រាជធានីភ្នំពេញ ៖ រថយន្តបែនដឹកដី មិនស្គាល់ម៉ាក និងមិនចាំស្លាកលេខ ១គ្រឿង បានបើកបរលឿន រួចវ៉ាជែងរថយន្ត ១គ្រឿងទៀត ម៉ាកតូយ៉ូតាតាកូម៉ា…
រាជធានីភ្នំពេញ ៖ រថយន្តបែនដឹកដី មិនស្គាល់ម៉ាក និងមិនចាំស្លាកលេខ ១គ្រឿង បានបើកបរលឿន រួចវ៉ាជែងរថយន្ត ១គ្រឿងទៀត ម៉ាកតូយ៉ូតាតាកូម៉ា ដែលកំពុងបើកបរស្របទិសគ្នា ប៉ុន្តែវ៉ាអត់ផុត ក៏បានកៀរ រថយន្តតាកូម៉ាខាងលើនោះទាំងកំរោល បណ្ដាលឲ្យរថយន្តតាកូម៉ាវិលខ្ទាតទៅបោកផ្ទប់ជាមួយម៉ូតូម៉ាកហុងដាឌីម ១គ្រឿង ធ្លាក់ផ្លូវចូលទៅក្នុងប្រឡាយទឹក ហើយបុរសដែលជាអ្នកជិះម៉ូតូ បានរងរបួសធ្ងន់ធ្ងរ ចំណែករថយន្តតាកូម៉ាក ធ្លាក់ចូលទឹកប្រឡាយដែរ រីឯរថយន្តបង្កបានបន្ថែមល្បឿន គេចទៅបាត់ដោយសុវត្ថិភាព ។
ឧប្បត្តិហេតុគ្រោះថ្នាក់ចរាចរណ៍មួយនេះ បានកើតឡើងកាលពីវេលាម៉ោង៤និង៣០នាទីល្ងាចថ្ងៃទី១៧ ខែមិថុនា ឆ្នាំ២០២៥ នៅលើមហាវិថីឈ្នះឈ្នះ ហៅផ្លូវអូដឹមកប់ស្រូវ ស្ថិតនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ប្រជាពលរដ្ឋ បាននិយាយថា នៅមុនពេលកើតហតុ ពួកគាត់បានឃើញរថយន្តបែនដឹកដី ១គ្រឿង មិនស្គាល់ម៉ាក និងមិនចាំស្លាកលេខ បើកបរលឿន ក្នុងទិសដៅពីជើងទៅត្បូង ហើយបានវ៉ាជែងយានយន្ត ដែលនៅខាងមុខជាបន្តបន្ទាប់ លុះពេលទៅដល់ត្រង់ចំណុចកើតហេតុ ក៏បានវ៉ាជែងរថយន្ត ១គ្រឿង ម៉ាកតូយ៉ូតា តាកូម៉ា ពណ៍ស ពាក់ស្លាកលេខភ្នំពេញ 2CC-5403 ដែលកំពុងបើកស្របគ្នា ប៉ុន្តែវ៉ាអត់ផុតក៏កៀរតាកូម៉ានោះ ។
ប្រជាពលរដ្ឋ បាននិយាយទៀតថា ខណៈនោះ បណ្ដាលឲ្យរថយន្តតាកូម៉ា វិលខ្ទាតទៅបោកផ្ទប់ជាមួយម៉ូតូ ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ដែលកំពុងបើកទៅពីក្រោយ បណ្ដាលឲ្យម៉ូតូខ្ទាតផ្លោងធ្លាក់ចូលក្នុងប្រឡាយទឹក ហើយបុរសអ្នកជិះម៉ូតូខាងលើរងរបួសធ្ងន់ ។ ដោយឡែករថយន្តតាកូម៉ា ក៏បានធ្លាក់ចូលទៅក្នុងទឹកប្រឡាយជាមួយម៉ូតូនោះដែរ និងបានរងការខូចខាត ប៉ុន្តែអ្នកបើកបរមិនបានរបួសធ្ងន់ធ្ងរឡើយ រីឯ រថយន្តបង្កបានបើកគេចបាត់ស្រមោល ។
ក្រោយពេលកើតហេតុ ជនរងគ្រោះ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យជាតិតេជោសន្តិភាព ហើយនគរបាលប៉ុស្តិ៍សំរោងក្រោម និងនគរបាលខណ្ឌពោធិ៍សែនជ័យ បានចុះទៅកាន់កន្លែងកើតហេតុ ។ បន្ទាប់មក អូសយករថយន្តតាកូម៉ា និងម៉ូតូរងគ្រោះចេញពីក្នុងប្រឡាយ បន្ទាប់មកឲ្យតំណាងភាគីរថយន្តតាកូម៉ា និងម៉ូតូសម្របសម្រួលគ្នាបញ្ចប់រឿង ៕
ចែករំលែកព័តមាននេះ