អន្តរជាតិ ៖ មន្ត្រីសហរដ្ឋអាមេរិក និងអ៊ីរ៉ង់បានប្រកាសថា ភាគីទាំងពីរបានឈានដល់កិច្ចព្រមព្រៀងមួយ ដើម្បីបញ្ចប់សង្គ្រាម ក៏ដូចជាបើកច្រកសមុទ្រហ័រមូស (Hormuz) ឡើងវិញ។ កិច្ចព្រមព្រៀងជំហានបឋមនេះ បានធ្វើឱ្យតម្លៃប្រេងឆៅអន្តរជាតិដាំក្បាលចុះយ៉ាងខ្លាំង ប៉ុន្តែបន្សល់ទុកកម្មវិធីនុយក្លេអ៊ែររបស់អ៊ីរ៉ង់ទៅចរចានៅពេលក្រោយ។ នេះបើតាមប្រភពពី Reuters បានចេញផ្សាយនៅថ្ងៃទី១៥ ខែមិថុនា ឆ្នាំ២០២៦។
បើទោះបីគ្រាន់តែជាក្របខ័ណ្ឌការងារក្តី ប៉ុន្តែកិច្ចព្រមព្រៀងនេះជាជំហានដ៏សំខាន់បំផុត នៅក្នុងការដោះស្រាយជម្លោះដែលបានសម្លាប់មនុស្សរាប់ពាន់នាក់ និងធ្វើឱ្យកក្រើកទីផ្សារថាមពលពិភពលោក ចាប់តាំងពីសង្គ្រាមបានផ្ទុះឡើង តាមរយៈការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ កាលពីចុងខែកុម្ភៈកន្លងទៅ។
ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានសរសេរសារមួយនៅលើបណ្តាញសង្គម Truth Social កាលពីថ្ងៃទី១៤ ខែមិថុនា កន្លងទៅ (ម៉ោងនៅសហរដ្ឋអាមេរិក) ថា កិច្ចព្រមព្រៀងជាមួយអ៊ីរ៉ង់នៅពេលនេះ បានសម្រេចជាស្ថាពរហើយ។
ការបង្ហោះសាររបស់លោកបានធ្វើឡើងភ្លាមៗ បន្ទាប់ពីនាយករដ្ឋមន្ត្រីប៉ាគីស្ថាន លោក Shehbaz Sharif ដែលដើរតួជាអ្នកសម្របសម្រួលក្នុងជម្លោះនេះ បានប្រកាសថា កិច្ចព្រមព្រៀងត្រូវបានសម្រេចនៅព្រឹកព្រលឹមថ្ងៃទី១៥ ខែមិថុនា (ម៉ោងក្នុងតំបន់)។ ប៉ុន្តែអនុស្សរណៈនៃការយោគយល់គ្នា (MoU) គ្រោងនឹងត្រូវចុះហត្ថលេខាផ្លូវការនៅថ្ងៃសុក្រសប្តាហ៍នេះ នៅក្នុងប្រទេសស្វីស ហើយលក្ខខណ្ឌលម្អិតច្បាស់លាស់មិនទាន់ត្រូវបានដឹងភ្លាមៗនៅឡើយទេ។ លោក Sharif បានបញ្ជាក់តាមការបង្ហោះសារលើបណ្តាញ
សង្គម X ថា កិច្ចព្រមព្រៀងនេះ ក៏បានអំពាវនាវឱ្យមានការបញ្ឈប់ជាបន្ទាន់ និងជាអចិន្ត្រៃយ៍នូវប្រតិបត្តិការយោធានៅគ្រប់មុខព្រួញទាំងអស់ រួមទាំងនៅក្នុងប្រទេសលីបង់ផងដែរ។
ទន្ទឹមជាមួយគ្នានោះ លោកប្រធានាធិបតី ត្រាំ ក៏បានប្រកាសដែរថា ច្រកសមុទ្រហ័រមូស ដែលជាផ្លូវដឹកជញ្ជូនដ៏សំខាន់សម្រាប់លំហូរប្រេង និងហ្គាសពិភពលោក ដែលភាគីអ៊ីរ៉ង់បានបិទខ្ទប់អស់រយៈពេលជាច្រើនខែមកហើយនោះ នឹងបើកដំណើរការឡើងវិញ នៅថ្ងៃសុក្រសប្តាហ៍នេះ ហើយលោកក៏បានបញ្ជាឱ្យបញ្ចប់ការបិទខ្ទប់របស់សហរដ្ឋអាមេរិកលើកំពង់ផែអ៊ីរ៉ង់ផងដែរ។
ជាមួយការផ្លាស់ប្តូរថ្មីនេះ តម្លៃប្រេងឆៅអន្តរជាតិបានដាំក្បាលចុះភ្លាមៗ បន្ទាប់ពីព័ត៌មាននៃកិច្ចព្រមព្រៀងត្រូវបានចេញផ្សាយ។ តម្លៃប្រេងឆៅ Brent ដែលជាស្តង់ពិភពលោកបានធ្លាក់ចុះដល់ទៅ ៤% ក្នុងការជួញដូរដំបូងនៅថ្ងៃទី១៥ ខែមិថុនា ហើយបានរក្សាតម្លៃនៅត្រឹម ៨៣,៥១ ដុល្លារអាមេរិកក្នុង១បារ៉ែល គិតត្រឹមម៉ោង ១២ និង ៥០ នាទីថ្ងៃត្រង់ (ម៉ោងនៅកម្ពុជា)។ ចំណែកប្រេងឆៅ West Texas Intermediate (WTI) របស់សហរដ្ឋអាមេរិកជួញដូរនៅក្នុងតម្លៃ ៨០,៧២ ដុល្លារក្នុង១បារ៉ែល។
ក្រឡេកទៅតម្លៃមាសអន្តរជាតិឯណោះវិញ បានកើនឡើងជាង ២% នៅថ្ងៃទី១៥ មិថុនា បន្ទាប់ពីកិច្ចព្រមព្រៀងជំហានដំបូងរបស់អាមេរិក និងអ៊ីរ៉ង់ត្រូវបានប្រកាស ដើម្បីបញ្ចប់សង្គ្រាមនៅមជ្ឈិមបូព៌ា ជំរុញឱ្យតម្លៃប្រេងធ្លាក់ចុះ និងបន្ធូរបន្ថយការបារម្ភអំពីអតិផរណា និងអត្រាការប្រាក់ខ្ពស់ផងដែរ។
តម្លៃមាសភ្លាមៗបានកើនឡើង ២,៥% ដល់ ៤ ៣២៣ ដុល្លារក្នុង១អោន ឬ ៥ ២០៨ ដុល្លារក្នុង១តម្លឹង ដែលជាការកើនឡើងដល់កម្រិតខ្ពស់បំផុត ចាប់តាំងពីថ្ងៃទី៩ មិថុនា និងបន្តកើនឡើងបន្ថែមទៀត។
តម្លៃមាសអន្តរជាតិបានធ្លាក់ចុះប្រហែល ២០% តាំងពីការចាប់ផ្តើមសង្គ្រាមរវាងអាមេរិក និងអ៊ីស្រាអែលប្រឆាំងនឹងអ៊ីរ៉ង់កាលពីចុងខែកុម្ភៈ។ ការបិទច្រកហ័រមូសបាននាំឱ្យមានការកើនឡើងយ៉ាងខ្លាំងនៃតម្លៃប្រេងឆៅសកល បង្កឱ្យមានការព្រួយបារម្ភអំពីអតិផរណា និងបង្កើនការរំពឹងទុកថា អត្រាការប្រាក់នឹងរក្សានៅកម្រិតខ្ពស់ក្នុងរយៈពេលយូរ ដូច្នេះទើបបានជាមាសដុំបាត់បង់ភាពទាក់ទាញនៅពេលមានអត្រាការប្រាក់ខ្ពស់៕
ចែករំលែកព័តមាននេះ