ប្រទេសតួកគី ៖ ប្រធានាធិបតីតួកគីលោករីស៊ីប តៃយីបអ័រដូហ្គាន កាលពីថ្ងៃទី១៣ សីហា បានចោទប្រកាន់សហរដ្ឋអាមេរិកថា ចង់វាយប្រហារតួកគីពីក្រោយខ្នង។ លោកក៏លើកពីការរួមគំនិតរបស់អាមេរិកដែលធ្វើឲ្យប្រាក់តួកគីធ្លាក់ថ្លៃយ៉ាងគំហុក។
ក្នុងសុន្ទរកថាមួយនាទីក្រុងអង់ការ៉ា លោកអ័រដូហ្គានថ្លែងថា ម្យ៉ាងអ្នកឯងនិយាយថាយើងជាដៃគូយុទ្ធសាស្ត្រនឹងគ្នា តែម្យ៉ាងទៀតអ្នកឯងលួចបាញ់យើងពីក្រោយខ្នង។
តួកគី និងអាមេរិកជាសម្ព័ន្ធមិត្ត២ក្នុងផ្ទៃអូតង់ កំពុងឆ្លងកាត់វិបត្តិការទូតមួយទាក់ទិនជាពិសេសនឹងការចាប់ខ្លួន គ្រូប្រដៅសាសនាអាមេរិកម្នាក់ លោក ANDREW BRUNSONដែលទទួលការចោទប្រកាន់ពីបទចារកម្ម និងភេរវកម្ម។ ដោយទាមទារឲ្យដោះលែងជននេះ សហរដ្ឋអាមេរិកតាំងពីដើមខែសីហាមក បានដាក់ទណ្ឌកម្មប្រឆាំងរដ្ឋមន្ត្រីតួកគី២រូប ហើយតួកគីបានសងសឹកតបតវិញ។ ភាពតានតឹងនេះញ៉ាំងឲ្យប្រាក់លីហ្វ្រតួកគីធ្លាក់ថ្លៃយ៉ាងខ្លាំង។
នាថ្ងៃទី១០ សីហា វិបត្តិការទូតកាន់តែធ្ងន់ធ្ងរថែម ពេលប្រធានាធិបតីអាមេរិកលោកដូណាល់ត្រាំ ប្រកាសពីការយល់ព្រមរបស់លោកដល់ការបង្កើនពន្ធទ្វេដងចំពោះការនាំចូលដែកថែប និងអាលុយមីនីញ៉ូមតួកគី បណ្ដាលឲ្យតម្លៃប្រាក់តួកគីកាន់តែដាំក្បាលចុះថែមទៀត។
លោកអ័រដូហ្គានបន្តថា គ្មានប្រធានាធិបតីណាដូចរូបលោក ដែលដេកលក់រួចពេលភ្ញាក់ឡើងនិយាយថា បង្កើនពន្ធលើដែកថែប និងអាលុយមីនីញ៉ូមតួកគីឡើយ។ ហើយប្រកាន់ឥរិយាបថប្រទូស្តរាយខ្លាំងមួយប្រឆាំងនឹងសម្ព័ន្ធមិត្តមួយក្នុងផ្ទៃអូតង់ ហាក់ពុំមានការពន្យល់ណាមួយឡើយ។
ក្នុងសុន្ទរកថារបស់លោកនាថ្ងៃទី១៣ សីហា ប្រធានាធិបតីតួកគី ក៏វាយប្របហារខ្លាំងដែរដល់អ្នកប្រើអ៊ីនធើរណេតមួយចំនួនថា បង្ហោះតាមបណ្ដាញសង្គមបណ្ដាអត្ថាធិប្បាយសំដៅបំផ្លាញសេដ្ឋកិច្ចតួកគី។ លោកថា តាមបណ្ដាញសង្គមមានពួកភេរវករសេដ្ឋកិច្ចជាច្រើន។ ហើយក្បាលម៉ាស៊ីនតុលាការរបស់យើងឈានទៅធ្វើសកម្មភាព។យើងនឹងកាត់ទោសពួកគេឲ្យសមនឹងកំហុសដែលយើងតាមចាប់ខ្លួនពួកគេ។
ក្រសួងមហាផ្ទៃតួកគី បានគូសបញ្ជាក់នាថ្ងៃទី១៣ សីហាថា បានធ្វើការស៊ើបអង្កេតលើអ្នកប្រើអ៊ីនធើរណេតជិត៣៥០នាក់សង្ស័យចែករំលែកអត្ថាធិប្បាយទាំងឡាយបង្កឲ្យប្រាក់លីហ្វ្រតួកគីធ្លាក់ថ្លៃ៕
ចែករំលែកព័តមាននេះ