ទីក្រុងឌុយបៃ៖ ប្រទេសអ៊ីរ៉ង់ចេញសេចក្ដីព្រមានធ្ងន់ៗកាលពីយប់មិញបន្ទាប់ពីនាវាដឹកប្រេងរបស់ខ្លួនមួយចំនួនរងការវាយប្រហារពីសំណាក់យោធាអាមេរិក។ ឆ្មាំបដិវត្តឥស្លាមប្រកាសថារាល់ការវាយប្រហារនាពេលអនាគតទៅលើនាវាដឹកប្រេង ឬនាវាដឹកទំនិញដទៃទៀតរបស់ខ្លួនអាចនឹងត្រូវអ៊ីរ៉ង់វាយប្រហារសងសឹកវិញយ៉ាងធ្ងន់ធ្ងរ។ អ៊ីរ៉ង់ថាខ្លួននឹងវាយប្រហារទៅលើមូលដ្ឋានយោធារបស់អាមេរិកនៅក្នុងតំបន់មជ្ឈិមបូព៌ា និងនាវារបស់ពួកសត្រូវ។ ទោះជាមានបញ្ហារកាំរកូសនឹងគ្នាយ៉ាងនេះក្ដី គេកត់សម្គាល់ថាបទឈប់បាញ់នៅជាធរមាននៅឡើយទេ។
ទូរទស្សន៍របស់រដ្ឋអ៊ីរ៉ង់ផ្សព្វផ្សាយអំពីសេចក្ដីព្រមានដូចខាងលើនេះមួយថ្ងៃបន្ទាប់ពីយោធាអាមេរិកវាយប្រហារនាវាដឹកប្រេង២គ្រឿងរបស់អ៊ីរ៉ង់ដែលព្យាយាមបើកចេញពីការបិទខ្ទប់។ ទន្ទឹមនឹងនោះ ប្រទេសបារ៉ែនដែលជាកន្លែងតាំងនៅនៃបញ្ជាការដ្ឋានកងទ័ពជើងទឹកអាមេរិកប្រចាំតំបន់មជ្ឈិមបូព៌ាថ្លែងថាខ្លួនចាប់ឃាត់ខ្លួនមនុស្សរាប់សិបនាក់ដែលសង្ស័យថាជាប់ពាក់ព័ន្ធនឹងឆ្មាំបដិវត្តឥស្លាម។ សម្រាប់ពេលនេះ ទីក្រុងវ៉ាស៊ីនតោនកំពុងរង់ចាំចម្លើយពីអ៊ីរ៉ង់បន្ទាប់ពីខ្លួនបានបញ្ជូនផែនការសន្តិភាព១៤ចំណុចទៅឱ្យអ៊ីរ៉ង់ពិនិត្យមើលដើម្បីបញ្ចប់សង្គ្រាម, ដើម្បីបើកច្រកសមុទ្រហ័រម៉ូសឡើងវិញ និងដើម្បីបិទបញ្ចប់កម្មវិធីនុយក្លេអ៊ែររបស់អ៊ីរ៉ង់។
ប្រធានាធិបតីរុស្ស៊ី លោកពូទីន ថ្លែងថាទីក្រុងម៉ូស្គូក៏បានដាក់ចេញនូវសំណើមួយដើម្បីដឹកជញ្ជូនសារធាតុអ៊ុយរ៉ាញ៉ូមដែលចម្រាញ់រួចហើយពីអ៊ីរ៉ង់ដើម្បីជួយដោះស្រាយបញ្ហា។ ប្រទេសបារ៉ែនអះអាងថាខ្លួនបានចាប់មនុស្ស៤១នាក់ដែលជាប់ពាក់ព័ន្ធនឹងឆ្មាំបដិវត្តឥស្លាមរបស់អ៊ីរ៉ង់។ ក្រសួងមហាផ្ទៃបារ៉ែនថ្លែងថាក្រោយពេលស៊ើបអង្កេតទៅឃើញថាពួកគេមានទំនាក់ទំនងជាមួយឆ្មាំបដិវត្តពិតប្រាកដមែន។ ក្រសួងអះអាងថាពួកគេ (អ្នកដែលត្រូវចាប់ខ្លួន) បានប្រមូលមូលនិធិ និងព្យាយាមផ្ញើទៅឱ្យឆ្មាំបដិវត្តដើម្បីគាំទ្រចលនាភេរវកម្មរបស់ពួកនេះ (ឆ្មាំបដិវត្ត)។
អ៊ីរ៉ង់បានចេញសេចក្ដីព្រមានទៅប្រទេសបារ៉ែនថាការដែលប្រទេសនេះចូលខាងក្រុមអាមេរិកអាចនឹងនាំទុក្ខដ៏ធ្ងន់ធ្ងរដាក់ខ្លួនជាមិនខាន។ ច្រកសមុទ្រហ័រម៉ូសមានសារសំខាន់ជាអាយុជីវិត។ ដូច្នេះ សូមអ្នកកុំប្រថុយបិទច្រកនេះដោយខ្លួនឯង។ ខាងលើនេះជាការព្រមានរបស់លោកអេប្រាហ៊ីម អាហ្ស៊ីហ្ស៊ី (Ebrahinm Azizi) ជាប្រធានគណៈកម្មការនៃរដ្ឋសភាអ៊ីរ៉ង់ទទួលបន្ទុកខាងសន្តិសុខជាតិ។ លោកបានបង្ហោះសារដូចខាងលើនេះនៅលើបណ្ដាញសង្គម៕ ប្រភព៖ អេភី និងប្រភពដទៃទៀត
ចែករំលែកព័តមាននេះ