តាមប្រភពព័ត៌មាន Manchester Evening News បានឲ្យដឹងថា ខ្សែបម្រើរបស់ក្លិបមេឃខៀវ David Silva បានសម្រេចចិត្តចូលនិវត្តន៍នៅក្រុមជម្រើសជាតិអេស្ប៉ាញ ក្រោយពីឈ្នះពាន World Cup មួយ ពាន European Championships ពីរ និង មានវត្តមានលើតារាងចំនួន១២៥ដង ។
Silva នៅតែជាជម្រើសទីមួយរបស់ក្រុមជម្រើសជាតិក្នុងការប្រកួត World Cup នៅរដូវកាលមុននេះ ទើបធ្វើឲ្យគេមិនបានឡើងលេងនៅ Manchester City ពីដើមរដូវកាល ។ ដោយសារតែចង់លេងឲ្យបានពេញដៃពេញជើងទើប Silva សម្រេចចិត្តយ៉ាងលំបាកក្នុងការលាឈប់ពីក្រុមជម្រើសជាតិ ។
ម្យ៉ាងទៀត រូបគេចង់ចំណាយពេលច្រើនជាងមុនទៅលើកូនប្រុសរបស់គេឈ្មោះ Mateo ដែលបានកើតមកមិនគ្រប់ខែនៅរដូវកាលមុន ដោយសារតែហេតុនេះទើបរូបគេត្រូវមានការពិបាកជិះពីពេទ្យទៅលេងបាល់ ជិះពីលេងបាល់ទៅមើលកូននៅពេទ្យ ។
Silva បានសរសេរនៅលើបណ្តាញសង្គមថា ៖«វាមិនមែនជារឿងងាយស្រួលឡើយសម្រាប់ការសរសេររៀបរាប់រឿងខាងក្រោម ក្រោយពេលយើងបានឆ្លងកាត់រឿងជាច្រើនមកហើយ ។ ខ្ញុំបានគិតនិងវិភាគអស់ពេលជាច្រើនថ្ងៃមកហើយ ទម្រាំសម្រេចចិត្តក្នុងការបញ្ចប់អាជីពជាកីឡាករនៅក្រុមជម្រើសជាតិអេស្ប៉ាញ ។ ជាការពិតណាស់ វាគឺជាការសម្រេចចិត្តមួយយ៉ាងពិបាកបំផុតក្នុងអាជីពរបស់ខ្ញុំ ។ ក្រុមជម្រើសជាតិបានផ្តល់នូវអ្វីគ្រប់យ៉ាងមកដល់ខ្ញុំ ហើយឲ្យខ្ញុំរីកចម្រើនទាំងក្នុងនាមជាកីឡាករនិងជាបុគ្គលម្នាក់ តាំងពីខ្ញុំនៅលេងឲ្យក្រុមយុវជន» ។
គួរបញ្ជាក់ផងដែរថា ខ្សែបម្រើរូបនេះមានមោទនភាពជាមួយនឹងការស៊ុតចូល៣៥គ្រាប់ក្នុងការប្រកួត១២៥ដង ក្រោយពីចំណាយពេល១២ឆ្នាំនៅជាមួយនឹងក្រុមជម្រើសជាតិដែលឈ្នះបាន World Cup ម្តង និងពាន European Championships ពីរ ៕
ចែករំលែកព័តមាននេះ