អាជ្ញាធរខេត្តមិនទាន់មានតម្រុយពីមុខសញ្ញាជនល្មើស និងច្រកលួចនាំទំនិញចូលពីថៃ ដែលសម្ដេចតេជោបញ្ជាឲ្យស៊ើបអង្កេតនៅឡើយទេ
- បាត់ដំបង
ខេត្តបាត់ដំបង ៖ គិតត្រឹមថ្ងៃទី១៥ មិថុនា នេះ គឺមានរយៈ០៤ថ្ងៃកន្លងមកហើយ ដែលសម្ដេច តេជោ ហ៊ុន សែន ប្រធានព្រឹទ្ធភា ប្រមុខស្ដីទីនៃព្រះរាជណាចក្រកម្ពុជា បានចេញបទបញ្ជាឲ្យលោកអភិបាលខេត្តបាត់ដំបង តាមស៊ើបអង្កេត និងស្រាវជ្រាវស្វែងរកមុខជនល្មើសដែលលួចនាំទំនិញឆ្លងដែនខុសច្បាប់ចូលពីប្រទេសថៃ ដែលសម្ដេចចង្អុលត្រង់ៗថា «មានគេបើកច្រកលួចនាំទំនិញចូលនៅពាក់កណ្ដាលយប់» ប៉ុន្តែលទ្ធផលនៃការស៊ើបអង្កេតរបស់គណៈបញ្ជាការកងឯកភាពខេត្ត ហាក់ពុំមានតម្រុយពី «មុខសញ្ញា» ដែលសម្ដេចបានចង្អុលបង្ហាញនៅឡើយទេ ។
សំណុំរឿងដ៏រសើបដែលទម្លុះទម្លាយដោយសម្ដេចតេជោ ហ៊ុន សែន កាលពី០៤ថ្ងៃមុននេះ បាននិងកំពុងធ្វើឲ្យអាជ្ញាធរមូលដ្ឋាន មន្ត្រីជំនាញ ឬមន្ត្រីពាក់ព័ន្ធនានា ស្ងាត់មាត់ដូចគេចុក នៅពេលកោះសន្តិភាពសុំការបំភ្លឺតាមទូរស័ព្ទ ។ អាជ្ញាធរដែនដី ឬមន្ត្រីជំនាញខ្លះ មិនហ៊ានហើបមាត់ទេ (សុំមិននិយាយ) រីឯថ្នាក់ដឹកនាំខ្លះទៀត ទូរស័ព្ទចូលច្រើនដង តែមិនលើកទូរស័ព្ទ ដែលបង្ហាញពីការអសមត្ថភាព និងខ្វះការទទួលខុសត្រូវ ចំពោះបទបញ្ជារបស់ថ្នាក់ដឹកនាំកំពូល ។ កោះសន្តិភាពបានព្យាយាមសុំការបញ្ជាក់បន្ថែមអំពីសំណុំរឿងនេះ តាមទូរស័ព្ទពីលោក ដាញ់ អេងប៊ុនចាន់ ស្នងការខេត្ត នៅព្រឹកថ្ងៃទី១៥ មិថុនា ប៉ុន្តែលោកមិនឆ្លើយតប បើទោះជាទូរស័ព្ទចូលច្រើនដងក្ដី ។ ដោយឡែក អភិបាលខេត្តបាត់ដំបង លោក សុខ លូ តាមរយៈទូរស័ព្ទដែរ នៅវេលាថ្ងៃត្រង់ ថ្ងៃដដែលនេះ លោកមិនបានរៀបរាប់ច្រើនពីសំណុំរឿងដ៏រសើបនេះទេ ។
លោកគ្រាន់តែមានប្រសាសន៍ឆ្លើយតបយ៉ាងខ្លី ជាមួយនឹងសំនួរដ៏រសើបនេះយ៉ាងដូច្នេះថា «កំពុងធ្វើការ… ក្រុមការងារយើងកំពុងធ្វើការ… សូមអរគុណ»។ ថ្លែងក្នុងឱកាសចុះ ពិនិត្យរោងចក្រផលិតសម្ភារៈយោធានៅក្នុងខេត្តបាត់ដំបង កាលពីរសៀលថ្ងៃទី១១ មិថុនា សម្ដេចតេជោ ហ៊ុន សែន ប្រធានព្រឹត្ធសភា ប្រមុខស្ដីទីនៃព្រះរាជាណាចក្រកម្ពុជា បានមានប្រសាសន៍ថា «ឥឡូវបើតាមព័ត៌មាន មើលមើ.. ចាប់ពីយប់ហ្នឹងទៅ តាមព្រំដែនបាត់ដំបងឮថា គេបើករកស៊ីពីម៉ោង១១យប់ទល់ម៉ោង៤ភ្លឺ ។ ចឹងត្រូវតាមមើលអាហ្នឹង ឯកឧត្តម សុខ លូ… មើលឲ្យច្បាស់» ។
ថ្លែងនៅចំពោះមុខលោក សុខ លូ អភិបាលខេត្តបាត់ដំបង និងថ្នាក់ដឹកនាំជាន់ខ្ពស់ជាច្រើនរូបទៀត រួមជាមួយនឹងក្រុមកម្មករ កម្មការិនីនៅក្នុងរោងចក្រ DSS ប្រមាណ២០០នាក់ បើតាមប្រសាសន៍សម្ដេច មិនមែនគ្រាន់តែប្រាប់ឲ្យលោកអភិបាលខេត្ត ឲ្យធ្វើការស្រាវជ្រាវរកមុខជនល្មើស និងរកឲ្យឃើញច្រកលួចនាំទំនិញចូលពីប្រទេសថៃ ដោយខុសច្បាប់ប៉ុណ្ណោះទេ ។ សម្ដេច ហ៊ុន សែន ថែមទាំងបង្គាប់ឲ្យលោកសុខ លូ វាយបំបាក់ជើងជនល្មើសទៀតផង ។
សម្ដេចបានបញ្ជាក់ថា «បើនិយាយវាមិនស្ដាប់ វាមានតែព្រនង់..! បើនិយាយមិនស្ដាប់ទេ អ្ហែងតដៃគេវាយម៉ាព្រនង់ហើយ… រួចហើយគេយកមកញាត់គុកហើយ ។ អាហ្នឹងសូមបញ្ជាក់» ។ នេះជាប្រសាសន៏ ក៏ដូចជាបទបញ្ជារបស់សម្ដេច ហ៊ុន សែន ដែលបានណែនាំចង្អុលបង្ហាញឲ្យលោកអភិបាលខេត្តបាត់ដំបង ដឹកនាំកម្លាំងចុះស៊ើបអង្កេត និងស្រាវជ្រាវរកមុខជនល្មើសដែលលួចនាំចូលទំនិញពីប្រទេសថៃ ខុសច្បាប់តាមច្រកព្រំដែនទាំងកណ្ដាលយប់ ។
ប៉ុន្តែគិតមកទល់ពេលនេះ មានរយៈ០៤ថ្ងៃហើយ អាជ្ញាធរខេត្ត ហាក់មិនទាន់មានតម្រុយ ឬទទួលបាលលទ្ធផលសូម្បីបន្តិច ពីការស៊ើងអង្កេតនៅឡើយទេ ៕
ចែករំលែកព័តមាននេះ