សហរដ្ឋអាមេរិក ៖ នៅទីបំផុត លោក Elon Musk បានក្លាយជាមហាសេដ្ឋីប្រាក់ទ្រីលានដុល្លារអាមេរិកដំបូងគេបង្អស់នៅលើពិភពលោក កាលពីថ្ងៃទី១២ ខែមិថុនា ឆ្នាំ២០២៦ (ម៉ោងនៅសហរដ្ឋអាមេរិក) បន្ទាប់ពីភាគហ៊ុនក្នុងក្រុមហ៊ុនបច្ចេកវិទ្យាអវកាស SpaceX របស់លោកបានហក់ឡើងខ្ពស់បំផុតមិនធ្លាប់មាននៅក្នុងទីផ្សារភាគហ៊ុន Wall Street អំឡុងពេលនៃការបើកលក់ភាគហ៊ុនជាសាធារណៈលើកដំបូងរបស់ខ្លួន។ នេះបើយោងតាមប្រភពពី BBC និង AP ចេញផ្សាយកាលពីថ្ងៃទី១៣ ខែមិថុនា ឆ្នាំ២០២៦។
យោងតាមបញ្ជីអ្នកមានរបស់គេហទំព័រ Bloomberg បានបង្ហាញថា ស្ថាបនិកក្រុមហ៊ុន Tesla និង SpaceX រូបនេះ បានពង្រឹងឋានៈរបស់ខ្លួនយ៉ាងរឹងមាំជាបុគ្គលមានបំផុតនៅលើពិភពលោក ដោយទ្រព្យសម្បត្តិសរុបរបស់លោកឥឡូវនេះ បានកើនដល់ ១,១១ ទ្រីលានដុល្លារអាមេរិកហើយ។
ព្រឹត្តិការណ៍ជាប្រវត្តិសាស្ត្រនេះ បានកើតឡើងខណៈពេលដែលក្រុមហ៊ុនបច្ចេកវិទ្យាអវកាស ទូរគមនាគមន៍ និងបញ្ញាសិប្បនិម្មិត (AI) ដ៏ល្បីល្បាញរបស់សហរដ្ឋអាមេរិក SpaceX បានចុះបញ្ជីក្នុងផ្សារភាគហ៊ុន Nasdaq ដែលមានតម្លៃដល់ ២,២ ទ្រីលានដុល្លារ។ ក្រុមហ៊ុនបញ្ជាក់ថា ភាគហ៊ុនរបស់ខ្លួននឹងត្រូវដាក់លក់ក្នុងតម្លៃ ១៣៥ ដុល្លារក្នុង១ភាគហ៊ុន ប៉ុន្តែការជួញដូរបានបើកដំណើរការក្នុងតម្លៃ ១៥០ ដុល្លារ និងបានហក់ឡើងដល់ ១៧៦,៥០ ដុល្លារត្រឹមតែមួយភ្លែត ដែលបង្ហាញពីភាពចង់បានខ្លាំងរបស់អ្នកវិនិយោគ ចំពោះអាជីវកម្មខ្នាតធំទាក់ទងនឹងលំហអាកាស និងក្រុមហ៊ុននានាដែលពាក់ព័ន្ធនឹងលោក Elon Musk ផ្ទាល់តែម្តង។
ភាគហ៊ុនរបស់ក្រុមហ៊ុន SpaceX បានបិទការជួញដូរ កាលពីថ្ងៃទី១២ ខែមិថុនា (ម៉ោងនៅសហរដ្ឋអាមេរិក) ក្នុងតម្លៃប្រហែល ១៦១ដុល្លារ ហើយការបោះផ្សាយលក់មូលបត្រជាសាធារណៈលើកដំបូងរបស់ក្រុមហ៊ុននេះ រកចំណូលបានដល់ ៧៥ ពាន់លានដុល្លារឯណោះពីបណ្តាអ្នកវិនិយោគ និងអ្នកធានាទិញមូលបត្រនៃកិច្ចព្រមព្រៀងនេះ មុនពេលភាគហ៊ុនរបស់ក្រុមហ៊ុនបានវាយលុកចូលទីផ្សារភាគហ៊ុនសេរី កាលពីថ្ងៃទី១២ ខែមិថុនា កន្លងទៅ និងជាការបោះផ្សាយលក់មូលបត្រជាសាធារណៈមានតម្លៃខ្ពស់បំផុតលើពិភពលោកផងដែរ។ បំបែកកំណត់ត្រាកាលពីឆ្នាំ ២០១៩ របស់ក្រុមហ៊ុនប្រេង Saudi Aramco របស់ប្រទេសអារ៉ាប៊ីសាអូឌីត ចំនួន ២៥,៦ ពាន់លានដុល្លារ។
តាមរយៈនោះ ភាគហ៊ុនកម្មសិទ្ធិ ៤២% របស់លោក Elon Musk ក្នុងក្រុមហ៊ុន SpaceX ផ្តល់ឱ្យលោកនូវសិទ្ធិគ្រប់គ្រងស្ទើរទាំងស្រុងលើអ្វីៗគ្រប់យ៉ាងដែលក្រុមហ៊ុនធ្វើ ហើយលោកអាចចំណាយប្រាក់ដែលត្រូវបានវិនិយោគនោះ តាមអ្វីដែលលោកចង់បាន។
បើតាម Bloomberg ភាគហ៊ុនរបស់លោក Elon Musk ក្នុងក្រុមហ៊ុននេះ មានតម្លៃរហូតដល់ ៧៦៧,១ ពាន់លានដុល្លារ ជាមួយជម្រើសទិញយកភាគហ៊ុនបន្ថែមទៀតក្នុងតម្លៃ ៥៣,៨ ពាន់លានដុល្លារ។ ក្រៅអំពីនោះ លោកក៏មានភាគហ៊ុនតម្លៃ ១៦៨ ពាន់លានដុល្លារក្នុងក្រុមហ៊ុន Tesla និងជម្រើសទិញភាគហ៊ុនរបស់ Tesla តម្លៃ ១១៦,៤ ពាន់លានដុល្លារបន្ថែមទៀតផងដែរ៕
ចែករំលែកព័តមាននេះ