គូស្នេហ៍មួយគូជិះម៉ូតូឌុបគ្នាដើរលេង បែរជាជួបគ្រោះអកុសល
- ភ្នំពេញ
រាជធានីភ្នំពេញ ៖ គូស្នេហ៍មួយគូជិះម៉ូតូឌុបគ្នាដើរលេងក្នុងល្បឿនលឿនដូចហោះ ដល់ចំណុចផ្លូវកោងមិនបន្ថយល្បឿន ក៏ជ្រុលបុកខឿនពុះចែកទ្រូងផ្លូវបណ្តាលឲ្យប៉ើងគូស្នេហ៍មួយគូនោះបោកផ្ទប់នឹងស្លាកប៉ាណូ បណ្តាលឱ្យនារីវ័យក្មេងម្នាក់បោកនឹងបង្គោលស្លាកប៉ាណូបែកលលាដ៏ក្បាលស្លាប់ភ្លាមៗតែម្តង ចំណែកខាងប្រុសរងរបួសធ្ងន់ ដែលហេតុការណ៍នេះបានកើតឡើងកាលពីវេលាម៉ោង១២និង១០នាទីរំលង អាធ្រា្រតឈានចូលថ្ងៃទី២៣ ខែកក្កដាឆ្នាំ២០១៨…
សពនារីរងគ្រោះមិនទាន់ត្រូវបានស្គាល់អត្តសញ្ញាណនៅឡើយទេ ។ ចំណែកបុរសជាគូស្នេហ៍ដែលរងរបួសធ្ងន់ក៏មិនទាន់ត្រូវបានស្គាល់អត្តសញ្ញាណផងដែរ ។
ប្រភពពីអ្នកឃើញហេតុការណ៍បានប្រាប់អោយដឹងថា មុនកើតហេតុ គេឃើញគូស្នេហ៏ទាំងពីរនាក់នោះជិះម៉ូតូមួយគ្រឿងម៉ាកនិច ពណ៌ស ស៊េរីឆ្នាំ២០១៨ ពាក់ស្លាកលេខ ព្រែវែង ១W-៨៦៣១ បើកបរក្នុងល្បឿនយ៉ាងលឿនដូចហោះជែងគេឯងពេញផ្លូវ តាមបណ្តោយផ្លូវព្រះមុន្នីរ៉េតក្នុងទិសដៅពីជើងទៅត្បូងបានបត់មកផ្លូវវេងស្រេង ដោយសារផ្លូវមានស្ថានភាពកោង ហើយជនរងគ្រោះសង្ស័យស្រវឹងផង មិនបន្ថយល្បឿនទើបជ្រុលទៅបុកខឿនពុះចែកទ្រូងផ្លូវបណ្តាលអោយប៉ើងគូស្នេហ៏មួយគូនោះផ្លោងទៅបោកក្បាលនឹងបង្គោលស្លាកប៉ាណូ បណ្តាលអោយនារីវ័យក្មេងបែកលលាដ៏ក្បាលហូរឈាមដក់ពេញដងផ្លូវស្លាប់ភ្លាមៗយ៉ាងអាណោចអាធ័មនៅនឹងកន្លែងកើតហេតុ ចំណែកខាងប្រុសបានពាក់មួកកាពារសុវត្ថិភាពហើយនៅតែបែកមួកការពារទៀត ខ្ទាតប៉ើងពីបង្គោលស្លាកប៉ាណូនោះជាង១០ម៉ែត្របណ្តាលឱ្យបែកមាត់ហូរឈាមរងរបួសធ្ងន់សន្លប់ស្តូកស្តឹង ចំណែកម៉ូតូដួលអូសជាង៥០ម៉ែត្ររងការខូចខាតតិចតួច។ ភ្លាមៗជនរងគ្រោះត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យភ្លាមៗ ចំណែកសពនារីនោះ សមត្ថកិច្ចមិនទាន់អាចទាក់ទងរកសាច់បាននៅឡើយ ហើយនៅលើខ្លួនស្ត្រីជនរងគ្រោះក៏មិនមានអ្វីបញ្ជក់ពីអត្តសញ្ញាញនោះឡើយ។
ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ បានធ្វើការវាស់វែងតាមជំនាញ និងយកម៉ូតូទៅរក្សាទុកនៅអធិការដ្ឋានខណ្ឌមានជ័យ និងទំនាក់ទំនងរថយន្តដឹកសព ដើម្បីដឹកសពនារីវ័យក្មេងនោះទៅតម្កល់នៅវត្តទឹកថ្លា រង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ