រាជធានីភ្នំពេញ ៖ អត្តពលិកកីឡាទាញព្រ័ត្រកម្ពុជាចំនួន២៨នាក់ត្រូវបានបញ្ជូនឱ្យទៅចូលរួមប្រកួតពានរង្វាន់វិទ្យាល័យលើកទី២នៅខេត្តណាខនប៉ាធំ ប្រទេសថៃ កាលពីថ្ងៃទី១ សីហា កន្លងមកនេះ ។ កញ្ញា មាស…
រាជធានីភ្នំពេញ ៖ អត្តពលិកកីឡាទាញព្រ័ត្រកម្ពុជាចំនួន២៨នាក់ត្រូវបានបញ្ជូនឱ្យទៅចូលរួមប្រកួតពានរង្វាន់វិទ្យាល័យលើកទី២នៅខេត្តណាខនប៉ាធំ ប្រទេសថៃ កាលពីថ្ងៃទី១ សីហា កន្លងមកនេះ ។
កញ្ញា មាស តឿ មន្ត្រីសហព័ន្ធកីឡាទាញព្រ័ត្រកម្ពុជាបានឱ្យដឹងថា នេះជាលើកទី២ហើយក្នុងឆ្នាំ២០១៨ ដែលសហព័ន្ធបានបញ្ជូនប្រតិភូកីឡារបស់ខ្លួនឱ្យទៅចូលរួមប្រកួតក្នុងព្រឹត្តិការណ៍កីឡាទាញព្រ័ត្រពានរង្វាន់វិទ្យាល័យលើកទី២ក្នុងប្រភេទអាយុក្រោម១៧ឆ្នាំ ដែលដឹកនាំដោយកញ្ញា សួង ចាន់តូរ៉ាទី ។
កញ្ញាបានឱ្យដឹងបន្ថែមថា សម្រាប់ការប្រកួតលើកទី១ធ្វើឡើងកាលពីថ្ងៃទី២៩ មិថុនា ដល់ថ្ងៃទី១ កក្កដា នៅខេត្តឈុនបូរី ដែលមានប្រទេសចំនួន៤ចូលរួមគឺ ថៃ ឡាវ វៀតណាម និងកម្ពុជា ដែលកាលនោះកម្ពុជាជាប់ចំណាត់ថ្នាក់ត្រឹមតែលេខ៣ប៉ុណ្ណោះ ។
ដោយឡែក សម្រាប់ការទៅចូលរួមប្រកួតលើកនេះគឺនៅក្នុងខេត្តណាកនប៉ាធំ ចាប់ពីថ្ងៃទី២ ដល់ថ្ងៃទី៥ សីហា ឆ្នាំ២០១៨ ដោយមានប្រទេសច្រើនជាងមុនចូលរួមអាចបន្ថែមប្រទេសមីយ៉ាន់ម៉ាមួយទៀត ។ ចំណែកវិញ្ញាសាដែលត្រូវប្រកួតវិញនោះមានផ្នែកបុរស
ទម្ងន់៤៨០គីឡូក្រាម និងនារីទម្ងន់៤៤០គីឡូក្រាម ។ តាមការឱ្យដឹងបន្ថែម ការទៅចូលរួមប្រកួតលើកនេះសហព័ន្ធជាអ្នកចំណាយលើការចាយវាយ ធ្វើដំណើរ និងហូបចុកតាមផ្លូវ រីឯការស្នាក់នៅ និងហូបចុកនៅពេលប្រកួតគឺប្រទេសថៃគេជាអ្នករ៉ាប់រងទាំងអស់ ។
មន្ត្រីសហព័ន្ធដដែលបានឱ្យដឹងបន្តថា សហព័ន្ធកីឡាទាញព្រ័ត្រកម្ពុជាទើបតែបង្កើតឡើងបានជាង១ឆ្នាំប៉ុណ្ណោះ ប៉ុន្តែទទួលបានការចាប់អារម្មណ៍យ៉ាងខ្លាំង ។
មិនតែប៉ុណ្ណោះទោះបីសហព័ន្ធមិនសូវមានថវិកាសម្រាប់ទ្រទ្រង់សកម្មភាពរបស់ខ្លួនយ៉ាងណាក៏ដោយ ក៏សហព័ន្ធខិតខំស្វែងរកគ្រប់វិធីដើម្បីបញ្ជូនអត្តពលិករបស់ខ្លួនទៅចូលរួមប្រកួតនៅក្រៅប្រទេសជាញឹកញាប់ដើម្បីស្វែងរកបទពិសោធន៍បន្ថែមទៀត ។
ជាក់ស្ដែងសម្រាប់ការទៅចូលរួមប្រកួតលើកនេះទោះបីមិនទាន់ដឹងលទ្ធផលយ៉ាងណាក៏ដោយ ប៉ុន្តែអ្វីដែលជាការរំពឹងទុកនោះនឹងផ្ដល់មកវិញនូវបទពិសោធន៍ល្អៗដល់កីឡាករ-កីឡាការិនីទាញព្រ័ត្រកម្ពុជាក្នុងការពង្រឹងសមត្ថភាពបន្ថែម ទៀត ៕
ចែករំលែកព័តមាននេះ