ទីក្រុងកៀវ៖ មន្ត្រីរដ្ឋាភិបាលអ៊ុយក្រែនចាប់ផ្ដើមបញ្ចេញប្រតិកម្មតបទៅនឹងដំណឹងដែលថាលោកត្រាំអាចនឹងអញ្ជើញមេដឹកនាំអ៊ុយក្រែន លោកហ្សេឡិនស្គី ឱ្យចូលរួមនៅក្នុងការជួបគ្នាកម្រិតកំពូលនៅរដ្ឋអាឡាស់ស្កានៅថ្ងៃទៅ១៥ ខែសីហាខាងមុខនេះ។ មន្ត្រីជាន់ខ្ពស់អ៊ុយក្រែនមួយរូបចាត់ទុកថាបើបានដូច្នេះមែនជាការល្អ។ មន្ត្រីរូបនេះយល់ថានេះជាការសម្រេចចិត្តដ៏ត្រឹមត្រូវ។ លោកយល់ថាមិនគួរមានការចរចាគ្នាដើម្បីបញ្ចប់សង្គ្រាមដោយគ្មានវត្តមានរបស់អ៊ុយក្រែនចូលរួមនោះទេ។
លោកអូឡិចសាន់ដឺ មើសស្កូ (Oleksandr Merezhko) ជាប្រធានគណៈកម្មការរដ្ឋសភាទទួលបន្ទុកខាងកិច្ចការបរទេសថ្លែងប្រាប់ទស្សនាវដ្ដីញូស្វីក (Newsweek) ថាការនាំយកលោកហ្សេឡិនស្គីចូលទៅក្នុងកញ្ចប់នៃកិច្ចចរចាគឺស្របទៅនឹងគោលការណ៍ស្ដីពី «កិច្ចពិភាក្សាដែលគ្មានអ៊ុយក្រែនចូលរួមមិនអាចចាត់ទុកថាជាការដោះស្រាយបញ្ហាអ៊ុយក្រែនទេ»។
ការធ្វើអត្ថាធិប្បាយរបស់មន្ត្រីរូបនេះបន្ទាប់ពីសារព័ត៌មានអាមេរិកផ្សាយថាសេតវិមានកំពុងពិចារណាដាក់បញ្ចូលលោកហ្សេឡិនស្គីទៅក្នុងកញ្ចប់ចរចានៅថ្ងៃសុក្រ ទី១៥ ខែសីហា។ ទូរទស្សន៍អឹនប៊ីស៊ី (NBC) បានដកស្រង់ប្រភពពីមន្ត្រីជាន់ខ្ពស់អាមេរិកមកផ្សាយថាសេតវិមានកំពុងពិនិត្យមើលលទ្ធភាពនៃការអញ្ជើញលោកហ្សេឡិនស្គីឱ្យចូលរួមនៅក្នុងការចរចាគ្នា។
មន្ត្រីអាមេរិកខាងលើនេះបញ្ជាក់ថាលទ្ធភាពអាចនឹងកើតមាន (ដែលថាលោកហ្សេឡិនស្គីអាចនឹងចូលរួមនៅក្នុងគម្រោងជួបគ្នា)។ គ្រប់គ្នាកំពុងសង្ឃឹមទុកជាមុនថាព្រឹត្តិការណ៍នេះនឹងកើតឡើង។ មន្ត្រីសេតវិមានម្នាក់ថ្លែងប្រាប់អឹនប៊ីស៊ីថាលោកត្រាំបើកចំហជានិច្ចសម្រាប់គម្រោងជួបគ្នាត្រីភាគី។ សម្រាប់ពេលនេះ សេតវិមានចង់ផ្ដោតសំខាន់ទៅលើគម្រោងជួបគ្នាទ្វេភាគីដែលស្នើឡើងដោយលោកពូទីន។
អង់គ្លេស បារាំង អ៊ីតាលី អាល្លឺម៉ង់ ប៉ូឡូញ ហ្វាំងឡង់ និងប្រធានគណៈកម្មការអឺរ៉ុបបានចេញសេចក្ដីថ្លែងការណ៍រួមគាំទ្រការប្រកាន់ជំហររបស់រដ្ឋាភិបាលទីក្រុងកៀវត្រង់ចំណុចដែលថា «ការសម្រេចចិត្តជ្រើសរើសយកមាគ៌ាណាមួយដើម្បីសន្តិភាពនៅអ៊ុយក្រែនមិនអាចកើតមានទេបើគ្មានអ៊ុយក្រែនចូលរួម។ យើងនៅតែប្រកាន់ខ្ជាប់នូវគោលការណ៍ដែលថាព្រំដែនជាអន្តរជាតិមិនអាចកែប្រែដោយការប្រើប្រាស់កម្លាំង (យោធា) បានឡើយ»។
ជំនួយការរបស់លោកពូទីនគឺលោកអ៊ូសាកូស (Ushakov) បញ្ជាក់ថាសេតវិមាន និងវិមានក្រឹមឡាំងមានកិច្ចការច្រើនណាស់ដែលត្រូវធ្វើយ៉ាងប្រញឹកដៃបំផុតព្រោះនៅសល់ពេលត្រឹមតែប៉ុន្មានថ្ងៃទៀតប៉ុណ្ណោះ។ លោកថ្លែងថាអាមេរិក និងរុស្ស៊ីមានព្រំប្រទល់ជាប់គ្នាដែលខណ្ឌដោយច្រកសមុទ្របេរីង (Bering Strait) ទទឹង៥៥ម៉ាយ (ប្រហែល៨៨,៥គីឡូម៉ែត្រ)។ ជំនួយការរូបនេះយល់ថាវាជារឿងដែលអាចទៅរួចបើគណៈប្រតិភូរុស្ស៊ីធ្វើដំណើរឆ្លងកាត់ដៃសមុទ្របេរីងចូលរដ្ឋអាឡាស់ស្កា ហើយថ្នាក់ដឹកនាំទាំង២ (លោកត្រាំ និងលោកពូទីន) ជួបគ្នានៅលើទឹកដីនេះ៕
ចែករំលែកព័តមាននេះ