ទីក្រុងយេរូសាឡឹម៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បង្ហាញការប្រឆាំងជំទាស់ទុកជាមុននៅពេលលេចឮដំណឹងថាអាចនឹងមានការដាក់ពង្រាយកងទ័ពតួកគីនៅតំបន់ហ្កាហ្សានៅពេលចប់សង្គ្រាម។ គម្រោងដាក់ពង្រាយកងកម្លាំងថែរក្សាសន្តិសុខនៅទីនោះជាផ្នែកមួយនៃការឃ្លាំមើលបទឈប់បាញ់រវាងអ៊ីស្រាអែល និងប៉ាឡេស្ទីន។
ថ្លែងនៅចំពោះមុខអនុប្រធានាធិបតីអាមេរិក លោកជេឌីវេន ដែលកំពុងបំពេញទស្សនកិច្ចនៅយេរូសាឡឹម លោកណឺតាន់យ៉ាហ៊ូថាលោកបានពិគ្រោះគ្នាអំពីសេណារីយោក្រោយបទឈប់បាញ់នៅហ្កាហ្សា, អំពីនរណាដែលមានសិទ្ធិបញ្ជូនកងរក្សាសន្តិភាពទៅឈរជើងនៅហ្កាហ្សា។ លោកវេនថ្លែងកាលពីម្សិលមិញថា បទឈប់បាញ់ក្រោមគំនិតផ្ដួចផ្ដើមរបស់លោកត្រាំល្អហួសពីការរំពឹងទុក។
លោកមានសុទិដ្ឋិនិយមជានិច្ចនៅក្នុងបញ្ហានេះ។ លោកមិនដែលនិយាយថាវាជារឿងងាយស្រួលនោះទេ។ ប៉ុន្តែចំណុចដែលលោកនៅតែមានសុទិដ្ឋិនិយមនៅត្រង់ថាភាគីទាំង២នៅតែបន្តអនុវត្តតាមបទឈប់បាញ់ ហើយយើងអាចកសាងអនាគតកាន់តែប្រសើរសម្រាប់តំបន់មជ្ឈិមបូព៌ាទាំងមូល។ បទឈប់បាញ់នេះថ្វីដ្បិតពោរពេញដោយភាពផុយស្រួយ មានន័យថាអាចនឹងបរាជ័យទៅវិញ ប៉ុន្តែវាអាចបន្តដំណើរទៅមុខបាន១២ថ្ងៃហើយ។ ឥឡូវនេះ គេកំពុងផ្ដោតសំខាន់ទៅលើការអនុវត្តផែនការសន្តិភាពរបស់លោកត្រាំដំណាក់កាលទី២។
ជំហានបន្ទាប់នោះតម្រូវឱ្យក្រុមហាម៉ាស់កាត់រំសាយអាវុធ និងបង្កើតស្ថាប័នដែលជួយជ្រោមជ្រែងពីសហគមន៍អន្តរជាតិដើម្បីមើលការខុសត្រូវទៅលើតំបន់ហ្កាហ្សា។ កងទ័ពបរទេសនឹងត្រូវបញ្ជូនទៅហ្កាហ្សាដើម្បីជួយគាំទ្រការបំពេញការងាររបស់នគរបាលប៉ាឡេស្ទីនដែលនឹងបង្កើតឡើងដើម្បីការពារសន្តិសុខនៅហ្កាហ្សា។ បើស្ដាប់មើលទៅ ក្រុមហាម៉ាស់ហាក់ដូចជាគ្មានតួនាទីអ្វីទាំងអស់ទាំងយោធា និងរដ្ឋបាលសាធារណៈ។
អ៊ីស្រាអែលបានបញ្ជាក់ម្ដងហើយម្ដងទៀតថាខ្លួនមិនអនុញ្ញាតឱ្យក្រុមហាម៉ាស់វិលមកគ្រប់គ្រងតំបន់ហ្កាហ្សាជាដាច់ខាត។ លោកណឺតាន់យ៉ាហ៊ូឆ្លើយតបទៅនឹងសំណួររបស់អ្នកសារព័ត៌មានដែលថាបើសិនតួកគីបញ្ជូនកងទ័ពទៅឈរជើងនៅហ្កាហ្សា តើលោកយល់ព្រមដែរឬទេ? លោកណឺតាន់យ៉ាហ៊ូឆ្លើយតបថាលោកមិនយល់ស្របទាល់តែសោះនឹងគំនិតនេះ។ តើពួកគេមិនចេះស្មានទេថាខ្លួនគេជាអ្វី?
លោកវេននិយាយបែបចាក់ខ្សែថាតួកគីអាចដើរតួនាទីបែបស្ថាបនា។ ប៉ុន្តែអាមេរិកមិនហ៊ានអារកាត់នៅក្នុងបញ្ហានេះទេបើសិនអ៊ីស្រាអែលជំទាស់។ ចាប់តាំងពីសង្គ្រាមនៅហ្កាហ្សាកើតឡើង ទំនាក់ទំនងរវាងតួកគី និងអ៊ីស្រាអែលក៏ចាប់ផ្ដើមធ្លាក់ចុះជាបន្តបន្ទាប់ព្រោះតួកគីប្រឆាំងនឹងអ៊ីស្រាអែល។ តួកគីបានប្រកាសរួចហើយថាបើសិនតំបន់ហ្កាហ្សាតម្រូវឱ្យមានកងទ័ពបរទេស ខ្លួននឹងបញ្ជូនកងទ័ពទៅឃ្លាំមើលបទឈប់បាញ់។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ