សមត្ថកិច្ចបានធ្វើអន្តរាគមន៍រំដោះម្ដាយនិងកូនស្រី២នាក់ចេញពីក្នុងផ្ទះ បន្ទាប់ពីប្ដីចាក់សោឃុំទុកច្រើនម៉ោង
- បាត់ដំបង
ខេត្តបាត់ដំបង ៖ គេមិនទាន់ដឹងពីមូលហេតុដែលបុរសម្នាក់ បានចាប់ប្រពន្ធនិងកូនស្រី០២នាក់ឃុំទុកក្នុងផ្ទះ ហើយចាក់សោទ្វារជាប់ពីខាងក្រៅ ប៉ុន្តែត្រូវកម្លាំងសមត្ថកិច្ចចុះអន្តរាគមន៍ជួយរំដោះម្ដាយ និងកូនស្រីរួចចេញពីក្នុងផ្ទះភ្លាមៗ ក្រោយទទួលបានសេចក្ដីរាយការណ៍ពីអ្នកភូមិ ។ នេះបើតាមប្រភពពីប្រជាពលរដ្ឋ ។
ប្រភពព័ត៌មានបានឲ្យដឹងថា ព្រឹត្តិការណ៏ដែលបង្កឲ្យមានការភ្ញាក់ផ្អើលខាងលើនេះ បានកើតឡើងកាលពីរសៀលថ្ងៃទី១៤ មិថុនា នៅចំណុចភូមិស្រែរាជ ឃុំស៊ុង ស្រុកសំឡូត ដែលបង្កឡើងដោយឈ្មោះ កែប ចាន់ថន ភេទប្រុស អាយុ៣៣ឆ្នាំ ។ អ្នកភូមិបានរាយការណ៍ និងសុំឲ្យជួយអន្តរាគមន៍ភ្លាមៗពីកម្លាំងនគរបាលវរការពារព្រំដែនគោកលេខ៣១០ ដែលនៅជិតបំផុត ដើម្បីសុំជួយរំដោះម្ដាយ និងកូនស្រី០២នាក់ ដែលប្ដីចាប់ឃុំនៅក្នុងផ្ទះ ចាក់សោទ្វារជាប់មិនឲ្យចេញក្រៅ តែប្រភពមិនបាននិយាយពីមូលហេតុ ដែលនាំឲ្យបុរសនោះចាប់ប្រពន្ធកូនឃុំនៅក្នុងផ្ទះទេ ។
មន្ត្រីប៉ុស្ដិ៍នគរបាលមិនអាចទំនាក់ទំនងសុំការបំភ្លឺបានទេ ជុំវិញករណីខាងលើនេះ ។ ដោយឡែក លោក ម៉ែន រីម អធិការស្រុកសំឡូតក៏មិនលើកទូរស័ព្ទ ដើម្បីសុំការពន្យល់បានដែរ ។ ប៉ុន្តែមេបញ្ជាការវរការពារព្រំដែនគោកលេខ៣១០ លោក អ៊ុក សារិន ដែលលោកបានទទួលបណ្ដឹងដំបូងពីប្រជាពលរដ្ឋស្នើសុំឲ្យជួយអន្តរាគមន៍ ចំពោះគ្រួសារនេះ បានប្រាប់ថា លោកពិតជាបានទទួលការស្នើសុំអន្តរាគមន៍ជួយរំដោះម្ដាយ និងកូនស្រី ដែលប្ដីចាប់ឃុំនៅក្នុងផ្ទះនោះមែន ប៉ុន្តែលោកមិនបានចុះផ្ទាល់ទេ គឺកម្លាំងរបស់លោកបានចុះអន្តរាគមន៍ភ្លាមៗដល់ចំណុចកើតហេតុ ដើម្បីពិនិត្យសភាពការណ៍ជាក់ស្ដែង ។ លោកមេបញ្ជាការបានបញ្ជាក់ថា កម្លាំងរបស់លោកបានចុះទៅដល់ការពារទីតាំងកើតហេតុ ដើម្បីរង់ចាំកម្លាំងជំនាញនៃអធិការស្រុកចុះមក ដើម្បីចាត់វិធានាការតាមនីតិវិធី ។
លោក អ៊ុក សារិន បានបញ្ជាក់ដែរថា បុរសជាប្ដីបានចាក់សោទ្វារពីខាងក្រៅ ដោយឃុំប្រពន្ធ និងកូនស្រី០២នាក់នៅក្នុងផ្ទះមិនឲ្យចេញក្រៅទេ ។ ប៉ុន្តែលោកក៏មិនបានដឹងពីមូលហេតុជាក់លាក់ដែរ តែលោកសង្ស័យថា អាចផ្ដើមចេញពីអំពើហិង្សាក្នុងគ្រួសារ ព្រោះលោកធ្លាប់ដឹងថា «បុរសនោះមានប្រវត្តិធ្លាប់ប្រើប្រាសគ្រឿងញៀន» ។
ជនសង្ស័យត្រូវបានប្រគល់ឲ្យខាងកម្លាំងជំនាញនៃអធិការស្រុកសំឡូត ជាអ្នកចាត់ការតាមច្បាប់ហើយ ក្រោយពីជួយរំដោះម្ដាយ និងកូនស្រី០២នាក់ឱ្យរួចផុតពីក្រោះថ្នាក់ ។ យ៉ាងណាក្ដី លោក ម៉ែន រីម នៅតែមិនអាចសុំការពន្យល់បន្ថែមបាន គិតត្រឹមម៉ោង១ និង៣០នាទីរសៀលថ្ងៃទី១៥ មិថុនា ។
បើតាមមន្ត្រីម្នាក់បានប្រាប់ថា ជនបង្កឈ្មោះ កែប ចាន់ថន ដែលចាប់ប្រពន្ធនិងកូនស្រី០២នាក់ឃុំនៅក្នុងផ្ទះ រួចចាក់សោទ្វារជាប់ពីខាងក្រៅនោះ ត្រូវបានកម្លាំងអធិការស្រុកសំឡូត ចាប់វាយខ្នោះនាំទៅកាន់អធិការភ្លាមៗ ដើម្បីសួរនាំនិងចាត់វិធានការតាមនីតិវិធី ៕
ចែករំលែកព័តមាននេះ