ខេត្តក្រចេះ ៖ សាច់សត្វព្រៃនិងសត្វព្រៃជាច្រើនប្រភេទ ត្រូវគេរាយការណ៍ថា កំពុងត្រូវបានដាក់លក់យ៉ាងចំហ ដែលអាជីវករភាគច្រើនជាជនជាតិវៀតណាម នៅផ្សារសាមគ្គីក្រុងក្រចេះ ។ ជំនួញខុសច្បាប់នេះ បាននិងកំពុងធ្វើឲ្យសាធារណជនរិះគន់មកលើអាជ្ញាធរថាគ្មានចំណាត់ការ…
ខេត្តក្រចេះ ៖ សាច់សត្វព្រៃនិងសត្វព្រៃជាច្រើនប្រភេទ ត្រូវគេរាយការណ៍ថា កំពុងត្រូវបានដាក់លក់យ៉ាងចំហ ដែលអាជីវករភាគច្រើនជាជនជាតិវៀតណាម នៅផ្សារសាមគ្គីក្រុងក្រចេះ ។ ជំនួញខុសច្បាប់នេះ បាននិងកំពុងធ្វើឲ្យសាធារណជនរិះគន់មកលើអាជ្ញាធរថាគ្មានចំណាត់ការ ខណៈដែលការដាក់លក់ត្រូវគេដឹងថា កើតមានជាយូរមកហើយនិងហាក់គ្មានទីបញ្ចប់ ។
សាច់សត្វព្រៃជាច្រើនប្រភេទក្នុងនោះភាគច្រើនមាន សាច់ឈ្លូស ជ្រូកព្រៃ អណ្តើក ត្រកួត កន្ធាយ កំពុងត្រូវបានឈ្មួញដាក់លក់យ៉ាងចំហនៅកណ្តាលផ្សារជារៀងរាល់ថ្ងៃ ពិសេសនៅពេលព្រឹក គឺគ្មានញញើតនឹងច្បាប់សោះឡើយ ។
សេចក្តីរាយការណ៍ពីអាជីវករលក់ត្រីនៅក្នុងផ្សារក្បែរកន្លែងលក់សាច់សត្វព្រៃបានឲ្យដឹងថា មួយថ្ងៃៗមានសត្វព្រៃរាប់រយគីឡូក្រាម ត្រូវបានឈ្មួញយកមកវះកាប់សាច់ដាក់លក់នៅតាមតូបដូចគេលក់សាច់គោ សាច់ជ្រូកដែរ ។ ពួកគាត់និយាយថា អ្នកលក់សាច់សត្វព្រៃនេះភាគច្រើនជាជនជាតិវៀតណាម ហើយការលក់នេះមិនមានការលាក់លៀមនោះទេ គឺលក់ជាចំហ ឯពួកគាត់ក៏មិនធ្លាប់ឃើញមានអាជ្ញាធរមានសមត្ថកិច្ចណាចុះមកបង្ក្រាបទប់ស្កាត់ឡើយ។
សត្វព្រៃទាំងនេះ ភាគច្រើនជាប់អន្ទាក់ដោយការឆក់ខ្សែភ្លើងបង្កៃ ហើយក្រុមឈ្មួញខ្មែរយកមកបោះដុំឲ្យអាជីវករវៀតណាម កាប់លក់រាយនៅក្នុងផ្សារ ។ ក្រោយពីមានការធ្វើអាជីវកម្មកលក់សាច់សត្វព្រៃរយៈពេលជាយូរមកហើយនោះ នៅថ្ងៃ ទី២២ ខែកក្កដា មានការបង្ហោះរូបជាច្រើនសន្លឹកសាជាថ្មីពីសកម្មភាពការកាប់ពន្លះសាច់សត្វឈ្លូសដ៏ធំមួយក្បាលរបស់ស្ត្រីជនជាតិវៀតណាមម្នាក់ ដើម្បីដាក់លក់យ៉ាងចំហនៅកណ្តាលផ្សារ ធ្វើឲ្យមានការភ្ញាក់ផ្អើល ។
ជុំវិញការធ្វើជំនួញខុសច្បាប់របស់អាជីវករវៀតណាមនេះ នាយសង្កាត់រដ្ឋបាលព្រៃឈើ ក្រចេះ លោក ម៉ី វុទ្ធី បានឲ្យដឹងថា មេព្រៃបានតែមិនជួបប្រទះទេ ខណៈការលក់បានធ្វើឡើងលឿនពេក ។ លោកនាយសង្កាត់ថ្លែងថា ខាង អាជ្ញាធរនិងមេព្រៃ នឹងចុះទៅធ្វើការផ្សព្វផ្សាយច្បាប់ស្តីពីសត្វព្រៃឲ្យបានទូលំទូលាយនៅក្នុងផ្សារ ដែលជាកន្លែងគោលដៅលក់សាច់ព្រៃឲ្យពួកគាត់ជ្រួតជ្រាប ឲ្យឈប់បន្តធ្វើអាជីវកម្មជំនួញខុសច្បាប់នេះទៀត ។ លោកអះអាងថា ក្រោយការចុះផ្សព្វផ្សាយ កម្លាំងសមត្ថកិច្ចនឹងបន្តឃ្លាំមើល ប្រសិនបើរកឃើញថាពួកគាត់នៅតែប្រព្រឹត្តជំនួញនេះទៀត គឺសមត្ថកិច្ចនឹងមានវិធានការតាមផ្លូវច្បាប់ ៕
ចែករំលែកព័តមាននេះ