កូនឈើជាង ២ពាន់ដើម ត្រូវបានដាំដុះដើម្បីស្តារគម្របព្រៃឈើនៃឧទ្យានជាតិវិរៈជ័យ សម្រាប់អ្នកជំនាន់ក្រោយ
- ស្ទឹងត្រែង
ខេត្តស្ទឹងត្រែង ៖ គម្រោងស្តារនិងបង្កើតគម្របព្រៃឈើពណ៌បៃតងឡើងវិញ នៅក្នុងតំបន់ការពារធម្មជាតិ កំពុងតែបោះជំហានទៅមុខយ៉ាងសកម្ម តាមរយៈការរួមគ្នារវាងស្ថាប័នរដ្ឋ និងកម្លាំងសហគមន៍មូលដ្ឋាន។
កាលពីថ្ងៃទី១៣-១៤ ខែមិថុនា ឆ្នាំ២០២៦ កន្លងទៅនេះ ការិយាល័យឧទ្យានជាតិ បានប្រគល់កូនឈើចំរុះចំនួន ២,០១៤ ដើម ជូនទៅដល់សហគមន៍តំបន់ការពារធម្មជាតិអូរចាយ និងក្រុមយុវជនឃុំសន្តិភាព ដែលជាបងប្អូនជនជាតិដើមភាគតិច ដើម្បីបើកយុទ្ធនាការដាំដើមឈើនៅតាមទីសាធារណៈ និងស្តារគម្របព្រៃឈើឡើងវិញ នៅក្នុងតំបន់ឧទ្យានជាតិវិរៈជ័យ។
យុទ្ធនាការណ៍នាពេលនេះ មិនត្រឹមតែជាការបំពេញបន្ថែមនូវដង្ហើមបៃតងដល់ភពផែនដីប៉ុណ្ណោះទេ ប៉ុន្តែវាគឺជាការវិនិយោគដ៏មានតម្លៃមិនអាចកាត់ថ្លៃបានសម្រាប់អនាគត។ ការដាំកូនឈើមួយដើមនៅថ្ងៃនេះ គឺជាការធានានូវការផ្តល់ខ្យល់បរិសុទ្ធ ភាពសម្បូរបែបនៃជីវៈចម្រុះ និងការរក្សានូវលំនឹងប្រព័ន្ធអេកូឡូស៊ីសម្រាប់ថ្ងៃស្អែក។ ព្រៃឈើពណ៌បៃតង គឺជាខែលការពារធម្ម
ជាតិដ៏រឹងមាំ ប្រឆាំងនឹងការប្រែប្រួលអាកាសធាតុ និងជាប្រភពទ្រទ្រង់ជីវភាពដ៏ចម្បងរបស់សហគមន៍មូលដ្ឋាន។
តំណាងការិយាល័យឧទ្យានជាតិ បានសម្តែងនូវការកោតសរសើរ យ៉ាងជ្រាលជ្រៅចំពោះបងប្អូនសហគមន៍ និងក្រុមយុវជនជនជាតិដើមភាគតិចទាំងអស់ ដែលតែងតែបង្ហាញស្មារតីម្ចាស់ការ និងឈរនៅជួរមុខក្នុងការការពារ ក៏ដូចជាអភិរក្សធនធានធម្មជាតិ។
សកម្មភាពដ៏ថ្លៃថ្នូរនេះ គឺជាគំរូដ៏ល្អស្រស់បំព្រងក្នុងការបណ្តុះគំនិតស្រឡាញ់ធម្មជាតិ និងការការពារផលប្រយោជន៍ព្រៃឈើទុកជាមរតកដ៏មានតម្លៃមហាសាលសម្រាប់កូនចៅជំនាន់ក្រោយផងដែរ៕
ចែករំលែកព័តមាននេះ