អន្តរជាតិ ៖ ចក្រភពអង់គ្លេស បារាំង អាល្លឺម៉ង់ និងអ៊ីតាលី កាលពីថ្ងៃទី១៤ ខែមិថុនា ឆ្នាំ២០២៦ បានប្រកាសរួមគ្នាថា ត្រៀមខ្លួនរួចជាស្រេចលើកលែងទណ្ឌកម្មលើអ៊ីរ៉ង់ ដើម្បីជាការឆ្លើយតបទៅនឹងជំហានច្បាស់លាស់លើកម្មវិធីនុយក្លេអ៊ែររបស់ប្រទេសនេះ បន្ទាប់ពីសហរដ្ឋអាមេរិក និងអ៊ីរ៉ង់បានឈានដល់កិច្ចព្រមព្រៀងមួយ ដើម្បីបញ្ចប់សង្គ្រាមរបស់ភាគីទាំងពីរ។ នេះបើតាមប្រភពពី Reuters និង AFP បានចេញផ្សាយ។
រដ្ឋាភិបាលនៃប្រទេសទាំង ៤ បានលើកឡើងនៅក្នុងសេចក្តីថ្លែងការណ៍រួមគ្នាមួយយ៉ាងដូច្នេះថា «យើងត្រៀមខ្លួនជាស្រេចក្នុងការលើកលែងទណ្ឌកម្មដែលពាក់ព័ន្ធ ដើម្បីជាការឆ្លើយតបនឹងជំហានច្បាស់លាស់ និងអាចផ្ទៀងផ្ទាត់បានពីសំណាក់ប្រទេសអ៊ីរ៉ង់ ទាក់ទងនឹងកម្មវិធីនុយក្លេអ៊ែររបស់ខ្លួន។ យើងនឹងធ្វើការយ៉ាងជិតស្និទ្ធជាមួយសហរដ្ឋអាមេរិក និងអ៊ីរ៉ង់ ព្រមទាំងដៃគូតំបន់របស់យើង ដើម្បីចាប់យកឱកាសនេះ ដើម្បីរក្សានិរន្តរភាពនៃកិច្ចសន្ទនា និងឆ្ពោះទៅរកដំណោះស្រាយការទូតយូរអង្វែងមួយ»។
ចំណាត់ការដ៏សំខាន់នេះ ធ្វើឡើងបន្ទាប់ពីសហរដ្ឋអាមេរិក និងអ៊ីរ៉ង់ បានប្រកាសឈានដល់កិច្ចព្រមព្រៀងសន្តិភាពមួយ ដើម្បីបញ្ចប់សង្គ្រាមដែលបានផ្ទុះឡើង តាំងថ្ងៃទី២៨ ខែកុម្ភៈ ឆ្នាំ២០២៦។ ជាមួយគ្នានោះ ភាគីទាំងពីរនឹងចុះហត្ថលេខាលើឯកសារនេះនៅក្នុងប្រទេសស្វីស នាថ្ងៃទី១៩ ខែមិថុនា ខាងមុខនេះ។
ត្រង់ចំណុចនេះ សេចក្តីថ្លែងការណ៍រួមពីបណ្តាប្រទេសអឺរ៉ុបទាំង ៤ ខាងលើក៏បានសង្កត់ធ្ងន់ដែរថា អ៊ីរ៉ង់មិនត្រូវអនុញ្ញាតឱ្យមានអាវុធនុយក្លេអ៊ែរជាដាច់ខាត ដោយសេចក្តីថ្លែងការណ៍បានបញ្ជាក់ដូច្នេះថា៖ «យើងត្រៀមខ្លួនជាស្រេចក្នុងការសហការជាមួយអាមេរិក អ៊ីរ៉ង់ និងទីភ្នាក់ងារថាមពលបរមាណូអន្តរជាតិ (IAEA) ដើម្បីសម្រេចបាននូវគោលដៅនោះ»៕
ចែករំលែកព័តមាននេះ