បិទឃ្លុំបណ្តោះអាសន្ន ! រកឃើញទំនិញចំនួន១៧មុខ នាំមកពីថៃ នៅខណ្ឌច្បារអំពៅ និងរកឃើញទំនិញហួសសុពលភាព
- ភ្នំពេញ
រាជធានីភ្នំពេញ ៖ កម្លាំងចម្រុះបានឆែកឆេរឃ្លាំងចំនួន១២កន្លែង ដោយក្នុងនោះបានរកឃើញឃ្លាំងមួយ នៅខណ្ឌច្បារអំពៅ ស្តុកទំនិញនាំចូលពីថៃចំនួន១៧មុខ និងមានទំនិញហួសសុពលភាព (ទឹកតែអូអ៊ិឈិ និងទឹកវីតាមីន Blue) ដែលឈានទៅដល់ការបិទឃ្លុំទីតាំងបណ្តោះអាសន្ន ។
ជាក់ស្តែង រដ្ឋបាលរាជធានីភ្នំពេញ បានប្រកាសនាព្រឹកថ្ងៃទី១៥ ខែមិថុនានេះថា ៖ នៅថ្ងៃទី១៤ ខែមិថុនា ឆ្នាំ២០២៦ ក្រោមការដឹកនាំ និងបញ្ជាផ្ទាល់របស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ រដ្ឋបាលខណ្ឌទាំង១៤ សហការជាមួយកម្លាំងចម្រុះមកពីស្នងការដ្ឋាននគរបាលរាជធានីភ្នំពេញ អគ្គនាយកដ្ឋាន ក.ប.ប ដោយមានការសម្របសម្រួលផ្លូវច្បាប់ពីព្រះរាជអាជ្ញារងអមសាលាដំបូងរាជធានីភ្នំពេញ បានចុះត្រួតពិនិត្យទីតាំងឃ្លាំងតូច ធំ ក្នុងមូលដ្ឋានសរុបចំនួន ១២កន្លែង ដែលសង្ស័យមាននាំចូលស្តុកទុក ចរាចរ និងចែកចាយផលិតផលបង្កកមានប្រភពពីប្រទេសថៃ ។
តាមរយៈប្រតិបតិការនេះ សមត្ថកិច្ចចម្រុះបានរកឃើញទីតាំងចំនួន១ ស្ថិតនៅផ្ទះលេខ៣៥២ ផ្លូវ៣៥១ ភូមិឫស្សីស្រស់ សង្កាត់និរោធ ខណ្ឌច្បារអំពៅ ដែលជាឃ្លាំងស្តុកទំនិញប្រភេទគ្រឿងទេស ភេសជ្ជៈ និងសម្ភារប្រើប្រាស់ជាច្រើនប្រភេទសរុបចំនួន១.៦៤៧កេស ស្មើនឹង១៤.៦៣៨,៥គីឡូក្រាម នាំចូលពីបរទេស ក្នុងនោះការិយាល័យ ក.ប.ប រាជធានីភ្នំពេញ បានរកឃើញទំនិញចំនួន១៧មុខ ជាទំនិញនាំចូលពីប្រទេសថៃ និងមានទំនិញចំនួន២មុខ គឺទឹកតែអូអ៊ិឈិ ចំនួន៣៤កេស និងទឹកវីតាមីន Blue ចំនួន ៤កេស ហួសកាលបរិច្ឆេទប្រើប្រាស់ ។
ក្រោយការត្រួតពិនិត្យ ក្រោមការសម្របសម្រួលផ្លូវច្បាប់ពីព្រះរាជអាជ្ញារង កម្លាំងចម្រុះបានសម្រេចបិទឃ្លុំទីតាំងនេះបណ្តោះអាសន្ន ដើម្បីបន្តនីតិវិធី ។
នៅថ្ងៃដដែលនេះដែរ រដ្ឋបាលខណ្ឌទាំង១៤ ក៏បានចុះត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ បានចំនួន ៨៨ទីតាំង ដោយមិនមានរកឃើញបទល្មើសអ្វីនោះទេ ៕
ចែករំលែកព័តមាននេះ