ភ្ញៀវទេសចរចិន អាចមកលេងកម្ពុជាដោយមិនចាំបាច់មានទិដ្ឋាការ
- ភ្នំពេញ
ចាប់ពីថ្ងៃស្អែក ដល់ថ្ងៃទី១៥ ខែតុលា ឆ្នាំ២០២៦ ភ្ញៀវទេសចរចិន អាចកាន់លិខិតឆ្លងដែន ដោយមិនចាំបាច់ទិដ្ឋាការមកលេងកម្សាន្ត និងស្នាក់នៅប្រទេសកម្ពុជាបានហើយ ។
លោក ហួត ហាក់ រដ្ឋមន្ត្រីក្រសួងទេសចរណ៍បានអះអាងថា ភ្ញៀវទេសចរចិនដែលមកទស្សនាកម្ពុជា នឹងទទួលបាននូវបទពិសោធនៃបដិសណ្ឋារកិច្ចដ៏កក់ក្តៅ និងពីបេះដូង ចាប់ពីវិនាទីដំបូងនៃការអញ្ជើញដល់កម្ពុជា នៅថ្ងៃស្អែកនេះ ។
លោកបានអះអាងថា កម្ពុជាបានត្រៀមលក្ខណៈចាប់ផ្តើមអនុវត្តយុទ្ធនាការលើកលែងទិដ្ឋាការដល់ប្រជាជនចិនសាកល្បង ដែលនឹងចាប់ផ្តើមពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ខាងមុខ ។ លោកបានបន្តថា នៅក្នុងអំឡុងពេលនោះ ពួកគេអាចនឹងស្នាក់នៅកម្ពុជាដើរលេងកម្សាន្តបានរហូតដល់ទៅ១៤ ថ្ងៃ ហើយអាចចូលចេញបានច្រើនដង ។
កាលពីឆ្នាំ២០២៥ កម្ពុជាបានទទួលភ្ញៀវទេសចរអន្តរជាតិប្រមាណ ៦,៧លាននាក់ ដែលក្នុងនោះមានភ្ញៀវទេសចរចិនជាង ១,២លាននាក់ កើនឡើងប្រមាណ ៤២ភាគរយ ដោយឡែក ក្នុងរយៈពេលប្រាំខែដំបូងនៃឆ្នាំ២០២៦ ភ្ញៀវទេសចរចិនបានឈរនៅលំដាប់ទី១ ក្នុងចំណោមភ្ញៀវទេសចរអន្តរជាតិដែលធ្វើដំណើរមកកម្ពុជា ដែលឆ្លុះបញ្ចាំងពីសក្តានុពលខ្ពស់នៃទីផ្សារទេសចរចិនសម្រាប់វិស័យទេសចរណ៍កម្ពុជា ៕
ចែករំលែកព័តមាននេះ