អ្នកលក់ការ៉េមម្នាក់ នៅតំបន់អង្គរ លក់ក្នុង ១ចាន តម្លៃ ៥ដុល្លារ ត្រូវសមត្ថកិច្ចកោះហៅមកធ្វើកិច្ចសន្យា
- សៀមរាប
ខេត្តសៀមរាប ៖ ករណីអ្នកលក់ការ៉េមម្នាក់លក់ក្នុងតម្លៃខ្ពស់ហួសហេតុរហូតដល់ ៥ដុល្លារ (ឬស្មើនឹង២ម៉ឺនរៀល) ក្នុងមួយចាន ទៅឱ្យភ្ញៀវទេសចរ ត្រូវបានកម្លាំងនគរបាលប៉ុស្តិ៍រដ្ឋបាលសង្កាត់គោកចក ក្រុងសៀមរាប ធ្វើការកោះហៅមកអប់រំណែនាំ និងធ្វើកិច្ចសន្យាបញ្ឈប់សកម្មភាពលក់ដូរក្នុងតម្លៃនេះតទៅទៀត។
ការកោះហៅបុរសជាអ្នកលក់ការ៉េមមកណែនាំ និងធ្វើកិច្ចសន្យានេះបានធ្វើឡើងកាលពីវេលាម៉ោង ៥ល្ងាច ថ្ងៃទី១៤ ខែមិថុនា ឆ្នាំ២០២៦។
បុរសជាអ្នកលក់ការ៉េមខាងលើឈ្មោះ ស៊ឺ អាង អាយុ ៥៦ឆ្នាំ មានទីលំនៅបច្ចុប្បន្នស្ថិតនៅក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។
បើតាមការបញ្ជាក់ពីមន្ត្រីនគរបាលប៉ុស្តិ៍រដ្ឋបាលសង្កាត់គោកចក តាមរយៈប្រព័ន្ធតេឡេក្រាមនៅរសៀលថ្ងៃទី១៥ ខែមិថុនា ឆ្នាំ២០២៦ នេះបានឱ្យដឹងថា នៅក្នុងការសាកសួរ បុរសឈ្មោះ ស៊ឺ អាង បានសារភាព និងទទួលស្គាល់កំហុសថា រូបគាត់បានលក់ការ៉េមមួយចានក្នុងតម្លៃ ៥ដុល្លារ (ឬស្មើ២ម៉ឺនរៀល) ទៅឱ្យភ្ញៀវទេសចរពិតប្រាកដមែន។
ក្រោយពីបានស្តាប់ការសារភាពរួច សមត្ថកិច្ចបានធ្វើការអប់រំណែនាំ និងឱ្យបុរសរូបនេះធ្វើកិច្ចសន្យាបញ្ឈប់ការលក់ការ៉េម ក្នុងតម្លៃថ្លៃបែបនេះទៅឱ្យភ្ញៀវទេសចរ តទៅទៀត។ បន្ទាប់ពីធ្វើការអប់រំ និងធ្វើកិច្ចសន្យារួចរាល់ សមត្ថកិច្ចក៏បានអនុញ្ញាតឱ្យបុរសរូបនោះត្រឡប់ទៅផ្ទះវិញ៕
ចែករំលែកព័តមាននេះ