រាជធានីភ្នំពេញ ៖ ការដាក់ឲ្យដំណើរការគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ កាលពីចុងឆ្នាំ២០១៥ បាននិងកំពុងជំរុញ និងពន្លឿនចក្ខុវិស័យរបស់រាជរដ្ឋាភិបាល តាមរយៈការរៀបចំឲ្យតំបន់ស្ថិតនៅស្របតាមផ្លូវជាតិលេខ៤ ពីរាជធានីភ្នំពេញដល់ខេត្តព្រះសីហនុ ជាតំបន់ឧស្សាហកម្ម ខណៈបច្ចុប្បន្ន ការតភ្ជាប់រវាងរាជធានីភ្នំពេញ និងទីរួមខេត្តកំពង់ស្ពឺ ត្រូវបានបញ្ចប់រួចរាល់ និងកំពុងបន្តតភ្ជាប់ជាមួយខេត្តព្រះសីហនុ ដែលជាខេត្តកំពុងមានការរីកចម្រើនលឿន ។
ស្របពេលជាមួយគ្នានេះ ធនាគារពិភពលោកក៏បានផ្ដល់ឥណទាន១១០លានដុល្លារ សម្រាប់ផែនការពង្រីកផ្លូវនេះពីទំហំ៧ម៉ែត្រ ដល់១១ម៉ែត្រនាពេលខាងមុខផងដែរ ។
បើតាមលោកទេសរដ្ឋមន្ត្រី ស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា រាជរដ្ឋាភិបាលនឹងរៀបចំស្ថាបនាឡើងវិញ និងពង្រីកផ្លូវជាតិលេខ៤ នាពេលខាងមុខនេះ ដើម្បីសម្រួលការដឹកជញ្ជូន ពិសេស ជួយធ្វើឲ្យតំបន់លិចទឹកជំនន់នាតំបន់ស្ទឹងសំរោង និងស្ទឹងអូរគគីរ ស្ថិតក្នុងស្រុកកំពង់សិលា មិនប្រឈមនឹងការលិចទឹកជាថ្មី ។ ជាមួយគ្នានេះ ការសាងសង់ផ្លូវល្បឿនលឿនពីរាជធានីភ្នំពេញទៅកាន់ខេត្តព្រះសីហនុ នឹងបើកការដ្ឋានសាងសង់នៅកំឡុងខែវិច្ឆិកាខាងមុខផងដែរ ។
ទីប្រឹក្សារាជរដ្ឋាភិបាលកម្ពុជា លោកបណ្ឌិត សុក ស៊ីផាន់ណា បានថ្លែងថា តាមផែនការនិងគោលនយោបាយរបស់រាជរដ្ឋាភិបាល តំបន់ផ្លូវជាតិលេខ៤ពីរាជធានីភ្នំពេញ ទៅកាន់ខេត្តព្រះសីហនុ នឹងក្លាយជាតំបន់ឧស្សាហកម្ម ដោយសារខេត្តព្រះសីហនុ ជាខេត្តពិសេសមួយ ដែលរាជរដ្ឋាភិបាលបានដាក់បញ្ចូលជាតំបន់ឧស្សាហកម្មពិសេស ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥។
លោកបន្តថា ៖« ខេត្តព្រះសីហនុ នឹងក្លាយជាប៉ូលសេដ្ឋកិច្ចធំទី២ បន្ទាប់ពីរាជធានីភ្នំពេញ ដោយសារសក្តានុពលជាច្រើន ដែលបានធ្វើឲ្យខេត្តនេះកំពុងមានភាពរីកចម្រើនយ៉ាងលឿន »។ ខេត្តព្រះសីហនុមានសក្តានុពលសំខាន់ៗជាច្រើន ដូចជា ទី១ មានកំពង់ផែទឹកជ្រៅតែមួយគត់នៅកម្ពុជា ។ ទី២ មានការតភ្ជាប់បណ្តាញផ្លូវដែក ។ ទី៣ មានព្រលានយន្តហោះលំដាប់អន្តរជាតិ ដែលបាននិងកំពុងពង្រីក ។ ទី៤ មានការសាងសង់ផ្លូវល្បឿនលឿនជាលើកទី១ រវាងរាជធានីភ្នំពេញនិងខេត្តនេះ និងទី៥ មានឆ្នេរដ៏ស្រស់ស្អាត ដែលបានធ្វើឲ្យខេត្តនេះក្លាយជាតំបន់ទេសចរណ៍ដ៏មានសក្តានុពល ។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សុរិយា បានថ្លែងថា ក្នុងដំណាក់កាលអភិវឌ្ឍន៍សេដ្ឋកិច្ច រាជរដ្ឋាភិបាលត្រូវចំណាយធនធានជាច្រើនទៀត ដើម្បីពង្រីក ក៏ដូចជាកសាងហេដ្ឋារចនាសម្ព័ន្ធជាច្រើន ដើម្បីពន្លឿនការអភិវឌ្ឍ និងលើកស្ទួយកំណើនសេដ្ឋកិច្ចជាតិ ។
លោកបន្តថា ៖« ដើម្បីឲ្យសេដ្ឋកិច្ចកម្ពុជាកាន់តែរីកចម្រើនថែមទៀត កម្ពុជាត្រូវការកសាងហេដ្ឋារចនាសម្ព័ន្ធ ដើម្បីរុញសេដ្ឋកិច្ចកម្ពុជាទៅកាន់លំដាប់ថ្មី » ។ រាជរដ្ឋាភិបាលបានកំណត់យុទ្ធសាស្ត្រក្នុងការអភិវឌ្ឍខេត្តព្រះសីហនុ ឲ្យក្លាយជាតំបន់សេដ្ឋកិច្ចពិសេសពហុបំណងគ្រប់គ្រងដោយរដ្ឋបាលពិសេស ហើយនៅចុងឆ្នាំ២០១៨នេះ ខេត្តព្រះសីហនុ នឹងបង្កើតក្រុងមួយទៀត គឺទីក្រុងកោះរ៉ុង (ក្រុងកោះរ៉ុង) ដើម្បីគ្រប់គ្រងភ្ញៀវទេសចររាប់លាននាក់ និងទិសដៅអភិវឌ្ឍន៍ប្រកបដោយនិរន្តរភាព ។ ទន្ទឹមនឹងនេះ ខេត្តព្រះសីហនុ នឹងក្លាយទៅជាក្បាលនាគសេដ្ឋកិច្ចនៃព្រះរាជាណាចក្រកម្ពុជា ៕
ចែករំលែកព័តមាននេះ