ទីក្រុងបាងកក៖ ថ្ងៃនេះ យោធាថៃអះអាងថាទាហានរបស់ខ្លួនបីនាក់ត្រូវរបួសនៅពេលពួកគេដើរល្បាតនៅតាមព្រំដែន និងជាន់មីនមួយគ្រាប់។ ក្នុងនោះ ទាហានម្នាក់ដាច់ជើង និង២នាក់ទៀតត្រូវរបួស។ យោងតាមប្រភពពីឆេនណល ញូ អេស៊ា…
ទីក្រុងបាងកក៖ ថ្ងៃនេះ យោធាថៃអះអាងថាទាហានរបស់ខ្លួនបីនាក់ត្រូវរបួសនៅពេលពួកគេដើរល្បាតនៅតាមព្រំដែន និងជាន់មីនមួយគ្រាប់។ ក្នុងនោះ ទាហានម្នាក់ដាច់ជើង និង២នាក់ទៀតត្រូវរបួស។ យោងតាមប្រភពពីឆេនណល ញូ អេស៊ា (Channel News Asia) ទាហានម្នាក់ដាច់កជើង, ម្នាក់ត្រូវរបួសដៃ និងខ្នង និងម្នាក់ទៀតរហែកក្រដាសត្រចៀក។
ទីភ្នាក់ងារព័ត៌មានរ៉យទ័របានដកស្រង់ប្រភពពីយោធាថៃមកផ្សាយថាទាហានថៃបានដើរល្បាតនៅលើទីតាំងចន្លោះព្រំដែនខេត្តស៊ីសាកេត និងខេត្តព្រះវិហារកាលពីព្រឹកថ្ងៃសៅរ៍។ យោធាថៃថ្លែងបន្តទៀតថាទាហានដែលត្រូវរបួសទាំងបីនាក់នោះកំពុងទទួលការព្យាបាលនៅក្នុងមន្ទីរពេទ្យមួយកន្លែង។ ទាហានទាំងបីនាក់មកពីកងពលតូចថ្មើរជើងលេខ១១១។
ពួកគេដើរត្រួតពិនិត្យមើលសន្តិសុខដើម្បីដាក់រាយលួសបន្លា។ រំពេចនោះគ្នារបស់ពួកគេម្នាក់ដើរសុខៗក៏ជាន់មីនមួយគ្រាប់នៅវេលាម៉ោង១០ព្រឹក។ ដំណឹងនេះបានលេចឮដល់នាយករដ្ឋមន្ត្រីស្ដីទីថៃ លោកភូមិថាមវិឆាយ៉ាឆៃរួចហើយ។ លោកថាហេតុការណ៍នេះកើតឡើងនៅក្នុងតំបន់ដែលកំពុងបោសសម្អាតដើម្បីការពារសន្តិសុខទប់ស្កាត់ការឆ្លងដែនខុសច្បាប់។ នេះបើតាមការផ្សាយរបស់សារព័ត៌មានបាងកកប៉ុស្តិ៍ និងប្រភពដទៃទៀត៕
ចែករំលែកព័តមាននេះ