ទីក្រុងតូក្យូ៖ នៅក្នុងដំណើរទស្សនកិច្ចរបស់លោកត្រាំទៅទីក្រុងតូក្យូនាសប្ដាហ៍ក្រោយនេះ ជប៉ុនគ្រោងជម្រាបជូនលោកត្រាំត្រួសៗនូវផែនការពង្រីកកម្លាំងយោធាជប៉ុនឱ្យបានខ្លាំងក្លាបន្ថែមទៀតដើម្បីការពារខ្លួន។ ផែនការនេះបង្ហើបឱ្យដឹងតាមរយៈរដ្ឋមន្ត្រីការបរទេសជប៉ុន លោកម៉ូតេគី (Motegi)។ លោកថ្លែងថានេះជាផ្នែកមួយនៃកិច្ចខិតខំប្រឹងប្រែងទប់ទល់នឹងស្ថានការណ៍ប្រែប្រួលផ្នែកយោធា និងភាពតានតឹងកាន់តែខ្លាំងឡើងៗនៅក្នុងតំបន់។
គេរំពឹងថាលោកត្រាំនឹងជួបពិភាក្សាការងារជាមួយលោកស្រីតាកាអ៊ីឈិ ដែលគេចាត់ទុកថាជានារីបេះដូងដែករបស់ជប៉ុន និងដែលទើបតែជាប់ឆ្នោតជានាយករដ្ឋមន្ត្រីកាលពីថ្ងៃអង្គារ។ លោកស្រីតាកាអ៊ីឈិឡើងមកអង្គុយកៅអីនាយករដ្ឋមន្ត្រីជប៉ុនលើកនេះមិនងាយស្រួលប៉ុន្មានទេ។ លោកស្រីត្រូវខិតខំពុះពារខ្លាំងណាស់ផ្នែកការទូត។ គ្រាន់តែឡើងកាន់តំណែងភ្លាម កូរ៉េខាងជើងបាញ់មីស៊ីលមួយគ្រាប់ភ្លាមដើម្បីទុកជាការស្វាគមន៍ និងជាសារផ្ដាំផ្ញើ។
លោកម៉ូតេគី (រដ្ឋមន្ត្រីការបរទេសជប៉ុន) ថ្លែងថាយើងត្រៀមខ្លួនទទួលដំណើរទស្សនកិច្ចរបស់លោកត្រាំយ៉ាងហ្មត់ចត់។ លោកសង្ឃឹមថាគម្រោងជួបគ្នាកម្រិតកំពូលរវាងលោកត្រាំ និងលោកស្រីតាកាអ៊ីឈីនៅអំឡុងទស្សនកិច្ចចាប់ពីថ្ងៃទី២៧ដល់២៩ ខែតុលានោះជាឱកាសសម្រាប់ថ្នាក់ដឹកនាំទាំង២ពិភាក្សាអំពីការពង្រឹងសម្ព័ន្ធភាពអាមេរិក-ជប៉ុន និងការខិតខំកសាងទំនុកចិត្តឱ្យគ្នាទៅវិញទៅមកនៅក្នុងក្របខណ្ឌឯកជន។
លោករដ្ឋមន្ត្រីរូបនេះថ្លែងថាជប៉ុនក៏សង្ឃឹមថានឹងបន្តកិច្ចសហការជាមួយកូរ៉េខាងត្បូង និងប្រទេសជាដៃគូដទៃទៀតនៅក្នុងតំបន់រួមទាំងអូស្ត្រាលី និងហ្វ៊ីលីពីនផងដែរ។ ចំពោះទំនាក់ទំនងជាមួយប្រទេសចិន ជប៉ុនក៏បន្តស្វះស្វែងរកការរក្សាទំនាក់ទំនងបែបស្ថាបនាជាមួយគ្នា។ សព្វថ្ងៃនេះ ប្រទេសជប៉ុនកំពុងស្ថិតនៅក្នុងដំណាក់កាលកសាងកម្លាំងយោធាជាបណ្ដើរៗរហូតដល់ឆ្នាំ២០២៧ដើម្បីជាផ្នែកមួយនៃយុទ្ធសាស្ត្រការពារសន្តិសុខជាតិ។ នៅក្នុងចំណោមផែនការទាំងនោះក៏មានការបង្កើនខ្ទង់ចំណាយលើវិស័យការពារជាតិរហូតដល់២%នៃជីឌីភីប្រចាំឆ្នាំរបស់ខ្លួន។ នេះបើតាមការផ្សាយរបស់ឆនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ