ខេត្តស្វាយរៀង ៖ ជនសង្ស័យជនជាតិវៀតណាមចំនួន០២នាក់ និងវត្តុតាងគ្រឿងញៀនជាង៣គីឡូក្រាម ត្រូវបានកម្លាំងនគរបាលខេត្តស្វាយរៀង សហការជាមួយកម្លាំងអធិការក្រុងបាវិត ធ្វើការឃាត់ខ្លួន និងបញ្ជួនខ្លួនទៅកាន់សាលាដំបូងខេត្តស្វាយរៀង ដើម្បីចាត់ការតាមច្បាប់ ។…
ខេត្តស្វាយរៀង ៖ ជនសង្ស័យជនជាតិវៀតណាមចំនួន០២នាក់ និងវត្តុតាងគ្រឿងញៀនជាង៣គីឡូក្រាម ត្រូវបានកម្លាំងនគរបាលខេត្តស្វាយរៀង សហការជាមួយកម្លាំងអធិការក្រុងបាវិត ធ្វើការឃាត់ខ្លួន និងបញ្ជួនខ្លួនទៅកាន់សាលាដំបូងខេត្តស្វាយរៀង ដើម្បីចាត់ការតាមច្បាប់ ។
យោងតាមសមត្ថកិច្ចបានអោយដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត និងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរង ទទួលផែនការងារប្រឆាំងគ្រឿងញៀន ដោយមានការសម្របសម្រួលនីតិវិធីពីលោក ចាន់ វណ្ណៈ ព្រះរាជអាជ្ញារង អមសាលាដំបូងខេត្តស្វាយរៀង កាលពីថ្ងៃទី១៦ ខែតុលា ឆ្នាំ២០២៥ កម្លាំងជំនាញការិយាល័យប្រឆាំងគ្រឿងញៀនខេត្ត ដឹកនាំដោយលោកវរសេនីយ៍ឯក កាន កេន នាយការិយាល័យ សហការជាមួយកម្លាំងអធិការដ្ឋាននគរបាលក្រុងបាវិត បានបើកប្រតិបត្តិការបង្ក្រាបករណីជួញដូរ រក្សាទុកដឹកជញ្ជូន និងប្រើប្រាស់ដោយខុសច្បាប់នូវសារធាតុញៀន នៅចំណុចបន្ទប់ជួលស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ចាប់ឃាត់ខ្លួនឧក្រិដ្ឋជនជនជាតិវៀតណាម០២នាក់ ដកហូតវត្ថុតាងកគ្រឿងញៀនបានជាង០៣គីឡូក្រាម ។
ប្រភពបានបន្តទៀតថា បន្ទាប់ពីចុះបង្ក្រាបទីតាំងជនសង្ស័យសមត្ថកិច្ច បានធ្វើការឃាត់ខ្លួនជនសង្ស័យចំនួន០២នាក់ជនជាតិវៀតណាម៖
១.ឈ្មោះ ដូ វាំងវ៉ិន ភេទប្រុស អាយុ២៧ឆ្នាំ ជនជាតិវៀតណាម ស្នាក់នៅបន្ទប់ជួលភូមិបាវិតកណ្តាល សង្កាត់បាវិត
២.ឈ្មោះ ឡេ អាញ់ភូ ភេទប្រុស អាយុ១៩ឆ្នាំ ជនជាតិវៀតណាម ស្នាក់នៅបន្ទប់ជួលភូមិបាវិតកណ្តាល សង្កាត់បាវិត។
សមត្ថកិច្ច បានដកហូតវត្ថតាង រួមមាន ៖
-ថ្នាំញៀនប្រភេទអ៊ិចស្តាស៊ី ទម្ងន់ ២,២០៥.៥០ក្រាម
-ថ្នាំញៀនប្រភេទកេតាមីនទម្ងន់ ៩៤១.០៣ក្រាម
-ថ្នាំញៀនប្រភេទមេតំហ្វេតាមីនទម្ងន់ ២.៨០ក្រាម។
សរុបសារធាតុញៀនគ្រប់ប្រភេទទម្ងន់ ៣,១៤៩.៣៣ក្រាម (៣គីឡូ និង១៤៩.៣៣ក្រាម)។
-រថយន្ត ០១គ្រឿង
-ម៉ូតូ០១គ្រឿង
-ទូរសព្ទដៃ ០៣គ្រឿង
-ជញ្ជីងថ្លឹងថ្នាំញៀនម០៣គ្រឿង
-គ្រាប់បែកដៃ ០១គ្រាប់
-គ្រាប់កាំភ្លើងខ្លី ១៦គ្រាប់
-ព្រមទាំងឧបករណ៍ សម្ភារមួយចំនួនទៀត ។
បច្ចប្បន្ន ជនសង្ស័យ រួមជាមួយវត្ថុតាងត្រូវបានបញ្ជួនទៅកាន់សាលាដំបូងខេត្ត ដើម្បីចាត់ការបន្តតាមច្បាប់ ។ លោកចៅក្រមបានចេញដីកាឃុំខ្លួនបណ្តោះអាសន្ននៅពន្ធនាគារខេត្តរួចរាល់ហើយ ៕
ចែករំលែកព័តមាននេះ