សង្គ្រាមអ៉ីរ៉ង់ ៖ ក្រោយច្រើនសប្ដាហ៍ស្ថិតក្នុងភាពមិនច្បាស់លាស់ និងភាពតានតឹងឡើងវិញ ទីបំផុត សហរដ្ឋអាមេរិក និងអ៉ីរ៉ង់ ឈានទៅដល់កិច្ចព្រមព្រៀង ដើម្បីបញ្ចប់សង្គ្រាមជាបន្ទាន់នៅមជ្ឈឹមបូព៌ា លើគ្រប់រណសិរ្សក្នុងនោះ រួមទាំងរណសិរ្សលីបង់ផងដែរ ។
កិច្ចព្រមព្រៀងនោះ ត្រូវបានប្រកាស នាព្រឹកថ្ងៃទី១៥ មិថុនា ដោយនាយករដ្ខមន្ត្រីប៉ាគីស្ថានលោកស៊ីបាសសារីហ្វ ជាអាជ្ញាកណ្ដាលគន្លឹះនៃជម្លោះ បន្ទាប់មក ដោយក្រុងវ៉ាស៊ីនតោន និងក្រុងតេហេរ៉ង់ ។ ពិធីចុះហត្ថលេខាគ្រោងធ្វើ នាថ្ងៃទី១៩ មិថុនានៅក្រុងហ្សឺណែវ ប្រទេសស្វ៊ីស ។ តាមបណ្ដាញសង្គម TRUTH SOCIAL ប្រធានាធិបតីអាមេរិក លោកដូណាល់ត្រាំ បានសម្ដែងការអបអរសាទរថា កិច្ចព្រមព្រៀងជាមួយអ៉ីរ៉ង់ពេលនេះ ត្រូវបានបង្ហើយ ។
ខ្ញុំអនុញ្ញាតពេញលេញបើកឡើងវិញច្រកសមុទ្រហ័រមូស ដោយមិនបាច់សុំសិទ្ធិឆ្លងកាត់ហើយទន្ទឹមនឹងនេះលុបចោលភ្លាមៗ ការហ៊ុមព័ទ្ធអ៉ីរ៉ង់របស់អាមេរិកតាមជើងទឹក ។ នាវារបស់ពិភពលោកទាំងមូលចូរបញ្ឆេះម៉ាស៊ីនត្រៀមចេញដំណើរ ។ ប្រេងពេលនេះ ហូរចេញទាំងដុលហើយ!ការបើកឡើងវិញនោះនឹងកើតមានចាប់តាំងពីការចុះហត្ថលេខាលើកិច្ចព្រមព្រៀងនាថ្ងៃទី១៩ មិថុនា ដើម្បីអាចចាប់ផ្ដើមដោះមីនចេញ ។ ព័ត៌មាននេះ នាំឲ្យតម្លៃប្រេងដាំក្បាលចុះជាង៤% ក្រោយពីឡើងខ្ពស់តាំងពីចាប់ផ្ដើមសង្គ្រាមពីថ្ងៃទី២៨កុម្ភៈនិងការបិទខ្ទប់ច្រកសមុទ្រយុទ្ធសាស្ត្រហ័រមូសមក។
ប្រធានាធិបតីអាមេរិកលោកដូណាល់ ត្រាំអះអាងកាលពីថ្ងៃទី១៣ មិថុនា ថា កិច្ចព្រមព្រៀងសន្តិភាពមួយជាមួយអ៉ីរ៉ង់ អាចចុះហត្ថលេខាក្នុងពេលឆាប់ៗអាចនាថ្ងៃទី១៤ មិថុនា ។ លោកថ្លែងបែបនេះ មុនមកចូលរួមក្នុងកិច្ចប្រជុំកំពូលG7នៅក្រុងEVIAN។ លោកបន្តថា បែបនេះនឹងបើកផ្លូវទៅរកការបើ់កឡើងវិញ ច្រកសមុទ្រហ័រមូស។តាមបណ្ដាញសង្គមTRUTH SOCIAL លោកត្រាំសរសេរថា កិច្ចព្រមព្រៀងនឹងត្រូវចុះហត្ថលេខានាថ្ងៃទី១៤ មិថុនា ហើយភ្លាមៗក្រោយការចុះហត្ថលេខា ច្រកសមុទ្រហ័រមូសនឹងបើកឡើងវិញសម្រាប់គ្រប់គ្នា។ ប្រធានាធិបតីអាមេរិកក៏អះអាងដែរថា អាមេរិកនឹងទទួលបានអ៊ុយរ៉ានីញ៉ូមចម្រាញ់ ពេលភាពស្ងប់ស្ងាត់វិលត្រឡប់មកវិញ ។
ចំពោះការលើកឡើងនាពេលនោះរបស់លោកត្រាំគឺផ្ទុយទៅនឹងការលើករបស់អ៉ីរ៉ង់។ មុននេះបន្តិច ក្រសួងការបរទេសអ៉ីរ៉ងនិយាយថា នឹងពុំមានការចុះហត្ថលេខាណាមួយគ្រោងធ្វើនាថ្ងៃទី១៤មិថុនានោះឡើយ ហើយកិច្ចព្រមព្រៀងមួយអាចបង្ហើយនាប៉ុន្មានថ្ងៃខាងមុខទៀត។ ប៉ុន្តែសាររបស់លោកត្រាំថ្ងៃនោះនៅតែភ្ជាប់ការព្រមានអ៉ីរ៉ង់ ឲ្យអនុវត្តពេញលេញកិច្ចព្រមព្រៀង បើមិនដូច្នេះទេនឹងជួបផលវិបាកធ្ងន់ធ្ងរបំផុត។ លោកត្រាំថាខ្ញុំសង្ឃឹមដែលរាល់ដំណើរការនឹងប្រព្រឹត្តទៅដោយឆាប់រហ័ស ដោយស្រួលនិងគ្មានការរអាក់រអ៊ួល ។
ទោះបីយ៉ាងណា ប្រធានាធិបតីអាមេរិកហាក់ប្រើភាសាបង្រួបបង្រួមច្រើន រយៈពេលប៉ុន្មានថ្ងៃចុងក្រោយនេះ។ លោកអះអាងថាទំនាក់ទំនងជាមួយអ៉ីរ៉ង់ ចាប់ពីពេលនេះទៅខុសគ្នាច្រើនជាងកាលពីមុននិងប្រសើរជាង កាលពីស្ថិតក្រោមប្រធានាធិបតីមុនៗផង ។ លោកថា លោកប្រកាន់យកការអត់ធ្មត់ខ្លាំងធ្វើការជាមួយអ៉ីរ៉ង់ និងជាមួយតំបន់មជ្ឈឹមបូព៌ាទាំងមូលក្នុងរយៈពេលយូរអង្វែង។ ក្នុងសំណើសំខាន់ៗរបស់អ៉ីរ៉ង់មានជាពិសេស ការទទួលបានការធានារបស់អាមេរិក និងអ៉ីស្រាអែលថា លែងវាយប្រហារទៀតប្រឆាំងប្រទេសខ្លួន ៕
ចែករំលែកព័តមាននេះ