ទីក្រុងហាណូយ៖ បុរសជនជាតិវៀតណាមម្នាក់វ័យ៥៩ឆ្នាំប៊ិះស្លាប់ដោយសារមេរោគដ៏កាចសាហាវមួយប្រភេទ។ គាត់បានចុះងូតទឹកសមុទ្រ ចៃដន្យបានឆ្លងបាក់តេរីដ៏កម្រមួយប្រភេទឈ្មោះវីប៊្រីយ៉ូ វុលនីហ្វ៊ីគូស (Vibrio vulnificus) ជាប្រភេទបាក់តេរីស៊ីសាច់ឆៅជាអាហារ។ ពួកវាច្រើនរស់នៅក្នុងទឹកប្រៃ។ ក្រោយកើតមានករណីនេះ…
ទីក្រុងហាណូយ៖ បុរសជនជាតិវៀតណាមម្នាក់វ័យ៥៩ឆ្នាំប៊ិះស្លាប់ដោយសារមេរោគដ៏កាចសាហាវមួយប្រភេទ។ គាត់បានចុះងូតទឹកសមុទ្រ ចៃដន្យបានឆ្លងបាក់តេរីដ៏កម្រមួយប្រភេទឈ្មោះវីប៊្រីយ៉ូ វុលនីហ្វ៊ីគូស (Vibrio vulnificus) ជាប្រភេទបាក់តេរីស៊ីសាច់ឆៅជាអាហារ។ ពួកវាច្រើនរស់នៅក្នុងទឹកប្រៃ។ ក្រោយកើតមានករណីនេះ គ្រូពេទ្យវៀតណាមអំពាវនាវឱ្យប្រជាជនដែលចង់ទៅលេងសមុទ្រនៅរដូវក្ដៅឆ្នាំនេះសូមមេត្តាប្រុងប្រយ័ត្ន។
បន្ទាប់ពីទទួលការជួយសង្គ្រោះពីគ្រូពេទ្យ ឥឡូវនេះ បុរសដែលឆ្លងបាក់តេរីកំណាចនោះបានធូរស្បើយបន្តិចហើយ។ គ្រូពេទ្យប្រាប់ថាជនរងគ្រោះរូបនេះបានទទួលការវះកាត់ទាន់ពេលវេលានៅមន្ទីរពេទ្យបាក់ម៉ាយ (Bach Mai Hospital) នៃទីក្រុងហាណូយ។ មន្ទីរពេទ្យប្រាប់ថាអ្នកជំងឺម្នាក់នេះត្រូវសត្វទិចចំភ្លៅរបស់គាត់នៅពេលគាត់ហែលទឹកសមុទ្រ។ រយៈពេល១៥ម៉ោងក្រោយមក កន្លែងទិចនោះចាប់ផ្ដើមហើម ឡើងពណ៌ក្រហម និងឈឺចុកចាប់យ៉ាងខ្លាំង។
បន្ទាប់ពីមានអាការៈមិនស្រួលដូចនេះ គាត់ក៏ប្រញាប់ទៅរកគ្រូពេទ្យ និងត្រូវគេបញ្ជូនបន្តទៅមន្ទីរពេទ្យបាក់ម៉ាយដើម្បីសង្គ្រោះបន្ទាន់។ លោកវេជ្ជបណ្ឌិតង្វៀនហ៊ុយទៀន (Nguyen Huy Tien) ប្រាប់ថាមិនដល់២៤ម៉ោងផង បាក់តេរីបានធ្វើឱ្យខូចជាលិកាដ៏ជ្រៅ និងបានជ្រៀតចូលទៅក្នុងចរន្តឈាមជាហេតុធ្វើឱ្យអ្នកជំងឺធ្លាក់ចុះសម្ពាធឈាមស្ទើរដាច់ខ្យល់ស្លាប់។
កត្តាមួយចំនួនទៀតដែលអ្នកជំងឺមានស្រាប់តាំងពីមុនការឆ្លងបាក់តេរីនោះមានដូចជាជំងឺឈឺសន្លាក់ (ដោយសារលើសអាស៊ីដអ៊ុយរិច), លើសសម្ពាធឈាម និងប្រព័ន្ធការពារខ្លួនចុះខ្សោយ។ កត្តាទាំងនេះធ្វើឱ្យស្ថានភាពជំងឺថ្មីរបស់គាត់ដោយសារបាក់តេរីឆ្លងនេះកាន់តែចុះដុនដាបយ៉ាងឆាប់រហ័ស។ គាត់ចាប់ផ្ដើមមានបញ្ហាផ្លូវដង្ហើម, សម្ពាធឈាមធ្លាក់ចុះ និងមុខងារតម្រងនោមថយចុះ។ ដូចនេះ គ្រូពេទ្យត្រូវដាក់បំពង់អុកស៊ីហ្សែន, ចាក់ថ្នាំ និងប្រើម៉ាស៊ីនចម្រោះជាតិពុលពីក្នុងឈាម។
លទ្ធផលពិសោធឈាមបង្ហាញថាគាត់បានឆ្លងបាក់តេរីឈ្មោះវីប្រ៊ីយ៉ូ វុលនីហ្វ៊ីគូស (Vibrio vulnificus) ដែលរស់នៅក្នុងទឹកសមុទ្រ ហើយរីកដុះដាលខ្លាំងនៅរដូវក្ដៅ។ ថ្វីដ្បិតវាជាករណីកម្រ ប៉ុន្តែបើវាឆ្លងចូលទៅក្នុងខ្លួនរបស់មនុស្សវាវិវត្តលឿនណាស់។ ត្រឹមតែមួយប៉ប្រិចភ្នែកប៉ុណ្ណោះ វាឆ្លងចូលដល់ខួរក្បាល, ធ្វើឱ្យសម្ពាធឈាមធ្លាក់ចុះខ្លាំង និងបណ្ដាលឱ្យស្លាប់បើគ្មានការធ្វើអន្តរាគមន៍ជាបន្ទាន់ទេ។ ខាងលើនេះជាការដកស្រង់ប្រភពពីវៀតណាមអ៊ិចប្រែស (Vietnam Express)៕
ចែករំលែកព័តមាននេះ