ខេត្ដកំពង់ស្ពឺ ៖ បន្ទាប់ពីមានការប្រកាសជូនដំណឹងរបស់អគ្គបញ្ជាការសុំកុំឱ្យបងប្អូនប្រជាពលរដ្ឋចំនួន៣ស្រុកគឺស្រុកសំរោងទង ស្រុកភ្នំស្រួច និងស្រុកបសេដ្ឋ មានការភ្ញាក់ផ្អើលពីការបាញ់សាកល្បងតាមរយៈសមយុទ្ធបាញ់គ្រាប់ពិតប្រភេទ BM21 និង១៣០មីល្លីម៉ែត្រត្រូវបានបញ្ចប់ហើយនៅវេលាម៉ោង៩និង៣០នាទីព្រឹកថ្ងៃទី២ មេសា ដែលការធ្វើសមយុទ្ធនេះស្ថិតក្នុងឃុំមហាសាំង ស្រុកភ្នំស្រួច ខេត្ដកំពង់ស្ពឺ ។
លោកឧត្ដមសេនីយ៍ត្រីម៉ែន ស៊ីប៊ន មេបញ្ជា ការកងរាជអាវុធហត្ថខេត្ដបានឱ្យដឹងថា កម្លាំងអាវុធហត្ថទាំងអស់នៅក្នុងខេត្ដបានចេញល្បាតនៅតាមចំណុចគោលដៅភ្នំចង្អោរតូចនិងចង្អោរធំនិងបានធ្វើការពន្យល់ណែនាំក៏ដូចជាប្រាប់មិនឱ្យបងប្អូននៅតំបន់ខាងលើនាំគ្នាឡើងលើភ្នំក្នុងអំឡុងពេលធ្វើសមយុទ្ធបាញ់គ្រាប់ពិតនោះឡើយ ។
លោកឧបនាយករដ្ឋមន្ដ្រីទៀ បាញ់ រដ្ឋមន្ដ្រីក្រសួងការពារជាតិបានមានប្រសាសន៍ថា ការបាញ់នេះ គឺមិនមានឧបសគ្គអ្វីឡើយ ហើយបាញ់ចំគោលដៅ១០០ភាគរយផងដែរ ។ លោកឧបនាយករដ្ឋមន្ដ្រីបានបន្ដទៀតថា ការបាញ់គ្រាប់ BM21 ចំនួន១០០គ្រឿងនិងកាំភ្លើង១៣០មីល្លីម៉ែត្រចំនួន១២ដើម នៅក្នុងនោះអង្គភាពទាហានជើងទឹកចំនួន៦ដើម ។ លោកឧបនាយករដ្ឋមន្ដ្រីបានបន្ដថា ការបាញ់នេះបន្ទាប់ពីបានហ្វឹកហាត់ចំនួន៤ខែ ហើយសាកល្បងនូវអ្វីថ្មីរបស់កម្ពុជា ដែលទើបទទួលបាន ហើយការបាញ់នេះ គឺដើម្បីបង្ហាញពីកិត្យានុភាពរបស់កម្ពុជា មិនមែនបញ្ចេញសាច់ដុំអ្វីនោះទេ ។
លោកឧត្ដមសេនីយ៍ឯកឥត សារ៉ាត់ មេបញ្ជាការរងកងទ័ពជើងគោកនិងជានាយកសាលានាយទាហានសកម្មបានប្រាប់ថា ការធ្វើសមយុទ្ធបាញ់គ្រាប់ពិតនៅថ្ងៃទី២ មេសា នេះ គឺដើម្បីបង្ហាញពីកិត្យានុភាពជាតិ មិនមែនជាការគំរាមកំហែងដល់ប្រទេសណាមួយទេ ។ លោកបន្ដថា ការបាញ់នេះត្រូវចែកចេញជា២ដំណាក់កាល ដែលដំណាក់កាលទី១ បាញ់អាវុធធុនធ្ងន់១៣០មីល្លីម៉ែត្រ ១គ្រាប់ម្ដង ចំនួន១២កាណុង ហើយដំណាក់កាលទី២បាញ់ព្រមគ្នា១២កាណុង ក្នុងពេលតែមួយ ។ បន្ទាប់មកបាញ់អាវុធប្រតិកម្ម BM21 ក្នុងរយៈចម្ងាយ១៦គីឡូម៉ែត្រ ឆ្ពោះទៅកាន់គោលដៅភ្នំចង្អោរធំជាប់ព្រំប្រទល់ស្រុក៣ គឺស្រុកបសេដ្ឋ ស្រុកសំរោង និងស្រុកភ្នំស្រួចក្នុងខេត្ដកំពង់ស្ពឺ ។ លោកបានឱ្យដឹងទៀតថា ការធ្វើសមយុទ្ធនេះ បានធ្វើឡើងបន្ទាប់ពីកងកម្លាំងកាំភ្លើងធំបានហ្វឹកហាត់អស់រយៈពេល៤ខែមកហើយ ដែលសិក្ខាកាមជំនាញទើបតែទទួលបានការបណ្ដុះបណ្ដាលជំនាញអាវុធគាំទ្រ ។
លោកឧត្ដមសេនីយ៍បានបន្ដថា អាវុធដែលយកមកសាកល្បងបាញ់នាពេលនេះ គឺជាអាវុធថ្មីដែលទើបនាំចូលពីបរទេស ដើម្បីបំពាក់ដល់កងយោធពលខេមរភូមិន្ទក្នុងការការពារបូរណភាពទឹកដី ។ ទោះជាយ៉ាងណា មិនមានការបញ្ជាក់ប្រាប់ពីសំណាក់ថ្នាក់ដឹកនាំទាក់ទិននឹងការចំណាយទៅលើការធ្វើសមយុទ្ធបាញ់គ្រាប់ពិតនាពេលនោះទេ ។ ដោយគ្រាន់តែលោកឧបនាយករដ្ឋមន្ដ្រីទៀ បាញ់ បាននិយាយថា ការចំណាយអស់ច្រើន តែមិនអាចប្រាប់តួលេខបានទេ ៕
ចែករំលែកព័តមាននេះ