ទីក្រុងវ៉ាស៊ីនតោន៖ នៅទីបំផុត អាមេរិក និងអ៊ីរ៉ង់បានឯកភាពគ្នាទទួលយកកិច្ចព្រមព្រៀងសន្តិភាពដើម្បីបិទបញ្ចប់សង្គ្រាមជាស្ថាពរ ហើយទំនាក់ទំនងរវាងប្រទេសទាំង២ទៅថ្ងៃមុខនឹងកែលម្អយ៉ាងដូចម្ដេចទៀតអាចនឹងដឹងនៅក្នុងពេលឆាប់ៗនេះ។ លោកត្រាំបង្ហោះសារនៅលើបណ្ដាញសង្គមថាអាមេរិក និងអ៊ីរ៉ង់បានឈានដល់កិច្ចព្រមព្រៀងដ៏ពេញលេញមួយ។ សូមបញ្ជាក់ឡើងវិញថាភាគីទាំង២ព្រមព្រៀងគ្នាទៅលើក្របខណ្ឌជាគោលៗសិន។ ក្នុងនោះ អាមេរិកយល់ព្រមបិទបញ្ចប់ការបិទខ្ទប់ដែនសមុទ្រអ៊ីរ៉ង់ ចំណែកអ៊ីរ៉ង់យល់ព្រមបើកច្រកសមុទ្រហ័រម៉ូសឡើងវិញ។
នាយករដ្ឋមន្ត្រីប៉ាគីស្ថានដែលជាអ្នកសម្របសម្រួលការចរចាគ្នាលើកនេះបង្ហោះសារនៅលើបណ្ដាញសង្គមថាកិច្ចព្រមព្រៀងនេះនឹងចុះហត្ថលេខានៅប្រទេសស្វីសនាថ្ងៃសុក្រសប្ដាហ៍នេះ។ រហូតមកដល់ពេលនេះ គេមិនទាន់ដឹងច្បាស់ថានៅក្នុងកិច្ចព្រមព្រៀងមានសរសេរអ្វីខ្លះទេ។ ប៉ាគីស្ថានបង្ហោះសារបន្តទៀតថាតាមកិច្ចព្រមព្រៀងនេះ រាល់ប្រតិបត្តិការសឹកទាំងអស់នឹងត្រូវបិទបញ្ចប់គ្រប់សមរភូមិរួមទាំងនៅប្រទេសលីបង់ផងដែរ។ លីបង់ជាចំណុចដែលពិបាកចរចាគ្នាព្រោះអ៊ីស្រាអែល និងក្រុមហេសបូឡាមិនខ្វល់នឹងការអំពាវនាវរបស់លោកត្រាំ និងអ្នកឯទៀតដែលចង់ឱ្យពួកគេបញ្ឈប់ការប្រយុទ្ធគ្នា។
លោកត្រាំថ្លែងថាច្រកសមុទ្រហ័រម៉ូសនឹងបើកដំណើរការឡើងវិញនៅថ្ងៃសុក្រ។ លោកអំពាវនាវថាកប៉ាល់ទូទាំងពិភពលោក សូមអ្នកត្រៀមបញ្ឆេះម៉ាស៊ីនឡើងវិញ។ ចូរអ្នកដឹកជញ្ជូនប្រេងឆៅកាត់ទីនោះ។ ក្រោយពេលលេចឮដំណឹងនេះ ប្រេងឆៅធ្លាក់ថ្លៃព្រឹបៗតែម្ដង។ ប្រេងតាមហាងឆេងនៅអឺរ៉ុប (Brent) ធ្លាក់ថ្លៃ៤%នៅពេលបើកទីផ្សារជួញដូរនៅព្រឹកនេះ ចំណែកប្រេងតាមហាងឆេងអាមេរិក (West Texas) ធ្លាក់ថ្លៃ៤,៦%។ អនុរដ្ឋមន្ត្រីការបរទេសអ៊ីរ៉ង់ថ្លែងថាកិច្ចព្រមព្រៀងលម្អិតត្រូវការការចរចាគ្នាបន្ថែមទៀតនៅអំឡុងពេលបទឈប់បាញ់រយៈពេល៦០ថ្ងៃ។
បញ្ហានុយក្លេអ៊ែរអ៊ីរ៉ង់ក៏នឹងលើកយកទៅចរចាគ្នានៅអំឡុង៦០ថ្ងៃនោះផងដែរ។ បញ្ហាអ៊ីរ៉ង់បានក្លាយជាកត្តាកំណត់អាជីពនយោបាបយរបស់លោកត្រាំ។ ក្រុមអ្នកសាធារណរដ្ឋនិយមនៅក្នុងសភាខង់ហ្ក្រែស និងសាធារណមតិកំពុងរង់ចាំអ៊ុតលទ្ធផលចរចា។ ពួកគេមានចិត្តខឹងសម្បារនឹងសាំងឡើងថ្លៃចំពេលដែលជិតឈានដល់ការបោះឆ្នោតសភានៅអាមេរិក។ លោកត្រាំទទួលរងសម្ពាធពីមនុស្សនៅក្នុងគណបក្សជាមួយគ្នា។ ពួកគេចង់បិទទាំងស្រុងនូវកម្មវិធីនុយក្លេអ៊ែររបស់អ៊ីរ៉ង់៕ ប្រភព៖ Reuters
ចែករំលែកព័តមាននេះ