ទីក្រុងប៉ារីស៖ ភ្លើងឆេះព្រៃដ៏ធំមិនធ្លាប់មាននៅប្រទេសបារាំងនារយៈពេលរាប់ទសវត្សចុងក្រោយនេះនៅទីបំផុតអាចគ្រប់គ្រងបានហើយ។ ប៉ុន្តែទម្រាំទប់ស្កាត់បាន ភ្លើងបានសម្លាប់មនុស្សម្នាក់, ដុតបំផ្លាញព្រៃឈើរាប់ពាន់ហិចតារ និងដុតបំផ្លាញផ្ទះរាប់សិបខ្នងនៅភាគខាងត្បូង។ អាជ្ញាធរប្រើប្រាស់ភ្នាក់ងារពន្លត់អគ្គិភ័យ២ពាន់នាក់នៅតំបន់អូដ្ឋ (Aude) ភាគខាងជើងប្រទេសបារាំងដើម្បីទប់ទល់នឹងការឆេះរាលដាលដែលចាប់ផ្ដើមកាលពីថ្ងៃអង្គារ និងបណ្ដាលឱ្យមនុស្ស១៣នាក់រងរបួស។
អាជ្ញាធរអះអាងថានេះជាភ្លើងឆេះព្រៃដ៏អាក្រក់បំផុតនៅក្នុងរយៈពេលយ៉ាងតិច៥០ឆ្នាំចុងក្រោយនៅប្រទេសបារំាងប៉ែកខាងជាប់សមុទ្រមេឌីទែរ៉ាណេ។ អគ្គលេខាធិការតំបន់អូដ្ឋ លោកស្រីលូស៊ីរ៉ូស (Lucie Roesch) ថ្លែងថាភ្លើងឆេះព្រៃនេះអាចទប់ស្កាត់បានហើយ។ សេចក្ដីប្រកាសនេះកើតឡើងបន្ទាប់ពីអាជ្ញាធរនៅអេស្ប៉ាញប្រកាសកាលពីល្ងាចថ្ងៃពុធថាភ្លើងឆេះព្រៃក្បែរទីក្រុងទេសចរណ៍តារីហ្វា (Tarifa) ក៏ទប់ស្កាត់បានដូចគ្នា។ ភ្លើងឆេះព្រៃនេះបង្ខំឱ្យមនុស្សជម្លៀសខ្លួនជាច្រើននាក់។
ក្រុមអ្នកពន្លត់អគ្គិភ័យនៅតំបន់អូដ្ឋចាត់ទុកថាវាជាកិច្ចការធម្មតាទៅហើយសម្រាប់ពួកគេ។ គ្រាន់តែថាលើកនេះរាងហត់នឿយជាងរាល់ដង។ ពួកគេត្រូវចំណាយពេលពេញមួយថ្ងៃដើម្បីពន្លត់ភ្លើងដែលនៅសេសសល់។ ប្រធានផ្នែកពន្លត់អគ្គិភ័យប្រចាំតំបន់អូដ្ឋ លោកគ្រីសស្តូហ្វ ម៉ាកនី (Christophe Magny) ប្រាប់ថាគោលដៅរបស់យើងគឺត្រូវទប់ស្កាត់មិនឱ្យភ្លើងឆេះរាលដាលតទៅទៀត។
កាលពីយប់មិញ ភ្លើងរីករាលដាលដោយយឺតៗឆ្ងាយណាស់បើប្រៀបធៀបនឹងពេលឆេះរាលដាលដំបូងៗ។ កាលនោះ ត្រឹមតែរយៈពេលមួយម៉ោង ភ្លើងដុតបំផ្លាញព្រៃអស់មួយពាន់ហិចតារ។ ឥឡូវនេះ អាកាសធាតុអំណោយផលគ្រាន់បើ មិនដូចកាលពីប៉ុន្មានថ្ងៃមុន ខ្យល់បក់ខ្លាំង និងដូរទិសដៅម្ដងទៅនេះ ម្ដងទៅនោះដែលធ្វើឱ្យភ្លើងឆេះរាលដាលទៅគ្រប់ជ្រុងទាំងអស់។
ទោះបីទប់ស្កាត់បានក៏ដោយ អាជ្ញាធរត្រូវការពេលជាច្រើនថ្ងៃទៅមុខទៀតដើម្បីប្រកាសថាភ្លើងឆេះព្រៃលើកនេះអាចពន្លត់បានទាំងស្រុង។ នេះបើយោងតាមលោកគ្រីសត្យង់ ពូហ្សេ (Christian Pouget) ជាប្រធានខុទ្ទកាល័យប្រចាំតំបន់អូដ្ឋ។ លោកថ្លែងថាមានកិច្ចការជាច្រើនទៀតដែលត្រូវធ្វើ។ ជនរងគ្រោះដែលស្លាប់ជាស្ត្រីវ័យ៦៥ឆ្នាំដែលស្ដាយផ្ទះរបស់គាត់ និងមិនព្រមចាកចេញតាមការអំពាវនាវរបស់អាជ្ញាធរទេ។ ខាងលើនេះជាការដកស្រង់ប្រភពពីហ្វ្រង់២៤ (France 24)៕
ចែករំលែកព័តមាននេះ