
ថ្លែងក្នុងសន្នីសីទ នាព្រឹកថ្ងៃទី១០ ខែឧសភា ឆ្នាំ២០២៤ នៅក្រសួងរៀបចំដែនដី នគរូបណីយកម្ម និងសំណង់ លោក លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា បានលើកឡើងថា សន្នីសីទមានគោលបំណង ដើម្បីលើកកម្ពស់ការយល់ដឹង អំពីសារៈសំខាន់ នៃការផ្តល់ជំនួយផ្នែកច្បាប់ និងសម្របសម្រួលការផ្លាស់ប្តូរចំណេះដឹង និងបទពិសោធនន៍ ក្នុងចំណោមតួអង្គពាក់ព័ន្ធជាតិ និងអន្តរជាតិពីតាមបណ្តាយុត្ថាធិការ និងផ្សេងៗគ្នា ដែលបានចូលរួម ។
លោកប្រធានគណៈមេធាវី បានលើកឡើងថា កន្លងមកគណៈមេធាវី បានដាក់ចេញយន្តការជាច្រើន ដើម្បីផ្តល់ជំនួយផ្នែកច្បាប់ ដែលមកដល់ពេលនេះ ពុំមានបញ្ហានោះទេ ។
លោកបន្តថា មកដល់ពេលនេះ រាជរដ្ឋាភិបាល ជំនួយផ្នែកច្បាប់ គឺជាសេវាចាំបាច់ ដែលជួយដល់ជនក្រីក្រ និងជនងាយរងគ្រោះ ដែលពុំមានលទ្ធភាពក្នុងការពឹងពាក់សេវាផ្នែកច្បាប់ ដើម្បីស្វែងរកយុត្តិធម៌ ។
លោក លី ច័ន្ទតុលា បានបន្ថែមថា ជំនួយផ្នែកច្បាប់នេះ គឺគ្របដណ្តប់លើករណីរដ្ឋប្បវេណី ព្រហ្មទណ្ឌ រដ្ឋបាល រួមទាំងការអប់រំច្បាប់ ការទទួលបានព័ត៌មានច្បាប់ និងសេវាផ្សេងៗទៀត តាមរយៈយន្តការដោះស្រាយវិវាទក្រៅប្រព័ន្ធតុលាការ។ ជំនួយនេះ រួមចំណែកដល់សង្គម ដែលប្រកបដោយ សន្តិភាព យុត្តិធម៌ សុខុដុមរមនា និងបរិយាបន្ន ផ្នែកលើនីតិរដ្ឋ និងសិទ្ធិមនុស្ស ។
បើតាមប្រធានគណៈមេធាវីរូបនេះ បានអះអាងថា តាមរយៈយន្តការនេះ ជនក្រីក្រ និងជនងាយរងគ្រោះ នឹងយល់ដឹងអំពីសិទ្ធិ និងកាតព្វកិច្ចរបស់ពួកគេ។ បន្ថែមលើនេះ ជំនួយផ្នែកច្បាប់ ក៏រួមចំណែកក្នុងការសន្សំសំចៃការចំណាយរបស់រដ្ឋាភិបាលលើបញ្ហា ដែលពុំបានដោះស្រាយ ដូចជាសេវាសុខភាព ការស្នាក់នៅ ការការពារកុមារ និងការឃុំឃាំង ។
ជាងនេះលោកប្រធានគណៈមេធាវី ថា ជំនួយផ្នែកច្បាប់ បានចូលរួមដើម្បីសម្រេចបានគោលដៅសាកលលោក នៃសិទ្ធិទទួលបានយុត្តិធម៌ ដែលមានជាមូលដ្ឋានមួយ នៃគោលដៅអភិវឌ្ឍន៍ប្រកបដោយចីរភាពទាំង១៧ របស់អង្គការសហប្រជាជាតិ ។
ជាមួយគ្នានោះដែរ លោក លី ច័ន្ទតុលា បានឲ្យដឹងដែរថា ក្នុងរយៈពេល៥ឆ្នាំកន្លងមក នេះគណៈមេធាវី បានទទួល និងគ្រប់គ្រងការពារសំណុំរឿង២៧,៦៩៨សំណុំរឿង ។ កូនក្តី ដែលពាក់ព័ន្ធមានចំនួន ៤៤,៣០៨នាក់ ក្នុងនោះមានកូនក្តីជាជនបរទេស មកពី៣៦ប្រទេស មានចំនួន១,៦១៧នាក់ ។ បានផ្តល់ប្រឹក្សាយោបល់ផ្នែកច្បាប់ បានចំនួន ២,៦១៦ករណី ពាក់ព័ន្ធនឹងចំនួនបទល្មើសនេះ ចំនួនមេធាវីស្ម័គ្រចិត្ត ចូលរួមមានចំនួន៦៤៧នាក់ ។ គណៈមេធាវីបានចំណាយថវិការផ្ទាល់ខ្លួន ចំនួនប្រមាណ៣ពាន់លានរៀល ៕
ចែករំលែកព័តមាននេះ