ប្រទេសឥណ្ឌូណេស៊ី ៖ បើតាមអ្នកទទួលខុសត្រូវរដ្ឋាភិបាលម្នាក់បាននិយាយថា តុល្យការនៃគ្រោះរញ្ជួយដីកម្លាំង៦,៩រីស្ទ័រ ដែលកើតមានកាលពីថ្ងៃទី៥ សីហា នៅឥណ្ឌូណេស៊ី គិតមកទល់ថ្ងៃទី៧ សីហា នេះ ចំនួនអ្នកស្លាប់ឡើងដល់១០៥នាក់ ខណៈអ្នកទេសចរ៤.៦៣៦នាក់ ត្រូវបានជម្លៀសចេញពីកោះតូចៗ៣ ស្ថិតនៅក្បែរកោះ LOMBOKដែលកើតមានការរញ្ជួយដីនេះ។
លោកស៊ូតូប៉ូពួរ វ៉ូនូហ្គ្រោហូ អ្នកនាំពាក្យនៃទីភ្នាក់ងារជាតិគ្រប់គ្រងគ្រោះមហន្តរាយ ក៏បានគូសបញ្ជាក់ថា សរុបមនុស្ស២៣៦នាក់បានរងរបួស ដោយសារការរញ្ជួយដីនេះ។ ចំណែកអ្នកទេសចរទាំងអស់ត្រូវបានជម្លៀសចេញតាមសមុទ្រទៅកាន់កំពង់ផែនៅBANGSAL BENOA និង LEMBAR ដែលស្ថិតនៅក្បែរកោះទេសចរណ៍៣ នៃខេត្តNUSA TENGGARA ខាងលិច។ រីឯនាវា១១គ្រឿងត្រូវបានប្រមូលដើម្បីជួយទ្រទ្រង់ដល់ប្រតិបត្តិការជម្លៀសនោះ ហើយចំនួនជនរងគ្រោះនឹងកើនថែមទៀត ខណៈការជម្លៀសមនុស្សចេញនៅបន្ត។
ការរញ្ជួយដីនេះកើតមានឡើងកាលពីថ្ងៃទី៥ សីហា វេលាម៉ោង១៨និង៤៦នាទីម៉ោងក្នុងស្រុក។ ចំណុចកណ្ដាលរបស់វាស្ថិតនៅចម្ងាយ១៨គីឡូម៉ែត្រភាគពាយ័ព្យកោះLOMBOKក្នុងខេត្តNUSA TENGGARAខាងលិច។
ចែករំលែកព័តមាននេះ