ក្រោយការចុះផ្សាយរបស់កោះសន្តិភាព កន្លែងលក់សត្វព្រៃត្រូវបានមន្ត្រីបរិស្ថានចុះបង្ក្រា.ប
- កំពង់ឆ្នាំង
ខេត្តកំពង់ឆ្នាំង ៖ ក្រោយសារព័ត៌មាន កោះសន្តិភាពបានចុះផ្សាយអំពីការដាក់តាំងលក់ សាច់សត្វព្រៃ និងសត្វស្រុកបន្លំជាសត្វព្រៃ នៅតាមដងផ្លូវជាតិលេខ៥ ចន្លោះគីឡូម៉ែត្រលេខ៧២-៧៣ ស្ថិតក្នុងភូមិអូរសណ្ដាន់ ឃុំទឹករហូត ស្រុករលាប្អៀរ ពេលនេះត្រូវបានមន្ត្រីជំនាញ ស្ទុះស្ទាចុះបង្ក្រាបហើយ ។ គួររំលឹកថា ហាមណាស់ កាន់តែហ៊ា.ន! ដាក់លក់យ៉ាងអនាធិបតេយ្យ
យោងតាមសេចក្តីរាយការណ៍របស់លោក ឈឺន វុធ ប្រធានមន្ទីរបរិស្ថានស្ដីទីខេត្តកំពង់ឆ្នាំង បានរាយការណ៍ឱ្យដឹងថា កាលពីថ្ងៃទី១១ ខែមិថុនា ឆ្នាំ២០២៦ រូបលោកបានដឹកនាំ មន្ត្រីការិយាល័យតំបន់ប្រើប្រាស់ច្រើនយ៉ាង និងមន្ត្រីការិយាល័យដែនជម្រកសត្វព្រៃភ្នំឱរ៉ាល់ ដោយមានការចូលរួមពីមន្ត្រីខណ្ឌរដ្ឋបាលព្រៃឈើនៃមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំង បានចុះត្រួតពិនិត្យនិងបង្ក្រាបការជួញដូរសត្វព្រៃតាមដងផ្លូវជាតិលេខ៥ នៅចំណុចដូចបានរៀបរាប់ខាងលើ ដោយបានឃើញតូបចំនួន៥ នៅសងខាងផ្លូវជាតិ មានចងភ្ជួរដាក់តាំងលក់សត្វព្រៃ និងសត្វស្រុកបន្លំជាសត្វព្រៃមួយចំនួន ។
ក្រោយការពិនិត្យ មន្ត្រីជំនាញបានដកហូតសត្វពស់ចាន់តាមម២ក្បាល សត្វពស់សាំងសឿ ចំនួន៥ក្បាល សត្វពស់ព្រៃ១ក្បាល សត្វព្រាបងាប់ចំនួន១៥ក្បាល សត្វខ្វែកងាប់ចំនួន១ក្បាល សត្វត្រកួតរស់១ក្បាល សត្វឆ្មាងាប់បន្លំជាសត្វខ្លាត្រី ចំនួន២ក្បាល សត្វននាលខ្យងងាប់១ក្បាល សត្វថ្លុំរស់ចំនួន៣ក្បាល សត្វថ្លុំងាប់១ក្បាល និងសត្វជៀសចំនួន៤១ក្បាល ។
របាយការណ៍ដដែលបានបញ្ជាក់ថា ក្រោយការដកហូតក្រុមការងារបានសម្រេចយកសត្វដែលងាប់យកទៅដុតចោលនៅស្នាក់ការតំបន់ប្រើប្រាស់ច្រើនយ៉ាងនៅភ្នំនាងកង្រីភ្នំទូកមាស និងសត្វដែលនៅរស់យកទៅលែង នៅតំបន់ដែលទទួលបានការសហការគ្រប់គ្រងនិងអភិរក្សធនធានធម្មជាតិ របស់សមាគមទូកមាសកង្រី នៃតំបន់ប្រើប្រាស់ច្រើនយ៉ាងភ្នំនាងកងរីភ្នំទូកមាស ស្ថិតក្នុងភូមិដំណាក់កកោះ ឃុំពោធិ៍ ស្រុកកំពង់លែង ។ ការងារនេះ ដោយមានការចូលរួមពីអាជ្ញាធរ និងសមាជិកសមាគមទូកមាសកង្រី ព្រមទាំងមានការនិមន្តចូលរួមពីព្រះសង្ឃផងដែរ ។ មន្ទីរបរិស្ថានសន្យានិងបន្តចុះបង្ក្រាបករណីនេះជាបន្តបន្ទាប់ទៀត ៕
ចែករំលែកព័តមាននេះ