ឃាត់ខ្លួនជនសង្ស័យម្នាក់ ដកហូតបានថ្នាំញៀ.នមួយកញ្ចប់ធំ នៅស្រុកព្រះស្ដេច
- ព្រៃវែង
ខេត្តព្រៃវែង ៖ ជនសង្ស័យម្នាក់ ដែលជាមុខសញ្ញាសមត្ថកិច្ចកំពុងតាមដាន ត្រូវបានកម្លាំងកងរាជអាវុធហត្ថខេត្តព្រៃវែងចាប់ឃាត់ខ្លួន និងដកហូតបានវត្ថុតាងថ្នាំញៀនមួយកញ្ចប់ធំ ក្នុងពេលដែលរូបគេកំពុងទទួលយកថ្នាំញៀនដែលបក្សពួកផ្ញើមកឲ្យ តាមក្រុមហ៊ុនវីរ:ប៊ុនថាំ។
ការចាប់ឃាត់ខ្លួននេះ បានធ្វើឡើងកាលពីវេលាម៉ោង 2 រសៀល ថ្ងៃទី 13 មិថុនា នៅទីតាំងទទួលដឹកជញ្ជូនឥវ៉ាន់ ក្រុមហ៊ុនវីរៈប៊ុនថាំសាខាផ្សារកំពង់សឹង្ហ ក្នុងស្រុកព្រះស្ដេច ខេត្តព្រៃវែង។ ជនសង្ស័យដែលត្រូវបានឃាត់ខ្លួនមានឈ្មោះហ៊ាង ដានី ភេទប្រុស អាយុ 42ឆ្នាំ មានទីលំនៅក្នុងភូមិស្វាយ 30 ឃុំជើងភ្នំ ស្រុកបាភ្នំខេត្តព្រៃវែង។
លោកវរៈសេនីយ៍ទោ ផាត់ សុជោត ប្រធានមន្ទីរស្រាវជ្រាវនិងបង្ក្រាបបទល្មើស កងរាជអាវុធហត្ថខេត្តព្រៃវែងបានឲ្យដឹងថា ជនសង្ស័យគឺជាមុខសញ្ញាចាស់ ដែលកម្លាំងសមត្ថកិច្ចកំពុងតាមឃ្លាំមើលស្រាប់ គាប់ជួននៅរសៀលថ្ងៃទី 13 មិថុនា បុគ្គលិកក្រុមហ៊ុនវីរៈប៊ុនថាំសាខាផ្សារកំពង់សឹង្ហ បានផ្ដល់ព័ត៌មានមកថា ឃើញជនសង្ស័យចូលទៅទទួលយកឥវ៉ាន់ មានឫកពារគួរអោយសង្ស័យ ទើបរូបលោកដឹកនាំកម្លាំងចុះទៅឃាត់ខ្លួនជនសង្ស័យ ហើយឆែកពិនិត្យឥវ៉ាន់ដែលគេទៅទទួលយក ក៏ប្រទះឃើញថ្នាំញៀនមួយកញ្ចប់ធំ ទម្ងន់៥១.៥៦ក្រាម ទើបចាប់ឃាត់ខ្លួនជនសង្ស័យតែម្តង។
បច្ចុប្បន្នជនសង្ស័យ រួមនិងវត្ថុតាង ត្រូវបានឃាត់ខ្លួននៅបញ្ជាការដ្ឋានកងរាជអាវុធហត្ថខេត្តព្រៃវែង ហើយកម្លាំងអាវុធហត្ថខេត្ត កំពុងកសាងសំណុំរឿង ដើម្បីចាត់ការបន្តទៅតាមនីតិវិធី៕
ចែករំលែកព័តមាននេះ