ប្រទេសម៉ិកស៊ិក ៖ អាជ្ញាធរមូលដ្ឋានរាយការណ៍ កាលពីថ្ងៃទី១៣ មិថុនា ថា អភិបាលក្រុងមួយរូប ត្រូវបានបាញ់សម្លាប់ នៅតំបន់មួយនាភាគខាងត្បូងម៉ិកស៊ិក សម្បុករបស់បណ្ដាក្រុមរត់ពន្ទគ្រឿងញៀន។
ការបាញ់ប្រហារនោះ កើតមានក្នុងសង្កាត់មួយមានប្រជាជនជិត៧០០០នាក់ នៃរដ្ឋ OAXACA ជាប់ឆ្នេរមហាសមុទ្រប៉ាស៊ីហ្វិក កន្លែងដែលបណ្ដាក្រុមឧក្រិដ្ឋជនមានការចាត់តាំងតែងឈ្លោះដណ្ដើមគ្នាគ្រប់គ្រងផ្លូវរត់ពន្ធគ្រឿងញៀន ។ លោកJOEL BRAVO អភិបាលក្រុងសាន់មីហ្គែលអាម៉ាទីទីយ៉ាន់ ទទួលរងការបាញ់ប្រហារតែមិនមានការបញ្ជាក់ថា តើការបាញ់ប្រហារនោះស្ថិតក្នុងស្ថានភាពបែបណាឡើយ ។
អភិបាលរដ្ឋOAXACAលោកសាឡុម៉ុនហ្សារ៉ា បានថ្កោលទោសយ៉ាងម៉ឺងម៉ាត់ការបាញ់ប្រហារដ៏កំសាកនោះ សម្លាប់លោកJOEL BRAVO ។ លោកបន្តថារដ្ឋ OAXACAនឹងមិនបណ្ដោយឲ្យអំពើហិង្សារំលងច្បាប់ឬឆន្ទៈរបស់សហគមន៍យើងឡើយ។ ប៉ូលិសបានបើកធ្វើប្រតិបត្តិការជាមួយការដាក់ពង្រាយកម្លាំងដ៏ច្រើន ជាមួយការចូលរួមរបស់កងទ័ពសហព័ន្ធតាមរុករកចាប់ពួកជនវាយប្រហារ ។
ក្រុមរត់ពន្ធគ្រឿងញៀនដ៏ខ្លាំងក្រុម JALISCO NUEVA GENERACION និងក្រុម SINALOA មានវត្តមានក្នុងរដ្ឋOAXACA ។ អភិបាលក្រុងជិត១០០នាក់ ត្រូវបានធ្វើឃាតនៅម៉ិកស៊ិក ចាប់តាំងពីឆ្នាំ២០០៦មក។ ការបាញ់ប្រហារនាពេលថ្មីៗនេះសម្លាប់លោកកាឡូសម៉ាន់ហ្សូអភិបាលក្រុងមួយរូប ក្នុងតំបន់អ្នកមាននៃរដ្ឋ MICHOACAN នាំឲ្យមានប្រតិកម្មកក្រើកប្រទេស៕
ចែករំលែកព័តមាននេះ