ខេត្តកំពង់ចាម ៖ ក្មេងប្រុសជំទង់២នាក់នាំគ្នាលេងបិទពួនជាមួយក្មេងស្រីអាយុ១២ឆ្នាំនៅលើផ្ទះឈើមួយស្ថិតនៅឃុំចុងជាច ស្រុកតំបែរ ហើយបានលួងលោមចាប់រំលោភសេពសន្ថវៈម្នាក់ម្តងៗកាលពីវេលាម៉ោង៣រសៀល ថ្ងៃទី២៧ តុលា ឆ្នាំ២០១០ ប៉ុន្តែខណៈអ្នកទី២ កំពុងរំលោភត្រូវគេឃើញទៅប្រាប់ម្តាយក្មេងស្រីរងគ្រោះឱ្យប្តឹងសមត្ថកិច្ចចាប់ខ្លួនតែម្តង ឯជនទី១រត់គេចខ្លួនបាត់។ តាមសេចក្តីរាយការណ៍ពីលោកវរសនីយ៍ត្រី លឿង រដ្ឋា អធិការនគរបាលស្រុកតំបែរឱ្យដឹងថា នៅវេលាម៉ោង៥ល្ងាច ថ្ងៃកើតហេតុប៉ូលិសប៉ុស្តិ៍រដ្ឋបាលឃុំចុងជាចបានទទួលបណ្តឹងផ្ទាល់មាត់ពីស្ត្រីជាម្តាយក្មេងស្រីរងគ្រោះថា ឈ្មោះយឿន វណ្ណា ភេទប្រុស អាយុ១៦ឆ្នាំ បានចាប់រំលោភកូនស្រីរបស់គាត់អាយុ១២ឆ្នាំ។ ក្រោយពីទទួលបានពាក្យបណ្តឹងនេះភ្លាម សមត្ថកិច្ចបានទៅផ្ទះកើតហេតុស្រាវជ្រាវ ព្រមទាំងសួរនាំក្មេងស្រីរងគ្រោះ និងសាក្សី២នាក់ទើបឃាត់ខ្លួនជនសង្ស័យឈ្មោះយឿន វណ្ណា បញ្ជូនទៅកាន់អធិការដ្ឋាននគរបាលស្រុកតំបែរដើម្បីសួរនាំ។
ក្មេងស្រីរងគ្រោះឱ្យដឹងថា នាពេលថ្ងៃត្រង់ ទី២៧ តុលា នាង និងបងស្រីបានទៅធ្វើនំគ្រក់ហូបនៅផ្ទះរបស់ឈ្មោះវណ្ណា ជាមួយប្រុសៗ៤នាក់ទៀត។ បន្ទាប់ពីហូបនំគ្រក់រួចបងស្រីរបស់នាងបានត្រឡប់ទៅផ្ទះមុន ក្នុងពេលនោះឈ្មោះវណ្ណា បានចាប់ដៃនាងចូលក្នុងបន្ទប់លើផ្ទះយកភួយមកឃ្លុំពីលើ រួចចាប់នាងរំលោភបណ្តាលឱ្យឈឺចាប់ស្រែកហៅឱ្យគេជួយ តែគ្មានអ្នកណាជួយទេ។ បន្តិចក្រោយមកឮប្រុសៗ៣នាក់ស្រែកថា បងរបស់នាងមកហើយ នាងបើកភួយមើលស្រាប់តែឃើញបងស្រីអើតមើលតាមជញ្ជាំងបន្ទប់។ ក្នុងស្ថានភាពបែបនោះនាងបានរត់ចេញទៅក្រៅបន្ទប់ដើរទៅផ្ទះ។ ក្មេងប្រុសឈ្មោះយឿន វណ្ណា ឆ្លើយសារភាពថា ឈ្មោះណាក់ អាយុ១៤ឆ្នាំ បានចាប់រំលោភនាង ចំណែករូបគេបានចាប់រំលោភតាមក្រោយ។ ពេលនោះប្អូនប្រុសជីដូនមួយមកទាន់ទើបគេឈប់។ រយៈពេលជិតមួយម៉ោងក្រោយមករូបគេត្រូវសមត្ថកិច្ចឃាត់ខ្លួន។ លោកវរសេនីយ៍ត្រី លឿង រដ្ឋា អធិការនគរបាលស្រុកតំបែរបញ្ជាក់ថា ក្មេងជំទង់ជាប់ចោទត្រូវបានកសាងសំណុំរឿងបញ្ជូនទៅកាន់សាលាដំបូងខេត្តហើយ៕
ចែករំលែកព័តមាននេះ