ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី ថ្លែងថាលោកបាននិយាយទូរស័ព្ទទៅលោកដូណាល់ត្រាំ និងពិភាក្សាគ្នាអំពីការខិតខំប្រឹងប្រែងដើម្បីសម្រេចឱ្យបាននូវការបិទបញ្ចប់សង្គ្រាមរយៈពេលជាង៤ឆ្នាំ។ ការសន្ទនាគ្នាលើកនេះធ្វើឡើងមុនកិច្ចប្រជុំកំពូលក្រុមប្រទេសជីប្រាំពីរនៅប្រទេសបារាំងនាសប្ដាហ៍នេះ។ លោកហ្សេឡិនស្គីបានបង្ហោះសារនៅលើតេឡេក្រាមថាលោកប្រាថ្នាចង់ជួបគ្នាជាមួយលោកត្រាំដើម្បីជូនពរថ្ងៃខួបកំណើតគម្រប់៨០ឆ្នាំ និងក៏អរគុណគាត់ដែលតែងតែជួយជ្រោមជ្រែងអ៊ុយក្រែនដើម្បីតស៊ូនៅក្នុងសង្គ្រាម។
លោកថាលោកសូមជូនពរលោកត្រាំឱ្យមានជោគជ័យលើគ្រប់វិស័យ ជាពិសេសកិច្ចខិតខំរបស់លោកក្នុងការបញ្ចប់សង្គ្រាមអ៊ុយក្រែនសូមឱ្យបានជោគជ័យដូចបំណង។ មុនពេលមានកិច្ចប្រជុំកំពូលជីប្រាំពីរនៅបារាំង លោកហ្សេឡិនស្គីថ្លែងថាលោកបានពិគ្រោះគ្នាជាមួយលោកត្រាំដើម្បីចង់ដឹងគោលជំហររបស់ក្រុមប្រទេសជាដៃគូ។ លោកថាយើងជជែកគ្នាអំពីការជួយអ្វីខ្លះដើម្បីនាំយកសន្តិភាព ហើយលោកក៏បានជម្រាបជូនលោកត្រាំអំពីសភាពការណ៍វិវត្តថ្មីៗនៅលើសមរភូមិយោធា និងការពង្រឹងកម្លាំងទ័ពរបស់អ៊ុយក្រែនផងដែរ។
ក្រោយមក លោកហ្សេឡិនស្គីថ្លែងថាលោក និងលោកត្រាំបានឯកភាពគ្នាថានឹងជួបគ្នាទ្វេភាគីនៅពេលលោកទាំង២អញ្ជើញទៅចូលរួមកិច្ចប្រជុំកំពូលជីប្រាំពីរ។ លោកថ្លែងថាវាជារឿងសំខាន់ដែលអាមេរិកត្រូវធានាថាខ្លួននៅតែបន្តគាំទ្រអ៊ុយក្រែនរហូតដល់មានកិច្ចព្រមព្រៀងសន្តិភាព។ ការជួយជ្រោមជ្រែងនេះគឺធ្វើឡើងទន្ទឹមគ្នាជាមួយក្រុមសម្ព័ន្ធមិត្តនៅអឺរ៉ុប។ នេះជាចំណុចសំខាន់ដែលយើងទាំងអស់គ្នាប្រាថ្នាចង់បាន ហើយវាជារឿងសំខាន់ដែលសង្គមអាមេរិកាំងគាំទ្រអ៊ុយក្រែនយ៉ាងពេញទំហឹង៕ ប្រភព៖ Reuters
ចែករំលែកព័តមាននេះ