កុំឱ្យខាតបង់លុយកាក់ ! មកដឹងពីល្បិចបោកប្រាស់«ទារលុយសេវាមុន» ៣ទម្រង់ និងវិធីសាស្ត្រការពារខ្លួន
- ភ្នំពេញ
រាជធានីភ្នំពេញ ៖ ការបោកប្រាស់ប្រភេទនេះ គឺជាល្បិចដែលជនល្មើសបញ្ចុះបញ្ចូលឱ្យជនរងគ្រោះ «បង់ប្រាក់ថ្លៃសេវាជាមុន» ដើម្បីទទួលបានរង្វាន់ ផលចំណេញ ឬកម្ចី ។ ផ្ទុយទៅវិញ ក្រោយពេលបានលុយហើយ ជនល្មើសនឹងបន្តទារថែមមិនចេះចប់ និងមិនផ្តល់អ្វីត្រឡប់មកវិញឡើយ ។ នេះបើយោងតាមផេកអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានប្រកាសនាព្រឹកថ្ងៃទី១៤ ខែមិថុនានេះ។
អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានបន្តថា ក្រុមការងារបច្ចេកទេស នាយកដ្ឋានការពារសុវត្ថិភាពបច្ចេកវិទ្យាឌីជីថល នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សូមចែករំលែកល្បិច ៣ យ៉ាងដែលជនបោកប្រាស់ចូលចិត្តប្រើ ៖
១. ឈ្នះរង្វាន់ធំ ៖ ភូតកុហកថាអ្នកឈ្នះរង្វាន់ (ឡាន, លុយសុទ្ធ, ទូរស័ព្ទ) ប៉ុន្តែតម្រូវឱ្យបង់ «ថ្លៃសេវារដ្ឋបាល» ឬ «ពន្ធ» ជាមុនទើបដកបាន។
២. កម្ចីប្រាក់ងាយៗ៖ ផ្សាយពាណិជ្ជកម្មឱ្យខ្ចីលុយការប្រាក់ទាបខ្លាំងតាមអនឡាញ ប៉ុន្តែតម្រូវឱ្យបង់ «ថ្លៃធ្វើឯកសារ» មុនទើបទទួលបានប្រាក់កម្ចី។
៣. ការទទួលមរតក ឬការវិនិយោគ៖ មានការអះអាងថាមានមរតកមហាសាល ឬឱកាសរកស៊ីចំណេញសន្ធឹកសន្ធាប់ ប៉ុន្តែសុំលុយបន្តិចបន្តួចដើម្បី «ដំណើរការរត់ការច្បាប់»។
អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានបន្តថា វិធានការការពារខ្លួន៖
-ចងចាំ៖ គ្មានការទទួលបានណា ដែលតម្រូវឱ្យយើងវេរលុយឱ្យគេមុននោះឡើយ។
-កុំជឿ៖ រាល់ការសន្យាដែលមើលទៅ «ល្អពេកមិនគួរឱ្យជឿ» ដូចជាឈ្នះរង្វាន់ធំ ឬចែកមរតកពីបុគ្គលមិនស្គាល់អត្តសញ្ញាណ។-កុំប្រញាប់៖ កុំផ្ញើប្រាក់ឱ្យនរណាម្នាក់ដែលព្យាយាមគាបសង្កត់ ឬបង្ខំឱ្យអ្នកធ្វើភ្លាមៗ។
-កុំចែករំលែក៖ ដាច់ខាតកុំផ្តល់ព័ត៌មានផ្ទាល់ខ្លួន ដូចជា គណនីធនាគារ, លេខកូដ OTP, លេខទូរស័ព្ទ និងលេខកាត Visa/Mastercard ទៅឱ្យអ្នកដទៃ។
-ពិភាក្សា៖ ត្រូវសួរនាំក្រុមគ្រួសារ ឬមិត្តភក្តិសិន មុននឹងសម្រេចចិត្តផ្ញើលុយទៅបុគ្គលប្លែកមុខ ៕
ចែករំលែកព័តមាននេះ