ខេត្តព្រៃវែង ៖ ក្រុមអាជីវកររាប់សិបនាក់ដែលលក់ដូរនៅក្នុងផ្សារព្រៃព្នៅ ស្ថិតក្នុងឃុំព្រៃព្នៅ ស្រុកពារាំង បានលើកគ្នាទៅកាន់សាលាឃុំព្រៃព្នៅ កាលពីព្រឹកថ្ងៃទី១៣ ខែសីហានេះ ដោយធ្វើការជំទាស់ទៅលើសេចក្តីប្រកាសរបស់អាជ្ញាធរឃុំរឿងរុះរើផ្សារព្រៃព្នៅចោល ហើយដេញអាជីវករឲ្យទៅលក់នៅក្នុងផ្សារថ្មី ដែលនៅឆ្ងាយពីផ្សារចាស់ចម្ងាយប្រមាណជា៣០០ម៉ែត្រ ។
ក្រុមអាជីវករទាំងនោះបានឲ្យដឹងថា ទីតាំងដីផ្សារព្រៃព្នៅនេះ គឺជាដីទួលសាធារណៈរបស់រដ្ឋ ហើយពួកគាត់បាននាំគ្នាមកលក់ដូរលើទួលនេះតាំងពីឆ្នាំ១៩៨២មកម្ល៉េះរហូតមកដល់ឆ្នាំ២០១៥ លោក ហ៊ាន រី ជាអ្នកមានម្នាក់នៅក្នុងតំបន់នោះបានមកចរចាជាមួយក្រុមអាជីវករ ដោយចេញមុខចំណាយលុយរៀបចំទីតាំងនេះឲ្យក្លាយទៅជាផ្សារស្តង់ដារមួយដែលមានតូបលក់ដូរត្រឹមត្រូវ ហើយប្រមូលទុនរំលោះវិញមួយឆ្នាំម្តងតម្លៃ៣០០ដុល្លារ សម្រាប់អាជីវករចាស់ ដោយឡែកសម្រាប់អាជីវករថ្មីគាត់លក់ឲ្យក្នុង១តូប១ពាន់ដុល្លារ កុងត្រាគ្នារយៈពេល៣ឆ្នាំ គិតចាប់ពីថ្ងៃទី១ ខែសីហា ២០១៥ ដល់ថ្ងៃទី១ សីហា ២០១៨ លុះមកដល់ពេលនេះដាច់កុងត្រាស្រាប់តែខាងអាជ្ញាធរឃុំបិទសេចក្តីប្រកាសថា និងធ្វើការរុះរើផ្សារព្រៃព្នៅនេះចោលនៅថ្ងៃទី១៥ កញ្ញា ២០១៨ ខាងមុខនេះ ដោយឲ្យអាជីវករទាំងអស់ទៅលក់ដូរនៅក្នុងផ្សារថ្មីរបស់លោក ហ៊ាន រី ដែលគេកំពុងធ្វើថ្មីនៅចម្ងាយប្រមាណជាង៣០០ម៉ែត្រពីផ្សារចាស់ ដោយអាជីវករត្រូវទិញតូបសារជាថ្មីម្តងទៀត រីឯដីផ្សារចាស់នេះគេយកប្រគល់ទៅឲ្យគណៈកម្មការវត្តយកធ្វើជាសួនច្បារវិញ ។
ជុំវិញការផ្លាស់ប្តូរទីតាំងផ្សារព្រៃព្នៅនេះមានអាជីវករខ្លះយល់ព្រមផ្លាស់ប្តូរទៅលក់នៅផ្សារថ្មី ដោយលើកហេតុផលថា ផ្សារចាស់លក់នៅលើចិញ្ចើមថ្នល់តូចចង្អៀត និងមានភក់ល្បាប់ជះក្លិនស្អុយពេញមុខតូប បើទៅលក់ក្នុងផ្សារថ្មី ទីតាំងគេស្អាតល្អ និងធំទូលាយថែមទៀត ប៉ុន្តែពួកគាត់ក៏មានការព្រួយបារម្ភដែរ គឺខ្លាចថៅកែដំឡើងប្រាក់ថ្លៃឈ្មួលតូបតាមតែអំពើចិត្តព្រោះពេលលក់នៅផ្សារចាស់នេះមុនដំបូងតម្លៃតែ៣០០ដុល្លារទេ ក្នុង១ឆ្នាំ លុះពេលគាត់លក់បាន២ទៅ៣ឆ្នាំ ស្រាប់តែថៅកែចាប់ដំឡើងថ្លៃតូបជាបន្តបន្ទាប់មកដល់ពេលនេះឡើងដល់៨០០ដុល្លារហើយក្នុង១ឆ្នាំ ។
ដោយឡែកអាជីវករមួយភាគធំដែលភាគច្រើន គឺក្រុមអាជីវករលក់ត្រី បន្លែផ្លែឈើ និងអ្នកលក់តាមកញ្ច្រែងល្អីជាដើម គឺពួកគាត់បានជំទាស់ដាច់ខាតមិនព្រមទៅលក់នៅផ្សារថ្មីទេ ដោយអះអាងថា គ្មានលុយទិញតូបឡើយសម្តីអាជីវករ« ម្ចាស់ផ្សារហ្នឹងចង់ឲ្យពួកខ្ញុំជាអាជីវករនៅលក់ដូរពីមុនមកឲ្យទៅទិញតូបថ្មីទៅ ដែលគាត់បើកផ្សារថ្មីហ្នឹងណាស់ពួកខ្ញុំហ្នឹងអត់មានលុយទៅទិញទេ អត់មានលទ្ធភាពទៅទិញទេ សុំលក់តាកន្លែងហ្នឹងព្រោះជាឆ្នាំងបាយរបស់ពួកខ្ញុំ ប្រជាពលរដ្ឋនៅក្នុងភូមិហ្នឹង» ជាក់ស្តែងមកដល់ថ្ងៃនេះគឺ«ថា អាជ្ញាធរឃុំហ្នឹងហើយនិងប្រធានផ្សារហ្នឹងបានជូនដំណឹងឲ្យរុះរើផ្សារហ្នឹងថ្ងៃ១៥ ខែកញ្ញា ឆ្នាំ២០១៨ ហើយការរុះរើហ្នឹងខ្ញុំសុំជំទាស់ឲ្យគាត់រុះរើក៏រុះរើទៅអាសំណង់ដែលគាត់សាងសង់ហ្នឹងណា ហើយបន្ទាប់ពីរុះរើហើយខ្ញុំសុំលក់នៅកន្លែងដដែលវិញ តូបដែលធ្លាប់លក់ម៉េចដាក់ឆ័ត្រដាក់សង្ក័សីហ្នឹងខ្ញុំសុំលក់ដដែលវិញ ហើយខ្ញុំលឺដំណឹងថា ការរុះរើហើយគាត់ប្រគល់ឲ្យទៅគណៈកម្មការវត្តតែខ្ញុំសុំជំទាស់ ព្រោះដីហ្នឹងផ្សារតាំងពីដើមមកម្ល៉េះ ហើយគណៈកម្មការវត្តយកបង្កើតជាសួនច្បារនៅកន្លែងហ្នឹង បើបង្កើតជាសួនច្បារមែន ខ្ញុំជាប្រជាពលរដ្ឋជាអាជីវករខ្ញុំសុំជំទាស់ ព្រោះកន្លែងហ្នឹងផ្សារតាំងពីដើមមកម្លេះ »។
លោក ហ៊ាន រី ថៅកែផ្សារព្រៃព្នៅនេះបានឲ្យដឹងដែរថា មូលហេតុនៃការផ្លាស់ប្តូរទីតាំងផ្សារព្រៃព្នៅដោយសារផ្សារនេះស្ថិតនៅលើដីទួលច្រមុះជ្រូកជាប់ផ្លូវជាតិដែលមានទំហំតូចចង្អៀត ហើយរាល់ព្រឹកតែងតែងកកស្ទះជារៀងរាល់ថ្ងៃដោយសារ តែក្រុមអាជីវករនាំគ្នាយកកញ្ច្រែងល្អី បន្លែ ត្រីសាច់មកដាក់លក់នៅលើចិញ្ចើមថ្នល់តែម្តង ហើយដើម្បីដោះស្រាយបញ្ហាការកកស្ទះនេះក៏ដូចជា ដើម្បីរៀបចំសណ្តាប់ធ្នាប់សោភណ្ឌភាពក្នុងឃុំផងទើបលោកស្នើសុំទៅអាជ្ញាធរបង្កើតផ្សារថ្មី នៅលើដីឯកជនរបស់លោកដែលមានទំហំធំ និងមិនប៉ះពាល់ដល់ផ្លូវថ្នល់ទៀតផង ទើបអាជ្ញាធរឯកភាពឲ្យរៀបចំផ្សារថ្មីនេះឡើងតែម្តង ។
លោក ហ៊ាន រី បានបញ្ជាក់ទៀតថា ការផ្លាស់ប្តូរទីតាំងថ្មីនេះលោកមិនបានដំឡើងថ្លៃឈ្មួលតូបទេ គឺផ្សារចាស់តម្លៃប៉ុន្មានផ្សារថ្មីក៏យកតម្លៃដូចគ្នាដែរ ហើយលោកផ្តល់លទ្ធភាពឲ្យអាជីវករបង់ថ្លៃតូបជាថ្ងៃក៏បានជាខែ ឬជាឆ្នាំក៏បាន ហើយបើបង់៥ឆ្នាំមុនគាត់បញ្ចុះតម្លៃឲ្យ១ឆ្នាំ គឺគិតតែ៤ឆ្នាំទេ ហើយសម្រាប់បងប្អូនអាជីវករលក់ដូរតូចតាចតាមកញ្ច្រែង ល្អី គឺមិនចាំបាច់ទិញតូបទេ គាត់មានកន្លែងសម្រាប់ឲ្យលក់ ដោយគ្រាន់តែបង់ថ្លៃទីតាំង១ថ្ងៃ៥០០រៀលប៉ុណ្ណោះ ។
ជុំវិញបញ្ហានេះដែរលោក កែវ ឈួន មេឃុំព្រៃព្នៅបានឲ្យដឹងថា ចំពោះការបិទប្រកាសកំណត់ថ្ងៃរុះរើនេះគ្រាន់តែជាការជូនដំណឹងទេមិនមែនជាការបង្ខំដេញអាជីវករឲ្យចេញនោះឡើយ មានន័យថា បើអាជីវករណាមិនព្រមទៅលក់នៅផ្សារថ្មីសុខចិត្តលក់នៅផ្សារចាស់ដដែលក៏លក់ទៅ តែសូមរក្សាសណ្តាប់ធ្នាប់ដងផ្លូវ ដាច់ខាតមិនត្រូវលក់ហៀរចេញមកលើថ្នល់ទេ ព្រោះ វាប៉ះពាល់ដល់សណ្តាប់ធ្នាប់តាមដងផ្លូវ និងសោភណ្ឌភាពក្នុងមូលដ្ឋានផងដែរ ។
លោកមេឃុំបានបញ្ចាក់ថា មូលហេតុដែលអាជ្ញាធរចង់ឲ្យផ្លាស់ប្តូរទីតាំងផ្សារ ព្រោះសព្វថ្ងៃនេះក្រុមអាជីវករដាក់លក់ដូរពេញផ្លូវធ្វើឲ្យកកស្ទះចរាចរណ៍ជារៀងរាល់ថ្ងៃ ហើយបានចាក់ទឹកមកលើថ្នល់ធ្វើឲ្យទឹកដក់ខូចថ្នល់ជួសជុលមិនឈ្នះទេ និយាយរួម គឺទីតាំងនេះមានភាពរញ៉េរញ៉ៃ គ្មានសណ្តាប់ធ្នាប់ និងសោភណ្ឌភាពអ្វីនោះទេ តែបើដូរទៅលក់នៅផ្សារថ្មី ហើយទីតាំងចាស់នេះយកធ្វើជាសួនច្បារវិញនោះមិនត្រឹមតែកាត់បន្ថយការស្ទះចរាចរណ៍នោះទេ សោភណ្ឌភាពក៏ស្រស់ស្អាតផងដែរ ៕
ចែករំលែកព័តមាននេះ