ទំនាស់ពាក្យសម្ដីគ្នាពេលផឹកស៊ី ផ្ទុះហិ.ង្សាកា.ប់ស្លា.ប់ម្នាក់
- ត្បូងឃ្មុំ
ខេត្តត្បូងឃ្មុំ ៖ ជនសង្ស័យម្នាក់ដែលជាប់ចោទបានប្រើកាំបិតកាប់គូរជម្លោះពេលផឹកស៊ីជាមួយគ្នាបណ្ដាលឱ្យស្លាប់ក្នុងថ្លុកឈាមក្នុងឃុំជីគរ ស្រុកត្បូងឃ្មុំត្រូវបានកម្លាំងសមត្ថកិច្ចបញ្ជូនទៅដល់សាលាដំបូងខេត្តហើយនាព្រឹកថ្ងៃទី១២ កក្កដា ឆ្នាំ២០២៦ ដើម្បីសួរនាំ។
លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំ បានប្រាប់ឲ្យដឹងថា កាលពីយប់ថ្ងៃទី៨ ខែកក្កដា ឆ្នាំ២០២៦ វេលាម៉ោងប្រមាណ ៥ល្ងាចនៅចំណុចមុខផ្ទះឈ្មោះ អ៊ឹម ឡុង ភេទប្រុស អាយុ៥៥ឆ្នាំ ស្ថិតនៅភូមិទួលកណ្ដោលជើង ឃុំជីគរ ស្រុកត្បូងឃ្មុំ ខេត្តត្បូងឃ្មុំ មានមនុស្សប្រុសចំនួន៥នាក់៖ ទី១.ឈ្មោះ កុល រតនា ហៅស្នា អាយុ៤០ឆ្នាំ ទី២.ឈ្មោះ វ៉ាន់ ស៊ីនឿន អាយុ៣២ឆ្នាំ ទី៣.ឈ្មោះ លាង ឈុនឡេង អាយុ៥២ឆ្នាំ ទី៤.ឈ្មោះ វ៉ាន វឿន អាយុ ៥២ ឆ្នាំ ទី៥-ឈ្មោះ ចិន ចិត្ត អាយុ៤៧ឆ្នាំ ទាំងអស់គ្នានៅភូមិទួលកណ្តោលជើង ឃុំជីគរ បាននាំគ្នាផឹកស្រាអស់ចំនួន១លីត្រ នៅផ្ទះរបស់ឈ្មោះ អ៊ឹម ឡុង ។ ក្នុងពេលនោះក៏មានបញ្ហាទំនាស់ពាក្យសំដីបានកើតឡើងដោយសារតែជាតិសុរាចូលខ្លួនច្រើនពេក។
អធិការនគរបាលស្រុកត្បូងឃ្មុំប្រាប់បន្តឲ្យដឹងទៀតថានៅក្នុងពេលនោះស្រាប់តែឈ្មោះ កុល រតនា ហៅស្នា ឈ្មោះ វ៉ាន់ ស៊ីនឿន និងឈ្មោះ លាង ឈុនឡេង ក៏បាន នាំគ្នាទិញស្រា១លីត្រទៀត ដើម្បីទៅផឹកបន្តនៅផ្ទះរបស់ឈ្មោះ ហុង ភោគ មានគ្នាចំនួន៣នាក់ ផឹកបាន បន្តិចឈ្មោះ លាង ឈុនឡេង ឃើញឈ្មោះ វ៉ាន់ ស៊ីនឿន និង ឈ្មោះ កុល រតនា ហៅ ស្នា ឈ្លោះ ប្រកែក ចង្អុលមុខគ្នា ហើយក៏បានទៅផ្ទះមុនទៅ។ នៅសល់តែឈ្មោះ កុល រតនា ហៅស្នា និងឈ្មោះ វ៉ាន់ ស៊ីនឿន នៅផឹកបន្តតែ២នាក់ បន្តិចក្រោយមកឈ្មោះ វ៉ាន់ ស៊ីនឿន ក៏បានដើរទៅប្រាប់ឈ្មោះអ៊ឹម ឡុង ថាឲ្យមកមើលឈ្មោះ កុល រតនា ហៅស្នា ផងផឹកៗក៏ចេញឈាមក្បាល ហើយឈ្មោះ អ៊ឹម ឡុង ក៏បានហៅប្រពន្ធរបស់ឈ្មោះកុល រតនា ហៅស្នា ឲ្យទៅមើលក៏ឃើញឈ្មោះ កុល រតនា ហៅស្នាដេកលើដីក្រោមផ្ទះមានស្នាមដាច់រយះលើថ្ងាសហូរឈាម រួចក្រុមគ្រួសារក៏បានបញ្ជូនឈ្មោះ កុល រតនា ហៅស្នា ទៅព្យាបាលនៅមន្ទីរពេទ្យ ព្រះសីហនុ ក្រុងសួង និងបញ្ជូនបន្តទៅមន្ទីរពេទ្យ «មិត្តភាព កម្ពុជា ចិនត្បូងឃ្មុំ» ។ បន្ទាប់មកក្រុមគ្រួសារសម្រេចចិត្តយកជនរងគ្រោះត្រឡប់មកផ្ទះម្តាយបង្កើតនៅក្រុងសួងវិញហើយក៏បានស្លាប់នៅយប់ថ្ងៃទី៩ ខែកក្កដា ឆ្នាំ២០២៦។
បន្ទាប់ពីទទួលបណ្ដឹងពីប្រពន្ធរបស់សពជនរងគ្រោះ នៅថ្ងៃទី៩ ខែឆ្នាំដដែល ដោយមានបញ្ជាពីលោកឧត្តមសេនីយ៍ស្នងការ និងបញ្ជាពីលោក កែវ ភក្តី ព្រះរាជអាជ្ញារង នៃអយ្យការអមសាលាដំបូងខេត្តត្បូងឃ្មុំ កម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលជីគរ នាំខ្លួនឈ្មោះ វ៉ាន់ ស៊ីនឿន ដើម្បីសួរ ចម្លើយ ដោយមានព្រះរាជ្ញារង កែវ ភក្តី ចូលរួមសួរចម្លើយ និងសាក្សីជុំវិញកន្លែងកើតហេតុ ដោយផ្ទាល់ រួចបញ្ជាអោយឃាត់ខ្លួនជន សង្ស័យឈ្មោះ វ៉ាន់ ស៊ីនឿន ខាងលើ ចងក្រងសំណុំរឿងតាមនីតិវិធី។
អធិការនគរបាលស្រុកត្បូងឃ្មុំបញ្ជាក់ថា ក្រោយហេតុតែកើតឡើងសមត្ថកិច្ចបានស្រាវជ្រាវឃើញជនសង្ស័យឈ្មោះ ស៊ីនឿន ដែលបានផឹកស៊ីជាមួយអ្នករងគ្រោះគឺផឹកស្រាថ្នាំអស់ចំនួន២លីត្រ ទើបមានទំនាស់ពាក្យសម្ដីកើតឡើង ជននេះក្រោយពីបានកាប់អ្នករងគ្រោះមួយកាំបិតស្លាប់ហើយបានត្រឡប់មកផ្ទះរបស់ខ្លួនវិញដោះសំលៀកបំពាក់បោកគក់ឲ្យស្អាតដើម្បីជម្រះឈាមចេញកុំឲ្យមានអ្នកផ្សេងមើលមកមានការសង្ស័យ។តែទីបំផុតត្រូវបានសមត្ថកិច្ចស្រាវជ្រាវចាប់បានយ៉ាងតន់ហន់ព្រមទាំងដករហូតវត្ថុតាងចាប់យកនៅផ្ទះជនសង្ស័យមានកាំបិតបុ័ងតោចំនួន១ផងដែរ ៕
ចែករំលែកព័តមាននេះ