រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានហៅ ការធ្វើយុទ្ធនាការម្រាមដៃស្អាតមិនទៅបោះឆ្នោតរបស់ក្រុមអតីតបក្សប្រឆាំងគ្មានប្រសិទ្ធភាព និងអត់បានការនោះទេ ។ ការលើកឡើងរបស់អ្នកនាំពាក្យគណបក្សកាន់អំណាចនេះស្របពេលក្រុមអតីតប្រឆាំងដឹកនាំដោយលោក…
រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានហៅ ការធ្វើយុទ្ធនាការម្រាមដៃស្អាតមិនទៅបោះឆ្នោតរបស់ក្រុមអតីតបក្សប្រឆាំងគ្មានប្រសិទ្ធភាព និងអត់បានការនោះទេ ។
ការលើកឡើងរបស់អ្នកនាំពាក្យគណបក្សកាន់អំណាចនេះស្របពេលក្រុមអតីតប្រឆាំងដឹកនាំដោយលោក សម រង្ស៊ី និងកូនស្រីលោក កឹម សុខា បានធ្វើយុទ្ធនាការម្រាមដៃស្អាតនៅថ្ងៃបោះឆ្នោតខាងមុខនេះ ។ លោក សុខ ឥសាន បានឱ្យដឹងតាមប្រព័ន្ធតេឡេក្រាមនៅថ្ងៃទី១៨ កក្កដា យុទ្ធនាការម្រាមដៃស្អាតរបស់ក្រុមប្រឆាំងនៅក្រៅប្រទេសអត់បានការ ។
លោកបន្តថា នៅពេលដែលប្រជាជនកម្ពុជាទូទាំងប្រទេសដែលមានឈ្មោះក្នុងបញ្ជីបោះឆ្នោតជាង៨៤ភាគរយកំពុងតែផ្ចង់អារម្មណ៏ឆ្ពោះទៅរកថ្ងៃទី២៩ ខែកក្កដា ឆ្នាំ២០១៨ នេះអាលនឹងទៅបោះឆ្នោតបែរជាកូនស្រី កឹម សុខា ជនជាប់ចោទពីបទសន្និដ្ឋិភាពជាមួយបរទេសបានធ្វើយុទ្ធនាការចង្អុលដៃស្អាតក្នុងចេតនាទុច្ចរិតមិនចង់ឲ្យប្រជាពលរដ្ឋទៅបោះឆ្នោត ។
លោកគូសបញ្ជាក់ថា «ចេតនាដ៏អគតិនេះមិនមានប្រសិទ្ធភាពសោះឡើយ ដោយសារប្រជាពលរដ្ឋនៅក្នុងស្រុកទេដែលមានឈ្មោះក្នុងបញ្ជីបោះឆ្នោត ទើបអាចទៅបោះឆ្នោតបាន ហើយបងប្អូននឹងអញ្ជើញទៅបោះឆ្នោតក្នុងនាមជាម្ចាស់ស្រុក ម្ចាស់ប្រទេស» ។
ជាមួយគ្នានោះដែរលោកក៏បានលើកឡើងថា ការធ្វើយុទ្ធនាការម្រាមដៃស្អាតជាយុទ្ធនាការមានវិសាលភាពតែចំពោះបងប្អូននៅក្រៅប្រទេសដែលអត់មានឈ្មោះក្នុងបញ្ជីបោះឆ្នោត តើបានការអីទៅទោះចង់បោះឆ្នោតក៏អត់បានបោះដែរ ។ ដូច្នេះរបស់ដែលហៅថា យុទ្ធនាការម្រាមដៃស្អាត វាអត់បានការសោះឡើយ ។ ដំណើរការបោះឆ្នោតនឹងនៅតែប្រព្រឹត្តទៅដោយរលូនដែលឆ្លុះបញ្ចាំងពីឆន្ទៈរបស់ប្រជាពលរដ្ឋកម្ពុជាក្នុងការសម្រេចជោគវាសនានៃប្រទេសជាតិខ្លួន ស្របតាមគោលការណ៏ប្រជាធិបតេយ្យសេរីពហុបក្ស ។
សូមជម្រាបការលើកឡើងរបស់លោក សុខ ឥសាន បន្ទាប់បីកូនស្រីលោក កឹម សុខា គឺកញ្ញា គឹម មនោវិទ្យា បានប្រកាសធ្វើយុទ្ធនាការម្រាមដៃស្អាតនៅថ្ងៃទី២៩ ខែកក្កដា ឆ្នាំ២០១៨ ដើម្បីនាំមកនូវការផ្លាស់ប្តូរ ។ ក្រៅពីកូនស្រីលោក កឹម សុខា ក៏មានលោក សម រង្ស៊ី អតីតមេបក្សប្រឆាំងដែលកំពុងរស់នៅក្រៅប្រទេសដែរនោះក៏បានអំពាវនាវកុំឲ្យប្រជាជនកម្ពុជាទៅបោះឆ្នោតផងដែរ ៕
ចែករំលែកព័តមាននេះ