ប្រទេសឡាវ ៖ មកដល់ថ្ងៃទី២៨ កក្កដា ពួកអ្នកជួយសង្គ្រោះនៅតែតស៊ូ កាត់ភក់ និងទឹកជំនន់នៅផ្នែកខាងត្បូងប្រទេសឡាវ ដើម្បីរុករកអ្នកដែលអាចនៅរស់រានមានជីវិត ក្រោយការបាក់កាលពីថ្ងៃទី២៣ កក្កដា…
ប្រទេសឡាវ ៖ មកដល់ថ្ងៃទី២៨ កក្កដា ពួកអ្នកជួយសង្គ្រោះនៅតែតស៊ូ កាត់ភក់ និងទឹកជំនន់នៅផ្នែកខាងត្បូងប្រទេសឡាវ ដើម្បីរុករកអ្នកដែលអាចនៅរស់រានមានជីវិត ក្រោយការបាក់កាលពីថ្ងៃទី២៣ កក្កដា នូវទំនប់វារីអគ្គិសនីមួយ។
តាមអាជ្ញាធរប្រាប់ថា មនុស្សដល់ទៅជាង១.១០០នាក់អាចបាត់ខ្លួន។ ចំនួនមនុស្សស្លាប់ និងបាត់ខ្លួនមកទល់ពេលនេះនៅតែពុំច្បាស់ មកពីភាពស្មុគ្រស្មាញនៃប្រតិបត្តិការជួយសង្គ្រោះក្នុងតំបន់ដែលពិបាកចូលទៅ ព្រមទាំងការខ្វះតម្លាភាពនៃរដ្ឋអំណាចកុំមុយនីស្ត ។
លោកស្រីមីណាពនចៃ ចុមប៉ូ អ្នកទទួលខុសត្រូវម្នាក់នៃខេត្តអាតាពឺ បានអះអាងនាថ្ងៃទី២៧ កក្កដាថា ការរុករកស្មុគ្រស្មាញខ្លាំង តំបន់ជាច្រើនពិបាកចូលតាមរថយន្ត ឬតាមនាវា ។ ម្យ៉ាងទៀតយើងមានមធ្យោបាយពុំគ្រប់គ្រាន់នៅលើទីលាន។ លោកស្រីបន្តថាយើងកំពុងតាមរកជានិច្ចមនុស្សប្រមាណជា១.១២៦នាក់ ដែលគ្មានដំណឹង ខណៈអ្នកបាត់ខ្លួន១៣១នាក់ ត្រូវបានអះអាងដោយសាច់ញាតិពួកគេ។
ពីដំបូងអាជ្ញាធររៀបរាប់ពីមនុស្សស្លាប់២៧នាក់។ តំបន់មួយលាតសន្ធឹងជាច្រើនសិបគីឡូម៉ែត្រត្រូវទឹកជន់លិចក្រោយការបាក់ទំនប់ XE NAMNOY ភាគខាងត្បួងឡាវក្រោយពីមានភ្លៀងធ្លាក់ខ្លាំងពេក។ ទឹកដែលស្រកចុះយឺតរាំងខ្ទប់ផ្លូវទៅកាន់ភូមិមួយចំនួន ហើយទីនោះគ្របដណ្ដប់ដោយភក់យ៉ាងក្រាស់។
អ្នកជួយសង្គ្រោះម្នាក់និយាយប្រាប់ AFP ថា នេះជាគ្រោះមហន្តរាយដ៏អាក្រក់បំផុតដែលខ្ញុំពុំធ្លាប់ជួបប្រទះទល់តែសោះ ពិសេសជាងនេះទៀតប្រទេសរបស់យើងពុំមានឧបករណ៍ច្រើនសម្រាប់ប្រតិបត្តិការជួយសង្គ្រោះឡើយ។
គ្រោះមហន្តរាយបាក់ទំនប់នេះ នាំឲ្យមានការភ័យខ្លាចលើភាពរឹងមាំនៃទំនប់ឯទៀតៗរបស់ប្រទេស ជាប្រទេសក្រីក្រមួយនៅអាស៊ីអាគ្នេយ៍។
អ្នកភូមិម្នាក់បាននិយាយនាថ្ងៃទី២៨ កក្កដាថា ការព្រួយបារម្ភរបស់យើង គឺទំនប់ភាគច្រើនកសាងដោយបណ្តាសហគ្រាសបរទេស ហើយអាជ្ញាធរឡាវពុំមានជំនាញ និងសមត្ថភាពចាំបាច់សម្រាប់ការតាមត្រួតពិនិត្យលើចំណុចខ្សោយទាំងឡាយ។ ចំណែកកូរ៉េខាងត្បូងជាប្រទេសមួយចូលរួមច្រើនក្នុងការកសាងទំនប់ដែលបាក់នេះ ប្រកាសនាថ្ងៃទី២៧ កក្កដាថា បានផ្ដល់ជំនួយសង្គ្រោះបន្ទាន់១លានដុល្លារ ៕
ចែករំលែកព័តមាននេះ