ប្រទេសកូរ៉េទាំង២ ៖ បណ្ដាអ្នកទទួលខុសត្រូវយោធារបស់កូរ៉េទាំង២ បានជួបប្រជុំគ្នាកាលពីថ្ងៃទី៣១ ខែកក្កដា ប៉ុនប៉ងសម្រាលភាពតានតឹងនៅឧបទ្វីបកូរ៉េ ខណៈសហរដ្ឋអាមេរិកព្រួយបារម្ភពីការបន្ត សកម្មភាពនុយក្លេអ៊ែរនិងបាលីស្ទិករបស់ក្រុងព្យុងយ៉ាង។
ការជួបគ្នានោះជាលើកទី២ ចាប់តាំងពីខែមុនមក ប្រព្រឹត្តទៅនៅភូមិប៉ានមុនហ្សូម ស្ថិតនៅខ្សែបន្ទាត់ព្រំដែនរវាងកូរ៉េទាំង២។ ការជួបប្រជុំគ្នានេះស្ថិតក្នុងក្របខ័ណ្ឌនៃការជម្រុញឲ្យមានភាពធូរស្រាល ដែលប្រធានាធិបតីកូរ៉េខាងត្បូងលោក MOON JAE IN និងមេដឹកនាំកូរ៉េខាងជើងលោកគីមជុង អ៊ុន បានសន្យាពេលជួបគ្នាកំពូលកាលពីខែមេសា ដើម្បីបញ្ចប់រាល់អំពើប្រទូស្តរ៉ាយរវាងប្រទេសទាំង២។
ក្រោយការពិភាក្សាគ្នានាថ្ងៃទី៣១ កក្កដា អ្នកទទួលខុសត្រូវម្នាក់នៃក្រសួងការពារប្រទេសកូរ៉េខាងត្បូងទទួលបន្ទុកខាងទំនាក់ទំនងជាមួយកូរ៉េខាងជើង លោក KIM DO GYUN ថ្លែងថា ក្រុងសេអ៊ូល ចង់ឲ្យមានវិធានការនានាបន្ថែមទៀត ដើម្បីបង្កើតការជឿទុកចិត្តគ្នា។
ចំណែកអ្នកទទួលខុសត្រូវអាមេរិកម្នាក់ ថ្លែងប្រាប់រ៉យទ័រកាលពីថ្ងៃទី៣០ កក្កដាថា ភ្នាក់ងារស៊ើបការណ៍ចាប់ឃើញសញ្ញានានានៃសកម្មភាពក្នុងរោងចក្រយោធាកូរ៉េខាងជើងមួយ ជាកន្លែងផលិតមីស៊ីលដំបូងៗអាចបាញ់ដល់ដែនដីអាមេរិក។
អ្នកទទួលខុសត្រូវរូបនេះដែលអះអាងព័ត៌មានរបស់កាសែតវ៉ាស៊ិនតោនប៉ុស្តិ៍ បន្តថាក្រុងវ៉ាស៊ិនតោនសង្ស័យក្រុងព្យុងយ៉ាង ចង់ផលិតមីស៊ីលបាលីស្ទិករំលងទ្វីបធុន HWASONG-15 អាចបាញ់បានចម្ងាយ១៣.០០០គីឡូម៉ែត្រមួយគ្រាប់ ឬច្រើនគ្រាប់។ ការផលិតនេះអាចកំពុងធ្វើក្នុងរោងចក្រ SANUMBDONG ជិតក្រុងព្យុងយ៉ាង។
កាលពីសប្ដាហ៍មុនរដ្ឋមន្ត្រីការបរទេសអាមេរិកលោក MIKE POMPEO ធ្លាប់ទទួលស្គាល់ក្នុងពេលសវនាការមួយក្នុងសភាថា កូរ៉េខាងជើងបន្តផលិតប្រេងឥន្ធនៈសម្រាប់អាវុធបរមាណូ៕
ចែករំលែកព័តមាននេះ