រាជធានីភ្នំពេញ ៖ ស្ត្រីវ័យចំណាស់ជាអ្នករើសអេតចាយម្នាក់បានដួលសន្លប់ដេកស្តូកស្តឹង បាត់ស្មារតីឈឹងនៅតាមផ្លូវ ខណៈដែលរូបគាត់ អូសរទេះអេតចាយរបស់គាត់មួយគ្រឿងតាមផ្លូវសុខៗ ហើយក៏ត្រូវបានប្រជាពលរដ្ឋដែលនៅក្បែរខាងបានប្រទះឃើញជួយ លើយកដាក់ទៅលើចិញ្ចើមផ្លូវ យកប្រេងកូឡាទៅលាបធ្វើចលនាប្របាច់គក់ទើបបានដឹងខ្លួនវិញ ទំនងជារូបគាត់រកលុយ ទិញបាយហូបមិនបាន។ ហេតុការណ៍នេះដែរបានកើតឡើងនៅវេលាម៉ោង៣រសៀល ថ្ងៃទី០៨ ខែសីហា ឆ្នាំ២០១៨ នៅចំណុចផ្លូវលេខ៤៨៤ កែងនឹងផ្លូវលេខ១០១ ក្នុងសង្កាត់ផ្សារដើមថ្កូវ ខណ្ឌចម្ការមន។
តាមប្រភពព័ត៌មានពីស្ត្រីម្នាក់បានប្រាប់ឱ្យដឹងថា ស្ត្រីអ្នករើសអេតចាយរងគ្រោះម្នាក់ខាងលើមានឈ្មោះ គាំ សុផល អាយុ៥៨ឆ្នាំ មុខរបររើសអេតចាយ មានប្តី និងកូនស្នាក់នៅផ្ទះជួលម្តុំខាងមុខ វិទ្យាល័យ បឹងត្របែក ក្នុងសង្កាត់ផ្សារដើមថ្កូវ ខណ្ឌចម្ការមន។ មុនពេលកើតហេតុ រូបគាត់ទើបតែបានចេញពីផ្ទះ ដើររើសអេតចាយដូចសព្វមួយដង លុះមកដល់ចំណុចកើតហេតុខាងលើ សុខៗក៏ស្រាប់តែដួលសន្លប់ បាត់ស្មារតីឈឹងតែម្តងតែម្តង។
តាមប្រភពដដែលបានប្រាប់បន្តទៀតថា ភ្លាមនោះពួកគាត់ដែលនៅ ក្បែរនោះក៏បានឃើញ និងនាំគ្នាស្ទុះទៅស្រវាចាប់លើករូបគាត់ដាក់អោយអង្គុយលើចិញ្ចើមផ្លូវ យកប្រេងកូឡាលាបរឹត និងធ្វើចលនាច្របាច់គក់មួយសន្ទុះទើបរូបគាត់បានដឹងខ្លួន និង និយាយរួចវិញ។ ពាក់ព័ន្ធទៅនឹងការដួលសន្លប់របស់ស្ត្រីវ័យចំណាស់អ្នករើសអេតចាយខាងលើនេះដែរ ត្រូវបានពួកគាត់លើកឡើងថា ៖ កើតឡើងដោយសារតែរូបគាត់រកលុយមិនបាន ដើម្បីយកទៅទិញបាយហូបទើបបណ្តាលឲ្យខ្យល់គ និងដួលសន្លប់បែប នេះ។
ក្រោយពេលកើតហេតុ កម្លាំងមានសមត្ថកិច្ចមូលដ្ឋានក៏បានចុះមកដល់កន្លែងកើតហេតុភ្លាមៗផងដែរ ដោយសារតែបាន ឃើញស្ត្រីរងគ្រោះបានដឹងខ្លួនវិញ និងមានអ្នកដែលរស់នៅក្បែរខាងស្គាល់គ្នានោះ ក៏បានធ្វើការផ្តាំផ្ញើ និង ឲ្យជូនដំណឹងទៅក្រុមគ្រួសារឲ្យមកទទួលរូបគាត់យកទៅផ្ទះវិញផងដែរ៕
https://www.youtube.com/watch?v=7mSdIqD3Oa8
ចែករំលែកព័តមាននេះ