រាជធានីភ្នំពេញ ៖ លោកសាស្ត្រាចារ្យ Pierre Andre Lablaude ជនជាតិបារាំងអ្នកជំនាញ Adhoc ផ្នែកអភិរក្ស ដែលបានដើរតួនាទីនេះចាប់ពីវិនាទីដំបូងដែលរមណីយដ្ឋានអង្គរត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោក ពោលតាំងពីឆ្នាំ១៩៩២មក បានទទួលមរណភាពហើយ ។
លោកសាស្ត្រាចារ្យ Pierre Andre Lablaude មានភាពប៉ិនប្រសប់ប្រកបដោយសមត្ថភាពវិជ្ជាជីវៈ បានបង្ហាញយ៉ាងជាក់ច្បាស់តាមរយៈសកម្មភាពរបស់គាត់នៅតាមទីតាំងផ្ទាល់ និងនៅក្នុងអនុសាសន៍បច្ចេកទេសនានា ។
លោកជំទាវភឿង សកុណា ក្នុងនាមរដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរាបានផ្ញើសាររំលែកទុក្ខកាលពីថ្ងៃទី២៨ កក្កដា ២០១៨ចំពោះក្រុមគ្រួសាររបស់លោកសាស្ត្រាចារ្យ Lablaude ។ លោកជំទាវរដ្ឋមន្ត្រីបានរំលឹកពីការចងចាំយ៉ាងជាក់ច្បាស់ពីបទអន្តរាគមន៍ដ៏គួរឱ្យកត់សម្គាល់នានា របស់លោកសាស្ត្រាចារ្យ ក្នុងដំណើរពិភាក្សានៃកិច្ចប្រជុំនានារបស់គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា សេអ៊ីសេ «CIC» ។ ការលះបង់របស់គាត់គឺជាគំរូដ៏ល្អ ហើយគុណសម្បត្តិមនុស្សជាតិ និងសមត្ថភាព វិជ្ជាជីវៈនានារបស់គាត់នឹងធ្វើឱ្យយើងទាំងអស់គ្នាចងចាំមិនអាចបំភ្លេចបាន ។
លោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈថ្លែងថា«លោកសាស្ត្រាចារ្យ Pierre Andre Lablaude គឺជាសសរស្តម្ភមួយចាប់តាំងពីបង្កើតសេអុីសេអង្គរ ហើយការបាត់បង់លោកសាស្ត្រាចារ្យ គឺប្រៀបដូចជាការចាកចេញពីយើងខ្ញុំនូវទំព័រប្រវត្តិសាស្ត្រអង្គរដ៏ធំមួយ ។ ទោះជាយ៉ាងណាក៏ដោយ តាមរយៈស្នាដៃការងារនានា លោកសាស្ត្រាចារ្យទុកឱ្យយើងទាំងអស់គ្នានូវកេរដំណែលមួយ មិនអាចកាត់ថ្លៃបាន ហើយនឹងក្លាយជាប្រយោជន៍ដ៏សំខាន់សម្រាប់អ្នកស្រាវជ្រាវជំនាន់ក្រោយរបស់កម្ពុជា និងអន្តរជាតិជាច្រើននាក់ទៀតនាពេលអនាគត ។
ព្រះរាជាណាចក្រកម្ពុជានឹងបន្តនូវការដឹងគុណជានិច្ចនិរន្តរ៍ សម្រាប់ការបូជាកាយចិត្តដ៏ខ្លាំងក្លារបស់លោកសាស្ត្រាចារ្យ ដើម្បីបុព្វហេតុនៃចំណេះដឹងនៃការគាំពារ និងការការពារបេតិកភណ្ឌអង្គរ »។
ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី១ សីហា បានផ្ញើព្រះរាជសារជូនលោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានគណៈកម្មការជាតិយូណេស្កូកម្ពុជា។ ព្រះរាជសារបានថ្លែងអំណរគុណចំពោះលោកជំទាវរដ្ឋមន្ត្រី ដែលបានថ្វាយនូវលិខិតស្តីអំពីដំណឹងមរណភាពរបស់លោកសាស្ត្រាចារ្យ Pierre-André Lablaude ។
ព្រះរាជសារសម្តេចព្រះបរមនាថ នរោត្តម សីហមុនី មានខ្លឹមសារថា «ខ្ញុំសូមចូលរួមរំលែកមរណទុក្ខដ៏មហាក្រៀមក្រំក្រៃលែងជាមួយគ្រួសាររបស់លោកសាស្ត្រាចារ្យ ដែលបានទទួលមរណភាពកាលពីថ្ងៃទី២៨ កក្កដា ឆ្នាំ២០១៨ ។
ខ្ញុំសូមសម្តែងនូវការសោកស្តាយចំពោះការបាត់បង់លោកសាស្ត្រាចារ្យ Pierre-André Lablaude ដែលបានបំពេញបេសកកម្មអន្តរជាតិដ៏វិសេសវិសាល ចាប់តាំងពីរមណីយដ្ឋានអង្គរ ត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោកនៅឆ្នាំ១៩៩២ ។
ការចំណាយពេលវេលាអស់ជិត៣ទសវត្សរ៍របស់លោកសាស្ត្រាចារ្យ ចំពោះដំណើរការអភិរក្ស និងអភិវឌ្ឍរមណីយដ្ឋានប្រវត្តិសាស្ត្រអង្គរ បានបន្សល់ទុកនូវស្នាដៃជាច្រើនដល់ប្រជាជនកម្ពុជា និងដល់អ្នកសិក្សាស្រាវជ្រាវជំនាន់ក្រោយទាំងជាតិ និងអន្តរជាតិ ដែលជាកេរដំណែលដ៏ឧត្តុង្គឧត្តម្ភប្រកបដោយវិជ្ជាជីវៈ និងសមត្ថភាពដ៏ខ្លាំងក្លា ជាគំរូដ៏ល្អមានគុណប្រយោជន៍សម្រាប់ប្រជាជនកម្ពុជា និងអន្តរជាតិ។ ប្រជាជនកម្ពុជាចងចាំជានិច្ចនូវគុណបំណាច់និងស្នាដៃមិនអាចកាត់ថ្លៃបានរបស់លោកសាស្ត្រាចារ្យជារៀងរហូត» ៕
ចែករំលែកព័តមាននេះ