ពេលនេះ! សហគមន៍ទុរេនបែកអន្លូងមានQRបិទសម្គាល់ហើយខណៈអាជ្ញាធររឹតបន្តឹង និងទប់ស្កាត់ការនាំទុរេនក្រៅមកបន្លំ
- កំពង់ចាម
ខេត្តកំពង់ចាម ៖ «សម្រាប់គោលការណ៍របស់រដ្ឋបាលខេត្តគឺចង់បានឲ្យម្ចាស់ចម្ការប្រមាណជាង២០០០ហិកតា ក្នុងស្រុកស្ទឹងត្រង់ទាំងមូលចូលជាសមាជិកដើម្បីទទួលបានខេមហ្គេត»។ នេះជាប្រសាសន៍លើកឡើងពីសំណាក់ឯកឧត្តមអ៊ុន ចាន់ដា អភិបាលខេត្តក្នុងឱកាសជួបសំណេះសំណាល់ជាមួយកសិករជាម្ចាស់ចម្ការទុរេនក្នុង«សហគមន៍ទុរេនបែកអន្លូង»ក្នុងឃុំអារក្សត្នោត ស្រុកស្ទឹងត្រង់ ដោយធ្វើឡើងនាព្រឹកថ្ងៃទី១៣មិថុនាឆ្នាំ២០២៦។ ជាមួយនោះក៏មានការអញ្ជើញចូលរួមពីសំណាក់ឯកឧត្តមសៀក ឡេង អនុរដ្ឋលេខាធិការក្រសួងកសិកម្មតំណាឲ្យរដ្ឋមន្ត្រីក្រសួងកសិកម្មរួមទាំងក្រុមបច្ចេកទេសផងដែរ។
ឯកឧត្តមអ៊ុន ចាន់ដា អភិបាលខេត្តមានប្រសាសន៍លើកឡើងថា ក្នុងពេលដែលរូបលោកបានធ្វើដំណើរតាមដងផ្លូវនិងបានចុះសួរនាំអ្នកលក់ដូរទុរេនក៏ជួបស្ត្រីម្នាក់ដែលមកពីខេត្តកំពត បានដើរម៉ៅចំការទុរេននៅបែកអន្លូង យកមកលក់ដូរនៅតូបរបស់គាត់ តែមិនទាន់បានចូលជាសមាជិកសហគមន៍ទុរេនបែកអន្លូងនៅឡើយ។ ក្រោយពីមានការរឹតបន្តឹងបានដឹកនាំដោយលោកឡោ ចាន់លី អភិបាលរងខេត្ត បានធ្វើការបង្ក្រាបរថយន្តដឹកទុរេនពីខាងក្រៅ២រថយន្តដែលបន្លំថាជាទុរេនបែកអន្លូង។
ឯកឧត្តមអភិបាលខេត្តមានប្រសាសន៍បន្តថា ដើម្បីជៀសវាងសកម្មភាពការនាំទុរេនពីក្រៅមកក្លែងបន្លំត្រូវបានលោកមេឃុំអារក្សត្នោត បានចុះពិនិត្យតាមកន្លែងលក់ដូរព្រមទាំងបានចុះហត្ថលេខាទទួលស្គាល់ពួកគាត់ពិតជាបានលក់ទុរេនបែកអន្លូង។ដោយមានការយកចិត្តទុកដាក់ពីសំណាក់អាជ្ញាធរក៏ដូចជាជំនាញមន្ទីរពាណិជ្ជកម្មខេត្ត តាមរយៈការស្នើសុំទីបំផុតត្រូវបានកម្លាំងរបស់ក្រសួងកសិកម្មចុះបង្ហាត់បង្រៀនពីបច្ចេកទេសដាំដុះខេមហ្គេត ហើយនិងទទួលបាន QR សម្រាប់បិទលើផ្លែទុរេននេះជាជោគជ័យជំហានដំបូង។នៅពេលខាងមុខនិងអញ្ជើញរដ្ឋមន្ត្រីក្រសួងកសិកម្មនិងរដ្ឋមន្ត្រីក្រសួងពាណិជ្ជកម្មចុះមកដើម្បីប្រកាសទទួលស្គាល់ស្លាកសញ្ញា ដូច្នេះកសិករម្នាក់ៗត្រូវតែរក្សាពីគុណតម្លៃនិងគុណភាពដើម្បីជៀសវាងការថ្លែងបន្លំ។ មួយវិញទៀតពេលដែលបិទស្លាកសញ្ញា(QR)លើផ្លែទុរេនគឺបងប្អូនអាចនាំតែលក់បាននៅផ្សារទំនើបដូចជាអ៊ីអន នៅរាជធានីភ្នំពេញជាដើម។ សម្រាប់ចំការនៅក្នុងស្រុកស្ទឹងត្រង់និងចម្ការលើគឺមានរហូតដល់ជាង៣០០០ហិចតា ហើយអ្នកដែលចូលសហគមន៍នៅបែកអន្លង់ទើបតែបានចំនួន១៦១នាក់ ស្មើប្រមាណ៣០% ប៉ុណ្ណោះ។តាមគោលការណ៍របស់រដ្ឋបាលខេត្តគឺចង់ឃើញផុតពីផ្លែទុរេនដល់សាវម៉ាវព្រមទាំងផលផ្លែផ្សេងៗទៀតតាមរដូវកាល ដើម្បីឱ្យបែកអន្លូងក្លាយទៅជាតំបន់កសិកទេសចរណ៍មានបងប្អូនប្រជាពលរដ្ឋមកពីគ្រប់ទិសទីលេងនៅតំបន់នេះដែលមានភាពអ៊ូអរ។
ឯកឧត្តមសៀក ឡេង អនុរដ្ឋលេខាធិការក្រសួងកសិកម្មវិញមានប្រសាសន៍ឲ្យដឹងដែរថា ផ្អែកតាមរបាយការណ៍ពីមន្ត្រីថ្នាក់ក្រោមរបស់លោកដែលទទួលបានគឺមានចម្ការទុរេននៅបែកអន្លូងចំនួន៧ចំការ ដែលទទួលបានខេមហ្គេតសម្រាប់បិទនៅលើផ្លែទុរេន ដើម្បីបញ្ជាក់ថាការដាំដុះគឺអនុវត្តត្រឹមត្រូវតាមបច្ចេកទេសនិងស្តង់ដារ ។ហើយនីតិវិធីនៃការស្នើសុំខេមហ្គេត ក៏មិនមានលក្ខណៈងាយស្រួល ដែលទាមទារចំណាយពេលច្រើន។ ដូច្នេះពេលដែលបាន sticker បិទនៅលើផ្លែទុរេនទៅដល់ទីណាក៏គេទទួលស្គាល់ពីគុណភាពដែរ។ សព្វថ្ងៃមន្ត្រីកសិកម្មត្រូវបានដាក់ពង្រាយនៅតាមបណ្ដាឃុំទូទាំងប្រទេសកម្ពុជាមានរហូតដល់១៦០០ នាក់ មួយទៀតប្រព័ន្ធថ្មីដែលមានលក្ខណៈបែបទំនើប អាចឲ្យយើងដឹងពីប្រភពទុរេននិងលក់ទៅដល់ទីណាក៏ដឹងហើយគ្រោងនឹងសាកល្បងនៅក្នុងសហគមន៍ទុរេនបែកអន្លូងមុនគេ ៕
ចែករំលែកព័តមាននេះ