រថយន្ត LEXUS បុ.កម៉ូតូបើកស្របទិសគ្នា ស្លា.ប់បុរសម្នាក់
- ស្ទឹងត្រែង
ខេត្តស្ទឹងត្រែង៖ បុរសម្នាក់បានបាត់បង់ជីវិតយ៉ាងអាណោចអាធ័មនៅក្នុងហេតុការណ៍គ្រោះថ្នាក់ចរាចរណ៍មួយ បន្ទាប់ពីត្រូវរថយន្តស៊េរីទំនើបមួយគ្រឿងបុកពីក្រោយ ក្នុងខណៈពេលកំពុងធ្វើដំណើរស្របទិសគ្នា លើកំណាត់ផ្លូវជាតិលេខ៧។
ហេតុការណ៍ដ៏រន្ធត់នេះបានកើតឡើងកាលពីវេលាម៉ោង ១១និង៣០ នាទីថ្ងៃត្រង់ ថ្ងៃទី១៤ ខែមិថុនា ឆ្នាំ២០២៦ ត្រង់ចំណុចចន្លោះបង្គោលគីឡូម៉ែត្រលេខ ៤៩០-៤៩១ ដែលស្ថិតក្នុងភូមិវាលព្រីង ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។
យោងតាមរបាយការណ៍បឋមពីសមត្ថកិច្ចមូលដ្ឋាន បានឱ្យដឹងថា ករណីគ្រោះថ្នាក់ចរាចរណ៍ខាងលើនេះ បង្កឡើងដោយរថយន្តមួយគ្រឿងម៉ាក LEXUS RX 300 ពណ៌ខ្មៅ ពាក់ស្លាកលេខ ភ្នំពេញ 2V-7326 បើកបរដោយស្ត្រីឈ្មោះ ផុន រ៉ា អាយុ ៣៣ ឆ្នាំ ជនជាតិខ្មែរ មុខរបរកម្មកររោងចក្រ មានស្រុកកំណើតនៅភូមិស្រឡូងស្រឡី ឃុំស្មោងខាងត្បូង ស្រុកកំចាយមារខេត្តព្រៃវែង។ក្នុងរថយន្តបង្ក មានអ្នករួមដំណើរ ម្នាក់ទៀតជាជនជាតិចិន ភេទប្រុស អាយុ ៤៥ ឆ្នាំ ឈ្មោះ FANG QIURONG ស្នាក់នៅអាសយដ្ឋានជាមួយគ្នា។លុះធ្វើដំណើរមកដល់ចំណុចកើតហេតុខាងលើ រថយន្តបានជ្រុលទៅបុកម៉ូតូមួយគ្រឿង ដែលកំពុងបើកបរស្របទិសគ្នាពេញទំហឹងតែម្តង។
អ្នកបើកបរម៉ូតូរងគ្រោះត្រូវបានស្គាល់អត្តសញ្ញាណឈ្មោះ សុវណ្ណ ណា ភេទប្រុស អាយុ ៥៥ ឆ្នាំ មុខរបរកសិករ រស់នៅភូមិកញ្ចាញគោក ឃុំស្រែសំបូរ ស្រុកសៀមប៉ាង ខេត្តស្ទឹងត្រែង ស្លាប់បាត់បង់ជីវិតភ្លាមៗនៅនឹងកន្លែងកើតហេតុ ខណៈមធ្យោបាយធ្វើដំណើរទាំងពីររងការខូចខាតកម្រិតមធ្យម។
បច្ចុប្បន្ន សពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារ ដើម្បីដឹកជញ្ជូនយកទៅធ្វើបុណ្យតាមប្រពៃណីនៅស្រុកកំណើត។ ចំណែកឯវត្ថុតាងទាំងរថយន្ត និងម៉ូតូ ត្រូវបានកម្លាំងជំនាញវាស់វែង និងដកហូតទៅរក្សាទុកនៅអធិការដ្ឋាននគរបាលស្រុកបុរីអូរស្វាយសែនជ័យ ជាបណ្តោះអាសន្ន ដើម្បីបន្តនីតិវិធីច្បាប់។
ករណីគ្រោះថ្នាក់ដ៏រន្ធត់នេះ គឺជាការដាស់តឿនមួយដ៏សំខាន់សម្រាប់អ្នកប្រើប្រាស់ដងផ្លូវទាំងអស់ ជុំវិញការគោរពច្បាប់ចរាចរណ៍ផ្លូវគោក នៃព្រះរាជាណាចក្រកម្ពុជា៖ យោងតាមច្បាប់ អ្នកបើកបរយានយន្តគ្រប់រូបត្រូវតែរក្សាគម្លាតសុវត្ថិភាពខាងមុខយានយន្តរបស់ខ្លួន ទៅនឹងយានយន្តដទៃទៀត ដែលកំពុងធ្វើដំណើរស្របទិសគ្នា ដើម្បីអាចមានលទ្ធភាពជាន់ហ្វ្រាំង ឬបញ្ចៀសគ្រោះថ្នាក់បានទាន់ពេលវេលា នៅពេលមានហេតុការណ៍បន្ទាន់។ការបើកបរខ្វះការប្រុងប្រយ័ត្ន ឬក្នុងល្បឿនលឿនដែលមិនអាចគ្រប់គ្រងស្ថានការណ៍បាន គឺជាឫសគល់នៃគ្រោះថ្នាក់។
ផ្លូវជាតិលេខ៧ គឺជាសរសៃឈាមសេដ្ឋកិច្ចដ៏សំខាន់ដែលមានការចរាចរណ៍មមាញឹក។ អ្នកបើកបររថយន្តធំ ឬរថយន្តល្បឿនលឿន ត្រូវតែបង្កើនការយកចិត្តទុកដាក់ និងផ្តល់អាទិភាពដល់អ្នកបើកបរយានយន្តធុនតូច ដូចជាម៉ូតូ ឬកង់ ដែលជាក្រុមងាយរងគ្រោះបំផុតនៅលើដងផ្លូវ។
នៅពេលបើកបរឆ្លងកាត់តំបន់ភូមិករ ឬឃុំស្រុកអ្នកបើកបរត្រូវតែបន្ថយល្បឿនជាដាច់ខាត ដើម្បីធានាថាខ្លួនអាចគ្រប់គ្រងយានយន្តបាន១០០%ជៀសវាងការធ្វេសប្រហែសត្រឹមមួយប៉ព្រិចភ្នែក ដែលអាចបង្កជាសោកនាដកម្មពេញមួយជីវិត និងត្រូវប្រឈមមុខចំពោះមុខច្បាប់យ៉ាងធ្ងន់ធ្ងរ៕
ចែករំលែកព័តមាននេះ