ខេត្តស្ទឹងត្រែង ៖ ដើម្បីលើកកម្ពស់ជីវភាព និងពង្រឹងការអភិវឌ្ឍវិស័យកសិកម្មនៅតំបន់តាំងទីលំនៅថ្មី មន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានចាត់វិធានការសំខាន់ ដោយបានបង្កើតនិងបោះឆ្នោតជ្រើសរើស ក្រុមផលិតកម្ម…
ខេត្តស្ទឹងត្រែង ៖ ដើម្បីលើកកម្ពស់ជីវភាព និងពង្រឹងការអភិវឌ្ឍវិស័យកសិកម្មនៅតំបន់តាំងទីលំនៅថ្មី មន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានចាត់វិធានការសំខាន់ ដោយបានបង្កើតនិងបោះឆ្នោតជ្រើសរើស ក្រុមផលិតកម្ម សហគមន៍ដីសម្បទានសង្គមកិច្ច ចំនួន ០៥ក្រុម នៅឃុំស្រែគរ ស្រុកសេសាន ក្រោមការសហការជាមួយគម្រោង LASED III ។ គោលបំណងចម្បង គឺដើម្បីដឹកនាំ ពង្រឹងផែនការធ្វើសកម្មភាពដាំដំណាំកសិកម្មឱ្យទទួលបានទិន្នផលខ្ពស់ប្រកបដោយនិរន្តរភាព ។
ថ្លែងក្នុងឱកាសចុះសហការជាមួយគម្រោង LASED III នៅឃុំស្រែគរ នាពេលថ្មីៗកន្លងទៅ លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានគូសបញ្ជាក់ថា ៖ «ផែនការសកម្មភាពនេះនឹងជួយលើកស្ទួយជីវភាពប្រជាពលរដ្ឋ ដែលបានទៅតាំងទីលំនៅថ្មី ឱ្យមានស្ថានភាពរស់នៅសមប្រកប ហើយប្រែក្លាយផ្ទៃដីថ្មី ដែលពួកគាត់ទទួលបានពីរាជរដ្ឋាភិបាល មានភាពបៃតងជាដំណាំកសិកម្មជំនួសព្រៃឈើ»។
លោកប្រធានមន្ទីរ ក៏បានលើកទឹកចិត្តយ៉ាងខ្លាំងដល់ប្រជាពលរដ្ឋ ដែលបានចងក្រងជាក្រុមផលិតហើយនោះ ត្រូវខិតខំដាំដុះនូវដំណាំ ដែលទទួលបានការបណ្តុះបណ្តាលពីមន្ត្រីជំនាញ ក្នុងគោលបំណងដើម្បី បង្កើនសន្តិសុខស្បៀង សម្រាប់គ្រួសារ ក៏ដូចជាការលក់ដូរសម្រាប់សេដ្ឋកិច្ចគ្រួសារ ។
លោក ឆិល វិបុល អនុប្រធានផ្នែកផ្សព្វផ្សាយកសិកម្ម បានបញ្ជាក់អំពីយន្តការ នៃការគាំទ្របច្ចេកទេសដោយមន្ត្រីជំនាញបានផ្តល់វគ្គបណ្តុះបណ្តា
ល និងបង្ហាញវិធីសាស្ត្រដាំដំណាំទៅដល់ប្រជាកសិកររយៈពេល០៣ថ្ងៃ ព្រមទាំងបានបង្កើតក្រុមបច្ចេកទេសដាំដុះជាក់លាក់ចំនួន០៥ក្រុម រួមមាន ៖
-ក្រុមផលិតកម្មដំឡូងមី
-ក្រុមផលិតបន្លែធម្មជាតិ
-ក្រុមផលិតស្រូវធម្មជាតិ
-ក្រុមផលិតស្វាយចន្ទីរដីថ្មី
-ក្រុមផលិតមាន់ស្រែធម្មជាតិ ។
វគ្គបណ្តុះបណ្តាល និងការបង្កើតក្រុមនេះ មានអ្នកចូលរួមសរុប២១៧នាក់ ក្នុងនោះមានស្ត្រី ១២៣នាក់ ដែលបង្ហាញពីការចូលរួមយ៉ាងសកម្មរបស់ស្ត្រីក្នុងវិស័យកសិកម្ម ។
លោកស្រី ភាន ណាង ជាតំណាងប្រជាពលរដ្ឋម្នាក់ ដែលបានចូលរួមវគ្គបណ្តុះបណ្តាល បានសម្តែងការប្តេជ្ញាចិត្តថា ពួកគាត់នឹងខិតខំអនុវត្តតាមការណែនាំឱ្យបានត្រឹមត្រូវ ព្រោះការមករស់នៅភូមិថ្មីនេះ ពួកគាត់ពុំមានអ្វីពឹងផ្អែកជាងការដាំដំណាំកសិកម្មនោះទេ ដែលក្រៅពីសម្រាប់បរិភោគ ក៏អាចលក់ដូរបានប្រាក់ចំណូលបន្ថែមផងដែរ ។
ជាមួយគ្នានេះមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានសង្កត់ធ្ងន់ថា ភាពជោគជ័យនៃគម្រោងនេះ មិនមែនបញ្ចប់ត្រឹមការផ្តល់សម្ភារៈ និងពូជដំណាំកសិកម្មនោះឡើយ។ មន្ទីរបានចាត់មន្ត្រីជំនាញចុះតាមដានជាប្រចាំ ដើម្បីជួយដល់ប្រជាពលរដ្ឋក្នុងការដោះស្រាយបញ្ហាប្រឈម ឬករណីសត្វចង្រៃយាយីលើផលដំណាំ ឲ្យបានឆាប់រហ័ស និងទាន់ពេលវេលា ៕
ចែករំលែកព័តមាននេះ