ទីក្រុងវ៉ាស៊ីនតោន៖ មានហេតុការណ៍ធ្លាក់យន្តហោះមួយគ្រឿងនៅរដ្ឋមីសួរី (Missouri) បណ្ដាលឱ្យស្លាប់មនុស្ស១២នាក់។ នេះបើយោងតាមក្រុមល្បាតតាមផ្លូវហាយវេបង្ហោះសារនៅលើបណ្ដាញសង្គម។ ហេតុការណ៍នោះកើតឡើងនៅក្បែរព្រលានយន្តហោះមួយកន្លែង។ សម្រាប់ពេលនេះ មានសេចក្ដីរាយការណ៍អ្នកជិះនៅក្នុងយន្តហោះនោះស្លាប់ទាំងអស់គ្នា។ ទីនោះស្ថិតនៅចម្ងាយ៦០ម៉ោយពីទីក្រុងខេនសាស់ (Kansas) នៅក្នុងរដ្ឋមីសួរីដដែល។
កាលពីមុននេះបន្តិច មានហេតុការណ៍បុកគ្នាកណ្ដាលអាកាសរវាងឧទ្ធម្ភាគចក្រ២គ្រឿងនៅទីក្រុងរីអូ ដឺ ជេនីរ៉ូ (Rio de Janeiro) ប្រទេសប្រេស៊ីល បណ្ដាលឱ្យស្លាប់មនុស្ស៦នាក់។ នេះបើយោងតាមការផ្សាយរបស់សារព័ត៌មានក្នុងស្រុក។ ហេតុការណ៍នោះកើតឡើងនៅវេលាម៉ោង១១:៥៩។ ងាកទៅសំណុំរឿងធ្លាក់យន្តហោះនៅអាមេរិកវិញម្ដង។ ឈ្មោះរបស់ជនរងគ្រោះមិនត្រូវបានគេប្រកាសជាសាធារណៈទេរហូតដល់សាច់ញាតិរបស់ពួកគេមកបញ្ជាក់អត្តសញ្ញាណឱ្យបានគ្រប់គ្រាន់ជាមុនសិន។
ក្រុមហ៊ុនដែលជាម្ចាស់យន្តហោះខាងលើនេះថ្លែងថាខ្លួនកំពុងសហការគ្នាយ៉ាងជិតស្និទ្ធជាមួយអាជ្ញាធរមូលដ្ឋាន, គណៈកម្មការជាតិទទួលបន្ទុកអាកាសចរណ៍ និងគណៈកម្មការជាតិទទួលបន្ទុកខាងសុវត្ថិភាពដឹកជញ្ជូន។ លោកដេនីស យ៉ាកុប (Dennis Jacobs) ជាអ្នកគ្រប់គ្រងស្ដីទីនៃព្រលានយន្តហោះនោះប្រាប់ថាយន្តហោះដែលមានម៉ាស៊ីនតែមួយនោះបានហោះចេញពីព្រលាននៅម៉ោង១១:២០ព្រឹក។ ប៉ុន្តមិនអាចហោះឡើងបានទេ ហើយក៏ធ្លាក់សំយុងចុះមកដីតែម្ដង។ កន្លែងដែលធ្លាក់នោះស្ថិតនៅចម្ងាយ២៧៤ម៉ែត្រពីផ្លូវហោះហើរ៕ ប្រភព៖ AP
ចែករំលែកព័តមាននេះ