ខេត្តត្បូងឃ្មុំ ៖ ដោយសារតែរឿងជំពាក់លុយមិនព្រមសង ទើបជនសង្ស័យបានយកដបទឹកបរិសុទ្ធច្រកសាំងហើយដុតឱ្យឆេះគប់ទៅលើស្ត្រីជាកម្មករសំណង់ម្នាក់កំពុងតែដេកក្នុងរោង បណ្តាលឱ្យរងរបួសរលាកខ្លួនប្រាណនៅក្នុងការដ្ឋានមួយកន្លែងក្នុងឃុំត្រពាំងផ្លុង ស្រុកពញាក្រែក ជាប់ព្រំដែនប្រទេសវៀតណាម ដោយស្ត្រីរងគ្រោះរលាកស្រែកយំហើយត្រូវបានអ្នកធ្វើការជាមួយជួយសង្គ្រោះនាំមកមន្ទីរពេទ្យបង្អែកស្រុកពញាក្រែក ចំណែកជនសង្ស័យវិញត្រូវបានសមត្ថកិច្ចឃាត់ខ្លួន។
សមត្ថកិច្ចមូលដ្ឋានប្រាប់ឲ្យដឹងនាល្ងាចថ្ងៃទី៣០ ខែធ្នូ ឆ្នាំ២០២៥ថា ជនរងគ្រោះនិងជនសង្ស័យបានមកស៊ីឈ្នួលគេនៅការដ្ឋានសំណង់មួយកន្លែងខាងលើហើយស្គាល់គ្នារហូតដល់ខ្ចីលុយចាយទៅវិញទៅមកតែមិនមានចំនួនច្រើននោះទេ ។
សមត្ថកិច្ចមូលដ្ឋានបន្តឲ្យដឹងទៀតថាហេតុការណ៍នេះបានកើតឡើងនៅកាលពីវេលាម៉ោង៤និង០៩នាទីល្ងាចថ្ងៃទី២៨ធ្នូ មានករណីប៉ុនប៉ងឃាតកម្ម (ដុតដបសាំង គប់ដុតមនុស្ស) កើតឡើងនៅត្រង់ចំណុចការដ្ឋានកំពុងសាងសង់ ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ។ភ្លាមៗនោះបានបង្កឲ្យមានការភ្ញាក់ផ្អើលនៅកន្លែងធ្វើការដល់កម្មករផ្សេងទៀតបាននាំគ្នាជួយជនរងគ្រោះដោយដឹកមកសង្គ្រោះនៅមន្ទីរពេទ្យបង្អែកស្រុកពញារក្រែក។
ក្រោយកើតហេតុកម្លាំងសមត្ថកិច្ចមូលដ្ឋានបានចុះទៅដល់គោលដៅធ្វើការឃាត់ជនសង្ស័យឈ្មោះសឿន ប៊ុនលី ភេទប្រុស អាយុ២៦ឆ្នាំ មានទីលំនៅភូមិទឹកល្អក់ ឃុំស្មោងខាងជើង ស្រុកកំចាយមារ ខេត្តព្រៃវែង ។ជនរងគ្រោះឈ្មោះជួប ពិសី ភេទស្រី អាយុ២៥ឆ្នាំ មានទីលំនៅភូមិ៤ ឃុំជប់ ស្រុកត្បូងឃ្មុំ ខេត្តត្បូងឃ្មុំ ។
ជនរងគ្រោះបានចេញពីមន្ទីរពេទ្យត្រឡប់មកផ្ទះនៅឃុំជប់ ដោយសារតែស្ថានភាពការរលាកនោះមិនធ្ងន់។ចំពោះរឿងលុយដែលជនរងគ្រោះជំពាក់ជនសង្ស័យ សមត្ថកិច្ចមិនបានប្រាប់ពីចំនួនប៉ុន្មាននោះទេតែគ្រាន់តែដឹងថាចំនួនលុយមិនច្រើននោះឡើយ។
បច្ចុប្បន្នជនល្មើសត្រូវបានឃាត់ខ្លួន និងវត្ថុតាងត្រូវបានដកហូត ដើម្បីបំពេញសំណុំរឿងបញ្ជូនទៅកាន់អយ្យការអមសាលាដំបូងខេត្តត្បូងឃ្មុំ ចាត់ការតាមនីតិវិធី ៕
ចែករំលែកព័តមាននេះ