ប្រេងសាំងអាចឡើងថ្លៃខ្លាំងនៅឆ្នាំ2020ជាឱកាសទីផ្សាររថយន្ដអគ្គិសនី
ប្រេងសាំងដែលមានតម្លៃថោក ប្រហែលជាមិនមានទៀតទេនៅ១០ឆ្នាំខាងមុខ ។ តាមអត្ថបទចុះផ្សាយថ្មីមួយនៅលើវេបសាយ Energy Security Weekly Update ដោយខាង Green…
ប្រេងសាំងដែលមានតម្លៃថោក ប្រហែលជាមិនមានទៀតទេនៅ១០ឆ្នាំខាងមុខ ។ តាមអត្ថបទចុះផ្សាយថ្មីមួយនៅលើវេបសាយ Energy Security Weekly Update ដោយខាង Green Car Reports បានអះអាងថា តម្លៃប្រេងសាំងនឹងឡើងថ្លៃគុណនឹង២នៅឆ្នាំ២០២០ ។
ការវិភាគទុកជាមុននេះ បានកើតឡើងយោងទៅតាមកត្តាជាច្រើន ។ បរិមាណប្រេងកាតនាពេលសព្វថ្ងៃនៅមានតិចតួច បើធៀបនឹងតម្រូវការប្រចាំថ្ងៃ ដែលចេះតែកើនឡើងមិនឈប់ ហើយគ្មានថ្ងៃថយចុះ ។ ប្រភពប្រេងសាំងក៏ថយចុះដែរ ដោយសារតែគ្រោះធម្មជាតិ ។ ការប្រើប្រាស់ប្រេងសាំងនៅប្រទេសចិននៅតែកើនឡើង ហើយបើតាមការសង្កេតមើលសព្វថ្ងៃនេះ គឺថាវាមិនស្មើគ្នាជាមួយនឹងការផ្គត់ផ្គង់ឡើយ ។
ប្រេងឆៅនៅសប្តាហ៍នេះ មានតម្លៃក្បែរនឹង៧០ដុល្លារក្នុង១បារ៉ែលអាមេរិក (១៥៨.៩លីត្រ) ។ តាមតម្រូវការចេះតែកើនឡើង គេរំពឹងថា វានឹងអាចឡើងថ្លៃដល់ទៅ១៥០ដុល្លារក្នុង១បារ៉ែលនៅឆ្នាំ២០២០ ។ តម្លៃនេះ មិនមែនជាតម្លៃថ្លៃខ្លាំងណាស់ណាទេ ព្រោះថា កាលពីឆ្នាំ២០០៨ គេក៏ធ្លាប់ជួបប្រទះនឹងការឡើងថ្លៃនេះដែរ ។ កាលនោះ ប្រេង១បារ៉ែលតម្លៃដល់ទៅ១៤៧ដុល្លារ ដែលបង្ខំឲ្យម្ចាស់រថយន្តទិញរថយន្តតូចៗនិងស៊ីសាំងតិច ដើម្បីឲ្យរត់រួចក្នុងការចំណាយ ។
ដូចនេះ ប្រសិនបើតម្លៃប្រេងសាំងឡើងខ្លាំងទៀតនោះ នៅពេលអនាគត មនុស្សយើងនឹងនាំគ្នាប្រើប្រាស់រថយន្តអគ្គិសនីម្តងទៀតហើយ។ នេះអាចធ្វើឲ្យការលក់រថយន្តអគ្គិសនី ក្លាយទៅជារបរត្រូវប៉ាន់ជាក់ជាមិនខាន ។ ក្រុមអ្នកវិភាគជាច្រើន ក៏បានធ្វើការប៉ាន់ប្រមាណរួចទៅហើយថា ការលក់រថយន្តអគ្គិសនី នឹងកើនឡើងគួរឲ្យកត់សម្គាល់ចាប់ពីឆ្នាំ២០២០-២០៤០ ជាពិសេស នៅពេលដែលតម្លៃរបស់អាគុយចុះថោក និងរថយន្តអគ្គិសនីទៀតសោត មានតម្លៃប្រហែលនឹងរថយន្តប្រើប្រាស់សាំងធម្មតា ៕
ចែករំលែកព័តមាននេះ