ប្រមុខរាជរដ្ឋាភិបាល អំពាវនាវកុំឱ្យមានការគិតថា រៀនជំនាញតាម TVET គ្មានតម្លៃដូចរៀនបាក់ឌុប ឬបរិញ្ញាបត្រ
- ភ្នំពេញ
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្តាំផ្ញើទៅអ្នកចូលរៀនជំនាញក្នុងកម្មវិធី TVETថា សូមកុំគិតថា មិនសូវមានតម្លៃដូចសញ្ញាបត្របាក់ឌុប ឬសញ្ញាបត្របរិញ្ញាបត្រ គឺមានតម្លៃដូចគ្នា ។
ក្នុងឱកាសអញ្ជើញជាអធិបតីអបអរសាទរទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៩ ឆ្នាំ២០២៦ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល» នាព្រឹកថ្ងៃទី១៥ ខែមិថុនា ឆ្នាំ២០២៦ សម្ដេចធិបតី នាយករដ្ឋមន្ត្រីបានលើក ឡើងថា រាជរដ្ឋាភិបាល បានកំណត់គោលដៅយកតួលេខនៃបរិមាណកម្មវិធីTVETចំនួន ១,៥លាននាក់ ប៉ុន្តែទោះបាន ឬមិនបានតាមការចង់បានក៏ដោយ ក៏ពុំមានបញ្ហាអ្វីនោះទេ សំខាន់ត្រូវធានាគុណភាពសម្រាប់អ្នករៀនគ្រប់ៗគ្នានៅពេលបញ្ចប់វគ្គ ។
សម្តេចធិបតីបានគូសបញ្ជាក់ថា៖ ខ្ញុំសូមអំពាវនាវឱ្យបងប្អូន ក្មួយៗដែលចូលរៀនកម្មវិធីធីវេតនេះយកចិត្តទុកដាក់ជំរុញខ្លួន ហើយគ្រួសារសូមកុំឱ្យមានគំនិតថា រៀនធីវេត នេះ គឺជារៀនថ្នាក់ជំនាញអីអត់សូវមានតម្លៃដូចគេរៀនបាក់ឌុប រៀនបរិញ្ញា អត់ទេ… មានតម្លៃដូចគ្នាជំនាញខុសគ្នា» ។
ជាមួយគ្នានោះដែរ សម្តេចធិបតី ក៏បានលើកឡើងថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា នៅក្នុងអាណត្តិនេះ ក្រៅតែពីបង្កើតសាលា បង្កើតកម្មវិធីសិក្សាដោយឥត គិតថ្លៃ រាជរដ្ឋាភិបាល ក៏បានដាក់ចេញសម្រាប់ប្រជាពលរដ្ឋដែលមានបណ្ណក្រីក្រ ដោយផ្តល់នូវថវិកាបំប៉នថែមទៀត ។
សម្តេចធិបតី បានគូសបញ្ជាក់ថា បច្ចុប្បន្នថ្នាក់ចល័តនេះផ្តោតទៅលើ៨មុខជំនាញ និងគ្រោងគិតគូបន្ថែមទៀត ដើម្បីឱ្យស្របទៅតាមតម្រូវការទីផ្សារ ខណៈស្ថានភាពបច្ចុប្បន្ន សាលារៀនត្រូវបានរុញទៅដល់ខេត្ត ដល់ស្រុក និងទៅដល់ឃុំសម្រាប់បឋមសិក្សា ។
សម្តេចធិបតី ហ៊ុន ម៉ាណែត បានបញ្ជាក់ទៀតថា ៖ «នៅក្នុងអាណត្តិនេះ យើងឃើញថា ក្រៅពីគ្រាន់តែបង្កើតសាលា បង្កើតកម្មវិធីឱ្យរៀន Free រាជរដ្ឋាភិបាលក៏បានក៏ដាក់ចេញនៅសម្រាប់ប្រជាពលរដ្ឋដែលមានបណ្ណក្រីក្រ យើងផ្តល់នូវថវិកាបំប៉នបន្ថែមទៀត តែទោះជាប៉ុណ្ណឹងក៏ដោយ ការវិវឌ្ឍរបស់យើងទៅមុខ ប៉ុន្តែការឆ្នៃប្រឌិត ដើម្បីធ្វើយ៉ាងណាឱ្យប្រជាពលរដ្ឋរបស់យើង ជាពិសេសយុវជនរបស់យើងកាន់តែមានលទ្ធភាព ក្រោយពីការធ្វើការវាយតម្លៃទៅក្រសួងការងារក៏បានឃើញថា ទោះបីជាយើងដាក់ចេញនូវកម្មវិធីរុញទៅដល់ខេត្តមានប្រាក់បំប៉នក៏នៅមានក្មួយៗមួយចំនួន ប្អូនៗមួយចំនួននៅពិបាកចែកគ្នារវាងលទ្ធភាព បំពេញភារកិច្ចប្រចាំថ្ងៃនៅផ្ទះបូកជាមួយនឹងឆ្លៀតពេលមករៀន» ។
ក្នុងនោះ សម្តេចធិបតីក៏បានបញ្ជាក់ដែរថា ដោយសារមើលឃើញពីការលំបាករបស់យុវជន ក៏ដូចជា ប្រជាពលរដ្ឋទើបក្រសួងការងារ ដាក់ចេញនូវជំនាញចល័ត ដោយរុញកម្មវិធីនេះ ទៅដល់ផ្ទះ ទៅដល់ស្រុក ហើយអនុវត្តសាកល្បងក្នុងពេលឆាប់ៗនេះ ខណៈសម្តេចសង្ឃឹមថានឹងមានការចូលរួមរបស់យុវជនរបស់ប្រជាពលរដ្ឋ ជាពិសេសក្មួយៗប្អូនៗដែលត្រូវការបំនិនបន្ថែម និងសូមឱ្យយកចិត្តទុកដាក់ ទៅលើគុណភាព ។
ទោះជាយ៉ាងក៏ដោយ សម្តេចធិបតី ក៏បានសង្កត់ធ្ងន់ដែរថា ការបណ្តុះបណ្តាលទាំងអស់ សូមកុំឱ្យមានតែរូបភាព សូមកុំឱ្យមានតែបរិមាណ តែត្រូវយកចិត្តទុកដាក់ទៅលើគុណភាព ព្រោះគុណភាពនេះនឹងធ្វើឱ្យទាក់ទាញការរៀនសូត្របន្ថែម ព្រោះបើទៅរៀនហើយមកវិញអត់ចេះដដែល ថ្ងៃក្រោយគ្មានអ្នកណាមករៀនទេ ចឹងត្រូវផ្តោតទៅលើគុណភាព និងការរៀបចំគ្រូ និងមេរៀនឱ្យបានច្បាស់ ៕
ចែករំលែកព័តមាននេះ